Hi Dyondzisiwa Hi Yehovha

¹ Hi ku kongomisiwa hi Xikwembu, ku ni nongonoko wo dyondzisa emisaveni hinkwayo lowu endliwaka ematikweni ya 233. Ku hava lexi misava leyi yi nga na xona lexi nga ringanisiwaka ni dyondzo leyi. Yehovha, Mudyondzisi wa hina Lonkulu, wa hi dyondzisa sweswi leswaku hi vuyeriwa ni ku fanelekela vutomi lebyi nga heriki.—Esa. 30:20; 48:17.

² Swikolo Swa Dyondzo Ya Xikwembu: Anakanya hi swikolo leswi sweswi swi nga kona swo vuyerisa vanhu va Yehovha. Xikolo xa Vutirheli bya le Tilweni, lexi nga kona vhiki na vhiki emavandlheni ya kwalomu ka 87 000, xi letela vahuweleri va Mfumo va timiliyoni leswaku va va vatirheli lava humelelaka va mahungu lamanene. Xana u tsarisile eka xona? Xana a wu ri un’wana wa vanhu va magidi lava veke kona eka Xikolo xa Ntirho wa Vuphayona xa mavhiki mambirhi? Kumbexana ku hungutiwa ka tiawara ta maphayona ku ta pfuna vo tala leswaku va phayona ni ku fanelekela ku va kona exikolweni lexi. Xikolo xa Ndzetelo wa Vutirheli xa tin’hweti timbirhi, lexi sweswi xi fambisiwaka hi tindzimi-nkulu emisaveni hinkwayo, xi hlomisa vakulu ni malandza ya vutirheli leswaku va byarha vutihlamuleri lebyikulu bya swa le tilweni. Nkarhi na nkarhi, vakulu ni malandza ya vutirheli hinkwavo va kuma ndzetelo wo hlawuleka eXikolweni xa Vutirheli bya Mfumo.

³ Miako ya Ntsindza wa Dyondzo wa Watchtower leyi nga ePatterson, le New York, yi ni swikolo swinharhu swo hlawuleka leswi tirhiseriwaka ku nyikela ndzetelo wa xiyimo xa le henhla wa swa le tilweni. Khoso ya ntlhanu wa tin’hweti ya Xikolo xa Bibele xa Gilead xa Watchtower yi pfuna vatirheli leswaku va lunghekela ntirho wa vurhumiwa ensin’wini ya matiko mambe. Swirho swa Komiti ya Rhavi leswi humaka emisaveni hinkwayo swi nghena khoso ya tin’hweti timbirhi ya mayelana ni ku fambisiwa ka rhavi. Hi May 1999 khoso leyintshwa ya tin’hweti timbirhi ya valanguteri lava famba-fambaka yi sunguriwe yi ri ni swichudeni swa 48 leswi humaka United States na Canada. Eku heteleleni hinkwawo malandza ya Yehovha ma kuma vuyelo lebyinene bya ndzetelo lowu Yehovha a wu nyikelaka hi ku tirhisa swikolo leswi swo hambana-hambana.

⁴ Xikongomelo Xa Ku Dyondzisiwa Loku Hi Xihi? Xirho xa Huvo leyi Fumaka xi te: “Dyondzo ya hina ya sweswi yi endleriwe ku pfuna vanhu va Yehovha hinkwavo etindhawini hinkwato leswaku va fikelela xiyimo lexinene xa ku wupfa lexi hlamuseriwaka eka Swivuriso 1:1-4.” Onge Yehovha a nga hambeta a nyika un’wana ni un’wana wa hina “ririmi ra lava dyondzisiweke.”—Esa. 50:4, NW.