Ku Va Kona eMinhlanganweni “Hilaha Ku Engetelekeke”

¹ Ku hlengeletana nkarhi hinkwawo a ku ri nchumu wa nkoka eka vanhu va Yehovha. Vaisrayele a va ri ni tempele ni masinagoga tanihi swivandla swa vugandzeri bya ntiyiso, dyondzo ya Xikwembu ni ku hlangana va titsakisa. Hilaha ku fanaka, Vakreste vo sungula a va tshikanga ku hlengeletana. Tanihi leswi mintshikilelo ni miringo swi engetelekaka emasikwini lawa yo hetelela ya mangava, na hina hi lava ku tiyisiwa hi tlhelo ra moya, ku tiyisiwa loku minhlangano ya hina ya vandlha yi ku nyikelaka—naswona hi ku lava “hilaha ku engetelekeke.” (Hev. 10:25) Xiya swivangelo swinharhu leswi hi endlaka hi ya eminhlanganweni.

² Xinakulobye: Matsalwa ma hi tsundzuxa ku ‘hambeta hi chavelelana, hi akana.’ (1 Tes. 5:11) Ku hlangana ni lava chavaka Xikwembu ku tata miehleketo ya hina hi mianakanyo leyinene ni ku hi susumetela ku endla mintirho leyinene. Kambe loko hi tihambanisa ni van’wana, hi ta tikuma hi nghenisa mianakanyo ya vuhunguki, ya vutianakanyi hambi ku ri ya ku tikhoma loko biha.—Swiv. 18:1.

³ Ndzetelo: Minhlangano ya Vukreste yi nyikela nongonoko lowu yaka emahlweni wa ndzetelo wa Bibele lowu endleriweke ku hlayisa rirhandzu ra Xikwembu ri hanya etimbilwini ta hina. Yi hi nyika nkongomiso lowunene eku tirhiseni ka “ndzayo hinkwayo ya Xikwembu.” (Mint. 20:27) Minhlangano yi hi letela ku kuma vutshila eku chumayeleni mahungu lamanene ni le ku dyondziseni, vutshila lebyi lavekaka hilaha ku engetelekeke sweswi leswaku hi ta va ni ntsako lowu nga hlamuselekiki wa ku kuma ni ku pfuna lava amukelaka ntiyiso wa Bibele.

⁴ Nsirhelelo: Emisaveni leyi yo homboloka, vandlha i xisirhelelo xa xiviri hi tlhelo ra moya—vuchavelo bya ku rhula ni rirhandzu. Loko hi ri eminhlanganweni ya vandlha, moya lowo kwetsima wa Xikwembu wu ni nkucetelo wa matimba eka hina, wu humesa mihandzu ya “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.” (Gal. 5:22, 23) Minhlangano yi hi tiyisa leswaku hi tshama hi tiyile ni ku va lava nga tsekatsekiki eripfumelweni. Yi hi hlomisela ku lunghekela miringo leya ha taka.

⁵ Loko hi ya eminhlanganweni nkarhi na nkarhi, hi tokota leswi mupisalema a swi hlamuseleke, hilaha swi rhekhodiweke hakona eka Pisalema 133:1, 3: “Langutani! A hi ku ṭakisa ka ŝona, ni ku nanḍiha, loko mašaka ma hanya ŝiṅwe, ma twanana.” Kwihi na kwihi laha vanhu va Xikwembu va tirhaka ni ku hlengeletana kona namuntlha, “hi kona Yehova a leriselaka mikateko, ni v̌utomi, hi laha ku nga heriki.”—Xiitaliki i xerhu.