Vuphayona—Ndlela Yo Tirhisa Nkarhi Wa Hina Hi Vutlharhi!

¹ ‘Ana se ndzi ni swo tala swo swi endla! Xana i vutlharhi ku va ndzi nghenela vuphayona sweswi?’ Makwerhu un’wana wa xisati a vula tano hi mbilu loko a ri karhi a yingisele nkulu la nga phayona, loyi enhlengeletanweni ya xifundzha a a nyikela nkulumo leyi nge “Ku Ya eMahlweni Ni Vutirheli Bya Vuphayona.” Makwerhu un’wana wa xinuna lontshwa loyi a ri un’wana wa vayingiseri, u tivutisile, ‘Xana yena u swi kotisa ku yini ku va phayona? Mina a ndzi nkulu wa vandlha kambe ndzi langutane ni mintirho yo tala evuton’wini bya mina!’

² Loko nkulu loyi a ri karhi a hlamusela mikateko ya ntirho wa vuphayona, u burisane ni maphayona yo hlayanyana ya xifundzha xolexo, lama hlamuseleke mindzulamiso leyi ma yi endleke leswaku ma kota ku phayona ni ndlela leyi Yehovha a ma chululeleke mikateko ha yona eka matshalatshala ya wona. Un’wana a lamarile, un’wana a ri ni munghana wa vukati la nga riki mupfumeri naswona un’wana a tshike ntirho wa ku tihanyisa kambe a swi kota ku hanya hi leswi a ri na swona. Loko makwerhu wa xinuna ni wa xisati lava hi vulavuleke ha vona, va twa ndlela leyi maphayona lawa a ma humelela ha yona hi ku pfuniwa hi Yehovha, va sungule ku kambisisa langutelo ra vona ni swiyimo swa vona. Ha ku kombela leswaku na wena u endla tano, ngopfu-ngopfu leswi tiawara leti lavekaka eka maphayona ti hungutiweke naswona sweswi vahuweleri vo tala va mahungu lamanene va nga swi kota ku ti fikelela.

³ Ha swi tiva leswaku Yehovha i Mutumbuluxi naswona i Hosi Leyikulu ya Vuako Hinkwabyo hikwalaho hi fanele hi nyiketela vutomi bya hina eka yena. (Dan. 4:17; Mint. 17:28) Swi le rivaleni eka hina leswaku Yehovha u tirhisa nhlengeletano yin’we ntsena. Hi ni lunghelo ra ku tirha na yona hi ku tshembeka, hi ku seketela “hlonga ro tshembeka ni ro tlhariha” eku nyikeleni ka vumbhoni bya Mfumo makumu ma nga si fika. (Mat. 24:45; 25:40; 1 Pet. 2:9) Leswi se hi hanyaka endzeni-ndzeni ka ‘masiku yo hetelela,’ ha swi vona leswaku nkarhi lowu saleke wa ku chumayela i wutsongo. (2 Tim. 3:1) Hi hala tlhelo, hi fanele hi khathalela mindyangu ya hina hi swa ku tihanyisa. (1 Tim. 5:8) Muholo wa munhu a wa ha swi koti ku xava swo nyawula ku fana ni tolweni wa masiku. Kumbexana rihanyo ra hina a ra ha ri swona leswi a ri ri xiswona khale. Entiyisweni, ha swi lava ku va ni nkarhi wutsongo ni ku va ni swilo leswi hi nga ta swi tirhisa. (Ekl. 3:12, 13) Hikwalaho hi nga ha tivutisa loko ku amukela xirhambo xa ku nghenela vuphayona ku ri mhaka ya vutlharhi.

⁴ Swi le ka un’wana ni un’wana wa hina leswaku hi kambisisa swiyimo swa hina hi vukheta ivi hi tiendlela xiboho loko hi lava ku nghenela vuphayona. (Rhom. 14:12; Gal. 6:5) Swa tsakisa ku vona nhlayo leyi engetelekeke ya lava amukeleke xirhambo xo nghenela vuphayona. Ku nga khathariseki mintshikilelo ni swiphiqo swa masiku lawa yo hetelela, xiviko xa ntirho wa lembe lexi humesiweke eka 1999 Yearbook, xi kombisa leswaku emisaveni hinkwayo, vanhu va Yehovha va kwalomu ka 700 000 va ya emahlweni ni vutirheli bya vuphayona. Ku nga khathariseki leswaku va tirha ehansi ka swiyimo swo tika swa ikhonomi, va kayivela swofamba, va khomiwa hi mavabyi, kumbe va langutana ni swiphiqo kumbe maxangu man’wana, vamakwerhu lava a va tshiki ku endla leswinene, sweswo swa tlangeriwa. (Gal. 6:9) Va amukele xikombelo lexi Yehovha a xi vuleke xa leswaku va n’wi ringa. (Mal. 3:10) Va swi vona leswaku ntirho wa vuphayona i ndlela ya vutlharhi ya ku tirhisa nkarhi wa vona wo koma ni leswi va nga na swona, naswona entiyisweni Yehovha u va katekisile eka mindzulamiso leyinene leyi va yi endleke leswaku va nghenela vuphayona ni ku ya emahlweni ni vuphayona.

⁵ Maphayona Ma Katekisiwa: Makwerhu un’wana wa xisati wa le Cameroon la nga ni n’wana wa xinhwanyetana wa hlamusela: “Ku sukela eku tswariweni kakwe, a ndzi famba na yena evutirhelini nkarhi na nkarhi. Hambiloko a nga si sungula ku deya, a ndzi n’wi bebula hi dzovo. Siku rin’wana loko ndzi ri evutirhelini nimixo, ndzi fike ndzi yima emakete leyi nga ekusuhi ni xitarata. N’wananga u suke laha a ndzi ri kona, a teka timagazini to hlayanyana enkwameni wa mina. U deye a ya eka makete yin’wana leyi nga ekusuhi. Hambileswi a nga ta vula swo tala, u koke nyingiso wa wansati un’wana ivi a n’wi fambisela magazini. Wansati loyi u hlamarisiwe hi ku vona n’wana lontsongo swonghasi a hlanganyela entirhweni lowu. Wansati loyi u amukele magazini kun’we ni dyondzo ya le kaya ya Bibele!”

⁶ Loko a angula eka xirhambo xa maphayona ya nkarhinyana lama engetelekeke, nkulu un’wana tlhelo nhloko ya ndyangu eZambia, loyi a nga ni ntirho wa nkarhi hinkwawo wa ku tihanyisa, u anakanye ku nghenela vuphayona bya nkarhinyana ku nga khathariseki leswi a ri na mintirho yo tala. A lava ku vekela vandlha ni ndyangu wakwe xikombiso lexinene. Minkarhi yin’wana, a yimisa movha wakwe etlhelo ka pato ivi a tlanga khasete ya buku leyi nge Xihundla Xa Ntsako eNdyangwini a rhamba vahundzi va ndlela leswaku va ta yingisela khasete leyi. Hikwalaho, u swi kotile ku fambisa tikopi ta 16 ta buku leyi nge Ntsako eNdyangwini ni tikopi ta 13 ta buku leyi nge Vutivi ni ku sungula tidyondzo timbirhi ta Bibele.

⁷ Nakambe moya lowunene wa vuphayona a wu ri kona ni le tikweni ra Zimbabwe leri akelaneke ni leri boxiweke laha henhla. Hi April 1998, vandlha rin’wana leri nga ni vahuweleri va 117 ri vike 70 wa maphayona ya nkarhinyana ni 9 wa maphayona ya nkarhi hinkwawo. Vandlha rin’wana leri nga ni vahuweleri va 94, ri ve ni maphayona ya nkarhinyana ya 58 lama vikeke. Nakambe rin’wana leri nga ni vahuweleri va 126, ri vike leswaku 58 va bohe ku nghenela vuphayona bya nkarhinyana, va tirha ni mune wa maphayona ya nkarhi hinkwawo. Lembe ra ntirho leri hundzeke ri ve ro hlawuleka eZimbabwe. Hambileswi vamakwerhu a va khomekile hi timhaka ta mindyangu, mintirho ya vandlha ni ku aka rhavi, va lave ku tirhisa nkarhi wa vona hi vutlharhi evutirhelini.

⁸ Maphayona ma swi xiya leswaku ku nghenela ntirho wa vuphayona ni ku tiyisela entirhweni lowu a swi titsheganga hi matimba ya wona. Hi vona vo sungula ku twisisa leswaku swa koteka ku endla hinkwaswo leswi va kotaka ku swi endla hikwalaho ka leswi va “titshege[ke] hi ntamu lowu Xikwembu xi wu nyikaka.” (1 Pet. 4:11) Ripfumelo ra vona ri va pfuna ku ya emahlweni ni vutirheli bya vona siku na siku. Ematshan’weni ya ku tilavela mintsako ni ku tiphina, maphayona lama humelelaka ma swi tiva leswaku loko ma ta ya emahlweni ni vuphayona ku nga ha laveka ku “lwa lokukulu ngopfu,” kambe hambiswiritano ma kuma mikateko yo tala.—1 Tes. 2:2.

⁹ Xikombiso Xa Pawulo Xi Faneriwa Hi Ku Tekeleriwa: Bibele yi hlamusela leswi muapostola Pawulo a swi endleke evutirhelini ni mpfuno lowunene lowu a wu nyikeke vanhu vo tala. Hikwalaho, eka vanhu lava a va taleriwe hi mintirho, Pawulo yena a a va tlula ekule. U tiyisele ku xanisiwa ni ku vavisiwa emirini leswaku a kota ku chumayela mahungu lamanene ni ku tiyisa mavandlha. Nakambe a boheka ku tiyisela xiphiqo lexikulu xa rihanyo. (2 Kor. 11:21-29; 12:7-10) A a tiyimiserile ku tirhisa nkarhi wakwe hi vutlharhi. A swi tiva leswaku hinkwayo mintirho leyi a yi endleke a pfuniwa hi Yehovha. (Filp. 4:13) Ku hava ni un’we wa lava Pawulo a va pfuneke loyi a a ta anakanya leswaku nkarhi ni matshalatshala yakwe entirhweni wa Yehovha a swi pfunanga nchumu kumbexana ku anakanya leswaku a ta va a swi tirhisele ku endla swilo swo antswa. Ina, ni sweswi ha ha pfuneka hikwalaho ka leswi Pawulo a wu tirhiseke hi vutlharhi nkarhi wakwe! Ha yi tlangela swinene ndzayo yakwe leyi huhuteriweke leyi yi hi pfunaka ku hlela leswi nga swa nkoka eka hina ni ku namarhela ntiyiso eminkarhini leyi ya maxangu!

¹⁰ Sweswi ku tlula rini na rini, ‘nkarhi lowu seleke wa ku twarisa mahungu lamanene wu komile.’ (1 Kor. 7:29; Mat. 24:14) Hikwalaho, i swinene ku va hi tivutisa, ‘Loko mundzuku ndzo lahlekeriwa hi vutomi bya mina hi xitshuketa, xana namuntlha a ndzi ta swi kota ku byela Yehovha leswaku ndzi tirhise nkarhi wa mina hi vutlharhi?’ (Yak. 4:14) Ha yini sweswi u nga vulavuli na Yehovha hi xikhongelo, u n’wi tiyisekisa hi ku navela ka wena ku tirhisa nkarhi wa wena hi vutlharhi tanihi un’wana wa Timbhoni takwe? (Ps. 90:12) Kombela Yehovha leswaku a ku pfuna ku antswisa vutomi bya wena. Swi nga ha endleka leswaku eku sunguleni a wu anakanye leswaku a wu nge swi koti ku phayona, xana u vona onge sweswi swi nga koteka ku nghenela vuphayona?

¹¹ Tirhisa Swiyimo Swa Wena Hi Vutlharhi: Swa twisiseka leswaku hikwalaho ka swiyimo, van’wana lava va swi navelaka va nga ka va nga swi koti ku hlela tiawara ta 70 hi n’hweti leswaku va va maphayona ya nkarhi hinkwawo. Hambiswiritano, vahuweleri vo tala va swi kota ku heta tiawara ta 50 hi n’hweti evutirhelini tanihi maphayona ya nkarhinyana hilaha swi kotekaka hakona nkarhi na nkarhi kumbexana va ya emahlweni na byona. Loko swiyimo swa wena swi nga ku pfumeleli ku nghenela vuphayona bya nkarhinyana kumbe bya nkarhi hinkwawo, u nga heli matimba. Hambeta u khongelela leswaku swiyimo swa wena swi cinca. Loko sweswi swi nga koteki leswaku xiyimo xi cinca, eneriseka hi ku tiva leswaku Yehovha wa tsaka swinene hi swilo swin’wana ni swin’wana leswi u kotaka ku swi endla hi moya-xiviri wa wena hinkwawo entirhweni wakwe. (Mat. 13:23) Wa swi vona leswaku u yima na yena hi ku tshembeka ni leswaku u tikarhata hi matimba leswaku u va muhuweleri la tshembekaka la lwelaka leswaku ku nga heli n’hweti a nga wu tirhisanga nkarhi lowu a nga na wona leswaku a nyikela vumbhoni. Kumbexana u nga endla nhluvuko hi ku antswisa vutshila bya wena byo nyikela vumbhoni, u tikarhatela ku va muchumayeri ni mudyondzisi lonene wa mahungu lamanene.—1 Tim. 4:16.

¹² Leswi “siku le’rikulu, le’ri tšhav̌isaka ra [Yehovha]” ri nga kusuhi, hi fanele hi wu tirhisa hi vutlharhi nkarhi lowu saleke leswaku hi ta kota ku heta ntirho lowu hi nyikiweke wona. (Yuw. 2:31) Sathana wa swi tiva leswaku nkarhi wakwe i wutsongo swinene ku tlula leswi a wu ri xiswona eku sunguleni, u ringeta hi tindlela hinkwato leswaku a pfuxa swiphiqo evuton’wini bya hina ni ku endla leswaku swi hi tikela ku yisa nyingiso eka swilo swa nkoka swinene. (Filp. 1:10; Nhlav. 12:12) U nga yi tekeli hansi ndlela leyi Xikwembu xi ku rhandzaka ha yona. Yehovha a nga ku pfuna leswaku u olovisa vutomi bya wena ni leswaku u tikarhata swinene evutirhelini. (Ps. 145:16) Lexi tsakisaka, vanhu vo tala lava tlheleke va kambisisa swiyimo swa vona, va kume leswaku va nga swi kota ku nghenela vuphayona bya nkarhinyana kumbe bya nkarhi hinkwawo. Entiyisweni, maphayona ma kuma ku eneriseka lokukulu hi ku tirhisa nkarhi wa wona hi vutlharhi. Xana u nga va un’wana wa vona?