Xana U Titwisa Ku Yini Loko Munhu A Nga Tsakeli?

¹ Ku pfumala ku tsakela i ku kayivela ka moya wa xinghana kumbe mintlhaveko, ku nga khumbeki kumbe ku nga khathali. Hi rin’wana ra malangutelo lama tolovelekeke lama nga riki manene lawa hi hlangavetanaka na wona evutirhelini. Xana u titwisa ku yini emhakeni leyi? Xana malangutelo lawa ma ku hete matimba evutirhelini bya wena? Xana u nga ma hlula njhani leswaku u ta kota ku fikelela vanhu hi rungula ra Mfumo?

² Xo sungula, kuma xivangelo lexi endlaka vanhu va le nsin’wini ya ka n’wina va nga tsakeli. Xana swi vangiwa hileswi va hetiwaka matimba hi varhangeri va vona va tipolitiki ni va vukhongeri? Xana va vona onge a ku na ntlhantlho wa swiphiqo leswi va langutaneke na swona? Xana a va swi tshembi switshembiso swa leswaku swilo swi ta antswa? Xana a va tiyimiselanga ku ehleketisisa hi swilo swa moya handle ka loko vo vona vuyelo bya xihatla bya swilo leswi vonakaka?

³ Kandziyisa Ntshembo Wa Mfumo: Ku hava xiphiqo lexi Mfumo wu nga ta ka wu nga xi tlhantlhi. Hikwalaho loko swi koteka, hi fanele hi vulavula hi switshembiso swa Mfumo, hi ku tshaha marito-nkulu ya Matsalwa lama vulavulaka ha swona, hambiloko swi nga koteki ku va hlayela ndzimana ya Bibele. (Hev. 4:12) Hambiswiritano, xana hi nga swi kotisa ku yini leswaku bulo ra hina ri nghena emhakeni leyi?

⁴ Vanhu va fanele va twisisa xikongomelo xa riendzo ra hina. Va fanele va swi xiya leswaku ha va endzela hikwalaho ka rirhandzu ra muakelani ni ku khumbeka ka hina hi vanhu. Hi nga vutisa xivutiso lexi tlhontlhaka mianakanyo xo tanihi lexi nge, “Xana u vona onge ntlhantlho wa [xiphiqo lexi khumbaka vanhu] hi wihi?” Loko xingheniso xo karhi xi nga tirhi, ringeta xin’wana.

⁵ Ensin’wini yin’wana leyi nga ni vanhu lava fuweke laha vini va miti va nga ri tsakeriki rungula ra Mfumo, vahuweleri va ringete ku kuma xingheniso lexi nga ta pfuxa ku tsakela. Loko mpatswa wun’wana wu fambisa buku leyi nge Vutivi, wu ringete xingheniso lexi: “Xana u vona onge dyondzo leyinene i ya nkoka leswaku munhu a humelela emisaveni namuntlha? Xana wa pfumela leswaku dyondzo leyi heleleke yi katsa ni vutivi bya Bibele?” Eka ndzhenga wun’wana va fambise tibuku tinharhu, yin’wana ya tona va yi fambisele wansati un’wana la vuleke leswaku u hlaye buku hinkwayo ya Vutivi naswona u amukele dyondzo ya Bibele.

⁶ Loko u hlangana ni vanhu lava nga tsakeliki, ringeta swingheniso swo hambana-hambana, vutisa swivutiso leswi tlhontlhaka mianakanyo, ivi u tirhisa matimba ya Rito ra Xikwembu. Hi ndlela yoleyo u nga swi kota ku pfuna van’wana leswaku va namarhela ntshembo wa hina lowu hlamarisaka wa Mfumo.