Xana Timbhoni Ta Yehovha Ti Leteriwa Njhani Eka Ntirho Wa Tona Wo Chumayela?
Timbhoni ta Yehovha ti kuma ndzetelo wa ndlela leyi ti faneleke ti hanya hayona tanihi Vakreste ku katsa ni le ka ntirho wa tona wo chumayela. Ntirho lowu hi lowu Yesu a leriseke valandzeri va yena leswaku va wu endla ku nga ku chumayela ni ku dyondzisa mahungu lamanene ya Mfumo wa Xikwembu. (Matewu 24:14; 28:19, 20) Ndzetelo lowu hi wu kuma eka tinhlengeletano ta vhiki ni vhiki ni le ka tinhlengeletano leti hi tikhomaka lembe ni lembe ta muganga ni ta xifundzha. Timbhoni ta Yehovha leti ti nga ni vutihlamuleri byo karhi eVandlheni kumbe enhlanganweni ti kuma ndzetelo lowu engetelekeke eka swikolo swa Bibele swo hlawuleka.
Leswi nga eka nhlokomhaka leyi
I ndzetelo wihi lowu Timbhoni ta Yehovha ti wu kumaka?
Tinhlengeletano ta vandlha. Vhiki ni vhiki hi khoma tinhlengeletano timbirhi etindhawini ta hina to gandzela eka tona leti vitaniwaka Tiholo ta Mfumo. Nhlengeletano yin’we hi ntolovelo yi khomiwa exikarhi ka vhiki kasi leyin’wana hi mahelovhiki. Vanhu hinkwavo va amukelekile eka tinhlengeletano leti naswona i mahala.
Tinhlengeletano ta le xikarhi ka vhiki. Hi kuma nkongomiso wo kota ku hlaya kahle, ndlela yo kota ku sungula mabulo, ku kota ku vulavula erivaleni, ku chumayela ni ku dyondzisa. Eka ndzetelo lowu, ku tirhisiwa mivulavulo, mabulo lama katsaka vayingiseri, mikombiso na tivhidiyo. Ndzetelo lowu wu hi pfuna leswaku hi kota ku avelana ni van’wana rungula ra le Bibeleni hi ndlela leyi humelelaka ni ku kota ku va ni dyondzo ya Bibele ni lava va swi tsakelaka. Hinkwavo lava va vaka kona eka tinhlengeletano va vuyeriwa hi ndzetelo lowu. Ku tlula kwalaho, tinhlengeletano ta hina ti tiyisa ripfumelo, rirhandzu ra hina eka Xikwembu ku katsa ni le ka vapfumerikulorhi.
Tinhlengeletano ta mahelovhiki. Nhlengeletano leyi yi aviwe hi swiphemu swimbirhi laha xo sungula ku nga mbulavulo wa Bibele lowu wu lunghiseleriweke vanhu hinkwavo. Xiyenge xa vumbirhi xa tinhlengeletano leti xi katsa dyondzo ya Xihondzo xo Rindzaa leyi yi nga ni swivutiso ni tinhlamulo. Eka dyondzo leyi ku buriwa hi nhlokomhaka leyi sekeriweke eBibeleni laha hi dyondzaka hi milawu leyi yi hi pfunaka eka ntirho wo chumayela ni le ka vutomi bya siku ni siku.
Tinhlengeletano ta muganga ni ta xifundzha. Lembe ni lembe hi va ni tinhlengeletano tinharhu letikulu, ha yin’we ya tona ku va ku hlangane vanhu vo huma emavandlheni yo hambanahambana. Tinhlengeletano leti, leti tsakisaka ti dzika eka nhlokomhaka yo karhi leyi humaka eBibeleni, yi katsa mivulavulo, mikombiso yo koma, mivulavurisano ni tivhidiyo. Ku fana ni tinhlengeletano ta hina ta vandlha, tinhlengeletano ta muganga ni ta xifundzha na tona ti kurisa vutivi bya hina hi Bibele naswona ti hi pfuna ku antswisa eka ntirho wa hina wo chumayela mahungu lamanene. Ni le ka tona munhu un’wana ni un’wana wa amukeleka naswona ku nghena i mahala.
Swikolo swa Bibele swa Timbhoni ta Yehovha
Van’wana va Timbhoni ta Yehovha va rhambiwa leswaku va va kona eka swikolo swo hambanahambana swa Bibele leswaku va ya kuma ndzetelo lowu engetelekeke. Xana hi swihi swikolo swa kona? Hi xihi xikongomelo xa swona naswona swi teka nkarhi wo tanihi kwihi? I va mani va nga ya ka eka swona?
Xikolo xa Ntirho wa Vuphayona
Xikongomelo: I ku letela vachumayeri va nkarhi hinkwawo lava vitaniwaka maphayonab leswaku va wu endla hi ndlela leyi humelelaka ntirho wa vona wo chumayela ni wa ku dyondzisa. Ndzetelo lowu wu katsa ku burisana, mikombiso yo koma ni mimbulavulo.
Nkarhi: Masiku ya tsevu.
Lava Va Rhambiwaka: Hi lava va nga ni lembe rin’we va ri maphayona ya nkarhi hinkwawo. Ku nga tlhela ku rhambiwa na maphayona ya nkarhi hinkwawo lama ma heteke ntlhanu wa malembe ma nga si ya exikolweni.
Xikolo xa Vachumayeri va Mfumo
Xikongomelo: I ku nyika vachumayeri va nkarhi hinkwawo lava nga ni ntokoto ndzetelo wo hlawuleka. Swichudeni swi ya emahlweni swi kurisa vutshila bya swona bya ku chumayela ni ku dyondzisa naswona va dyondza tinhlokomhaka ta Bibele hi vuenti. Swichudeni swo tala leswi thwaseke swa rhambiwa leswaku swi ya laha ku nga ni xilaveko xa vachumayeri.
Nkarhi: Tin’hweti timbirhi.
Lava Va Rhambiwaka: Maphayona ma nga endla swikombelo loko ma faneleka naswona swiyimo swa vona swi va pfumelela ku ya tirha laha ku nga ni xilaveko kona.
Xikolo Xa Vakulu
Xikongomelo: I ku pfuna vakuluc leswaku va hetisisa vutihlamuleri bya vona evandlheni byo tanihi ku dyondzisa, ku risa ni ku tiyisa vuxaka bya vona na Xikwembu ni vapfumerikulorhi.—1 Petro 5:2, 3.
Nkarhi: Masiku ya ntlhanu.
Lava Va Rhambiwaka: Ku rhambiwa vakulu lava va ha ku hlawuriwaka ku katsa ni vakulu lava va nga ni ntokoto lava nga heta malembe ya ntlhanu va nga si ya exikolweni.
Xikolo xa Valanguteri va Miganga ni Vasati va Vona
Xikongomelo: I ku letela valanguteri lava fambafambaka lava vitaniwaka valanguteri va migangad leswaku va hetisisa vutihlamuleri bya vona hi ndlela leyi humelelaka. (1 Timotiya 5:17) Ndzetelo lowu wu tlhela wu pfuna vakulu lava nga Vakreste ni vasati va vona leswaku va kuma vutivi lebyi enteke bya Matsalwa.
Nkarhi: N’hweti yin’we.
Lava Va Rhambiwaka: Ku rhambiwa lava va ha ku vaka valanguteri ni vasati va vona leswaku va ya exikolweni endzhaku ka loko va hete lembe eka xiavelo xa vona. Endzhaku ka sweswo va rhambiwa nakambe endzhaku ka malembe man’wana ni man’wana ya ntlhanu.
Xikolo Xa Vutirheli Bya Mfumo
Xikongomelo: I ku pfuna vakulu ni malandza ya vutirhelie leswaku va hetisisa vutihlamuleri bya vona evandlheni va ri ni langutelo ra swiendlakalo swa nkarhi wolowo ni swilaveko swa kona. (2 Timotiya 3:1) Xikolo xi khomiwa endzhaku ka malembe ma nga ri mangani.
Nkarhi: Mikarhi yi nga hambana kambe xi tala ku khomiwa siku rin’we.
Lava Va Rhambiwaka: Valanguteri va miganga, vakulu ni malandza ya vutirheli.
Xikolo Xa Ntirho Wa Le Bethele
Xikongomelo: I ku pfuna swirho swa ndyangu wa Bethelef leswaku swi humelela eka ntirho wa swona ni ku kurisa vuxaka bya swona ni Xikwembu swin’we ni vamakwavo.
Nkarhi: Masiku ya ntlhanu ni hafu.
Lava Va Rhambiwaka: Lava ku nga khale va ri eBethele naswona va heteke malembe ya ntlhanu va nga si ya exikolweni va nga rhambiwa nakambe.
Xikolo xa Bibele xa Gilead xa Watchtower
Xikongomelo: I ku pfuna swichudeni leswaku swi ya swi ri tlangela swinene Rito ra Xikwembu le ri tsariweke ku nga Bibele, ni ku swi pfuna leswaku swi tirhisa leswi swi swi dyondzaka. (1 Vatesalonika 2:13) Vakreste lava vo tshembeka lava va yaka eGiliyadi va va mpfuno lowukulu eka nhlangano wa Yehovha ni le ka ntirho wa misava hinkwayo wa ku dyondzisa Bibele. Lava va thwasaka va nga rhumeriwa ku ya chumayela kumbe ku ya tirha erhavini, ku nga ha va etikweni ra ka vona kumbe etikweni rin’wana.
Nkarhi: Tin’hweti ta ntlhanu.
Lava Va Rhambiwaka: Hofisi ya rhavi yi rhamba vatirhi va nkarhi hinkwawo lava hlawuriweke leswaku va endla swikombelo. Xikolo xi khomeriwa eUnited States eNtsindza wa Dyondzo ya Watchtower ePatterson le New York.
Xikolo xa Swirho swa Komiti ya Rhavi ni Vasati va Vona
Xikongomelo: I ku letela swirho swa Komitig ya Rhavi leswaku swi langutela ntirho lowu endliwaka ehofisini ya rhavi ni migingiriko hinkwayo ya Timbhoni ta Yehovha laha tikweni ni matiko hinkwawo lama languteriwaka hi hofisi ya rhavi.
Nkarhi: Tin’weti timbirhi.
Lava Va Rhambiwaka: Ntsindza wa Misava hinkwayo wa Timbhoni ta Yehovha wu rhamba swirho swa Komiti ya Rhavi ni vasati va swona leswaku swi ya exikolweni lexi xi khomiwaka eNtsindza wa Dyondzo ya Watchtower ePatterson le New York.
Xana ndzetelo lowu Timbhoni ti wu kumaka wu huma kwihi?
Bibele hi yona xitirhisiwa lexikulu lexi xi tirhisiwaka eka vuleteri lebyi Timbhoni ta Yehovha ti byi kumaka. Hi pfumela leswaku Bibele yi huhuteriwe hi Xikwembu naswona yi ni nkongomiso lowunene wa mahanyelo hinkwawo ya Vakreste.—2 Timotiya 3:16, 17.
Xana Timbhoni ta Yehovha ta hakela leswaku ti leteriwa?
A swi tano. Ndzetelo wu kumiwa mahala, mitirho hinkwayo ya Timbhoni ta Yehovha yi seketeriwa hi minyikelo ya ku tirhandzela.—2 Vakorinto 9:7.
a Bibele ni switirhisiwa swo pfuneta ku dyondza Bibele leswi swi katsaka tivhidiyo swa kumeka eka website ya hina ya jw.org.
b Phayona i Mbhoni leyi khuvuriweke leyi nga xikombiso lexinene, ku nga va wa xinuna kumbe wa xisati loyi a tsakelaka ku heta tiawara to karhi hi n’hweti a ri karhi a rungulela van’wana mahungu lamanene lama humaka eBibeleni.
c Vakulu i vavanuna lava nga Vakreste lava nga ni vuxaka lebyinene ni Xikwembu, ntirho wa vona i ku dyondzisa, ku pfuna niku khutaza vanhu va Yehovha hiku tirhisa Matsalwa. Ava hakeriwi loko va endla ntirho lowu.
d Mulanguteri wa muganga i mutirhi wa nkarhi hinkwawo loyi a endzelaka mavandlha yo hambanahambana vhiki rin’wana ni rin’wana. U khutaza lava va nga emavandlheni hi ku tirhisa mivulavulo leyi humaka eBibeleni ni ku tirha na vona entirhweni wo chumayela.
e Malandza ya vutirheli ya pfuneta hi mitirho yo hambanahambana evandlheni, sweswo swi nyika vakulu nkarhi lowu engetelekeke wa ku dyondzisa ni wa vurisi.
f Bethele i vito leri tirhisiwaka ku vitana hofisi ya rhavi ya Timbhoni ta Yehovha. Vatirhi va nkarhi hinkwawo lava va tirhaka kwalaho va seketela mitirho hinkwayo ya Timbhoni ta Yehovha ya ndhawu yoleyo.
g Komiti ya Rhavi yi vumbiwa hi swirho swinharhu kumbe ku tlula swa vavanuna lava va nga ni vuxaka lebyinene ni Xikwembu.