Malandza Ya Vutirheli Ma Endla Ntirho Wa Nkoka
1 “Va tikombise va ri vanhu lava tinyiketeleke hakunene lava ripfumelo ra vona ri kombisiweke hi ntirho wa ku chivirika wa Mfumo ni ku pfuna van’wana ku tiyisiwa eripfumelweni.” Eka tluka 57, buku leyi nge Ku Hleleriwa Ku Hetisisa Vutirheli Bya Hina yi vula tano malunghana ni malandza ya vutirheli. Entiyisweni, xikombiso xa moya lexi vekiwaka hi malandza ya vutirheli xi faneriwa hi ku tekeleriwa. Ku tirhisana na wona ni vakulu “[swi] endla leswaku miri wu kula wu akeka hi rirhandzu.”—Efe. 4:16.
2 Malandza ya vutirheli ma endla ntirho wa nkoka swinene evandlheni. Anakanya hi mintirho hinkwayo ya wona ya risima! Ma khathalela tiakhawunti, tibuku, timagazini, swikhokhelo, masimu; ma tirha tanihi varindzi, ma khathalela switirho swa mpfumawulo ni ku pfuna eku hlayiseni ka Holo ya Mfumo! Ma nyikela tinkulumo eXikolweni xa Vutirheli bya le Tilweni ni le ka Nhlangano wa Ntirho. Man’wana ya wona ma nyikela tinkulumo ta le rivaleni kumbe ma fambisa yin’wana ya minhlangano ya vandlha. Ku fana ni swirho swa miri, malandza ya vutirheli ma endla ntirho lowu hi wu lavaka.—1 Kor. 12:12-26.
3 Ku vona malandza ya vutirheli ma tirhisana hi vun’we ni vakulu tanihi ntlawa wun’we wa malandza lama xiximanaka ni ku anakanyelana, swi susumetela van’wana ku endla leswi fanaka. (Kol. 2:19) Hi ku hetisisa vutihlamuleri bya wona hi ku tshembeka vhiki na vhiki ni ku kombisa rirhandzu eka vanhu van’wana, ma pfuna eka nhluvuko wa vandlha leri kulaka hi tlhelo ra moya.
4 Xana hi nga endla yini leswaku hi kombisa ku tlangela ka hina eka malandza ya vutirheli lama tirhaka hi matimba? Hi fanele hi tiva mintirho ya wona leyi ma averiweke yona naswona hi kombisa ku tshama hi lunghekele ku kombisa ntirhisano loko mpfuno wa hina wu laveka. Hi marito kumbe hi swiendlo, hi nga ma komba leswaku ha wu tlangela ntirho wa wona. (Swiv. 15:23) Lava va hi tirhelaka hi matimba va faneriwa hi xichavo xa hina lexi humaka embilwini.—1 Tes. 5:12, 13.
5 Rito ra Xikwembu ri hlamusela ntirho ni timfanelo ta malandza ya vutirheli. (1 Tim. 3:8-10, 12, 13) Ntirho wa wona wo kwetsima i wa nkoka swinene leswaku vandlha ri kota ku tirha. Vavanuna lava va faneriwa hi xikhutazo xa hina nkarhi na nkarhi, tanihi leswi hinkwavo va nga ni “swo tala swo swi endla entirhweni wa Hosi.”—1 Kor. 15:58.