Xana U Tikarhatela Ku Kuma Dyondzo Leyi Humaka Eka Yehovha?

1. Xana Yehovha u yi teka njhani dyondzo?

¹ Yehovha, ‘Muleteri wa hina Lonkulu,’ u lava leswaku hi dyondzeka. (Esa. 30:20) U sungule ku dyondzisa endzhaku ka loko a tumbuluxe N’wana wakwe wa mativula. (Yoh. 8:28) Endzhaku ka loko Adamu a xandzukile, Yehovha a nga tshikanga ku dyondzisa kambe hikwalaho ka rirhandzu rakwe u nyike vanhu lava nga hetisekangiki swiletelo.—Esa. 48:17, 18; 2 Tim. 3:14, 15.

2. Hi wihi nongonoko wo dyondzisa lowu endliwaka sweswi?

² Namuntlha, Yehovha u kongomisa nongonoko wo dyondzisa lowu nga si tshamaka wu va kona ematin’wini. Hilaha Esaya a profeteke hakona, timiliyoni ta vanhu emisaveni hinkwayo ti khitikanela ‘entshaveni ya yindlu ya Yehovha’ yo fanekisela. (Esa. 2:2) Ha yini hi fanele hi ya entshaveni ya yindlu ya Yehovha? Leswaku Yehovha a ta hi dyondzisa tindlela takwe! (Esa. 2:3) Hi lembe ra ntirho ra 2010, Timbhoni ta Yehovha ti hete tiawara to tlula 1,6 wa tibiliyoni ti ri karhi ti chumayela ni ku dyondzisa vanhu ntiyiso wa Bibele. Ku engetela kwalaho, vhiki rin’wana ni rin’wana mavandlha yo tlula 105 000 emisaveni hinkwayo ma leteriwa hi tlhelo ra moya naswona hlonga ro tshembeka ni ro tlhariha ri humesa minkandziyiso ya Vukreste leyi dyondzisaka hi tindzimi to tlula 500.

3. Xana u vuyeriwe njhani eka dyondzo leyi nyikeriwaka hi Yehovha?

³ Vuyeriwa Hi Xitalo: Dyondzo ya Xikwembu yi hi vuyerise swinene! Hi dyondze leswaku Xikwembu xi ni vito nileswaku xa hi khathalela. (Ps. 83:18; 1 Pet. 5:6, 7) Hi kume tinhlamulo ta swivutiso swin’wana swa nkoka swinene evuton’wini, swo tanihi leswi nge: Ha yini vanhu va xaniseka va tlhela va fa? Xana ndzi nga wu kuma njhani ntsako wa xiviri? Hi xihi xikongomelo xa vutomi? Yehovha u tlhele a hi nyika milawu leyi hi faneleke hi hanya ha yona, leyi hi pfunaka leswaku ‘ndlela ya hina yi humelela.’—Yox. 1:8.

4. Hi swihi swikolo swin’wana leswi malandza ya Xikwembu ma nga yaka eka swona naswona ha yini hi fanele hi tikarhatela ku kuma dyondzo leyi humaka eka Yehovha?

⁴ Ku tlula kwalaho, Yehovha u hlele swikolo swo hlawuleka leswaku a pfuna malandza ya yena hinkwawo leswaku ma ndlandlamuxa ntirho lowu ma n’wi endlelaka wona. Eka matluka 4-6 ku xaxametiwe swikolo leswi van’wana va nga yaka eka swona. Hambiloko swiyimo swa hina swi nga hi pfumeleli ku ya eswikolweni sweswo, xana ha tikarhata leswaku hi vuyeriwa eka swikolo leswi hi nga ni lunghelo ro ya eka swona? Hakanyingi vantshwa va kuceteriwa hi vadyondzisi exikolweni ni hi vanhu van’wana leswaku va hlongorisa dyondzo ya le henhla ya misava leyi, xana ha va khutaza vantshwa volavo leswaku va tivekela tipakani ta moya leswaku va kuma dyondzo leyi Yehovha a yi nyikelaka, leyi nga ya nkoka swinene ku tlula dyondzo ya misava leyi? Ku tikarhatela ku kuma dyondzo leyi humaka eka Yehovha swi ta hi pfuna leswaku hi tiphina hi vutomi sweswi ni hi vumundzuku lebyi nga heriki.—Ps. 119:105; Yoh. 17:3.

Swikolo Swin’wana Leswi Nga Kona eNhlengeletanweni Ya Yehovha

Titlilasi To Dyondza Ku Hlaya Ni Ku Tsala

• Xikongomelo: Ku dyondzisa vanhu ku hlaya ni ku tsala leswaku va ta kota ku hlaya Bibele ni ku dyondzisa van’wana ntiyiso.

• Nkarhi: Swi ya hi swilaveko swa ndhawu.

• Ndhawu: EHolweni ya Mfumo ya kwalaho.

• Lava Faneleke Va Hlanganyela: Vahuweleri hinkwavo ni vanhu van’wana lava tsakelaka.

• Ndlela Yo Endla Xikombelo: Vakulu va vandlha hi vona lava hlelaka titlilasi leti hi ku ya hi swilaveko swa kwalaho naswona va khutaza hinkwavo lava nga ta vuyeriwa leswaku va hlanganyela.

Xikolo Xa Vutirheli Bya Le Tilweni

• Xikongomelo: Ku letela vahuweleri leswaku va va vachumayeri lava humelelaka ni vadyondzisi va mahungu lamanene.

• Nkarhi: Xi khomiwa vhiki na vhiki.

• Ndhawu: EHolweni ya Mfumo ya kwalaho.

• Lava Faneleke Va Tsarisa: Vahuweleri hinkwavo swin’we ni van’wana lava hlanganyelaka ni vandlha minkarhi hinkwayo, lava pfumelelanaka ni tidyondzo ta Bibele ni lava mahanyelo ya vona ma fambisanaka ni milawu ya Vukreste.

• Ndlela Yo Tsarisa: Vulavula ni mulanguteri wa Xikolo xa Vutirheli bya le Tilweni.

Titlilasi To Dyondza Ririmi Rimbe

• Xikongomelo: Ku dyondzisa vahuweleri ku chumayela mahungu lamanene hi ririmi rin’wana.

• Nkarhi: Tin’hweti ta mune ku ya eka ta ntlhanu. Hakanyingi titlilasi leti ti va kona hi Mugqivela nimixo naswona ti teka awara yin’we kumbe timbirhi.

• Ndhawu: Hakanyingi ti khomeriwa eHolweni ya Mfumo leyi nga ekusuhi.

• Lava Faneleke Va Tsarisa: Vahuweleri lava nga xikombiso lexinene lava navelaka ku chumayela hi ririmi rimbe.

• Ndlela Yo Endla Xikombelo: Loko rhavi ri vona ku ri ni xilaveko ri hlela titlilasi leti.

Ku Akiwa Ka Tiholo Ta Mfumo

• Xikongomelo: Ku aka ni ku pfuxeta Tiholo ta Mfumo. Lexi a hi xikolo, kambe vatirhi va ku tirhandzela va dyondzisiwa mintirho yo hambana-hambana leswaku va ta pfuneta eka matsima yo aka.

• Nkarhi: Hi ku ya hi swiyimo swa mutirhi wa ku tirhandzela.

• Ndhawu: Exifundzheni xin’wana ni xin’wana laha Tikomiti to Aka ta Xifundzha ti averiweke kona. Kumbe u nga va mutirhi wa nkarhi hinkwawo laha ku nga ni xilaveko, swin’we ni Mintlawa yo Aka Tiholo ta Mfumo leyi languteriwaka hi rhavi.

• Leswi Lavekaka: U fanele u va u khuvuriwile naswona u pfumeleriwe hi vakulu. U nga ha va u tiva ntirho kumbe u nga wu tivi.

• Ndlela Yo Endla Xikombelo: Tata fomo ya Kingdom Hall Volunteer Worker Questionnaire (S-82) leyi u nga yi kumaka eka vakulu leswaku u ta tirha ni Komiti yo Aka ya Xifundzha.Tata fomo leyi nge Application for Kingdom Hall Construction Volunteer Program (A-25) loko u ta swi kota ku pfuneta ku ringana n’hweti kumbe ku tlula.

Xikolo Xa Ntirho Wa Vuphayona

• Xikongomelo: Ku pfuna maphayona leswaku ma ‘hetisisa vutirheli bya wona.’—2 Tim. 4:5.

• Nkarhi: Mavhiki mambirhi.

• Ndhawu: Rhavi hi rona ri xi hlelaka; naswona xi tala ku khomeriwa eHolweni ya Mfumo leyi nga ekusuhi.

• Leswi Lavekaka: U fanele u va u ri ni lembe u ri phayona ra nkarhi hinkwawo.

• Ndlela Yo Endla Xikombelo: Maphayona lama fanelekaka ma rhambiwa hi mulanguteri wa xifundzha.

Xikolo Xa Lava Ha Ku Fikaka eBethele

• Xikongomelo: Xikolo lexi xi endleriwe ku pfuna lava ha ku fikaka eBethele leswaku va tolovela ntirho wa vona wa le Bethele.

• Nkarhi: Xi teka mavhiki ya 16, xi khomiwa kan’we hi vhiki naswona xi teka awara.

• Ndhawu: EBethele.

• Leswi Lavekaka: U fanele u va u ri xirho xa ndyangu wa Bethele kumbe u ri ni nkarhi wo leha u tirha eBethele kambe u nga tshami kona (u va se u ri ni lembe kumbe ku tlula).

• Ndlela Yo Endla Xikombelo: Xi ngheniwa ntsena hi swirho swa ndyangu wa le Bethele.

Xikolo Xa Vutirheli Bya Mfumo

• Xikongomelo: Ku letela vakulu ni malandza ya vutirheli leswaku va hetisisa vutihlamuleri lebyi nhlengeletano yi va byarhiseke byona. (Mint. 20:28) Xikolo lexi xi va kona endzhaku ka malembe yo hlayanyana hi ku ya hilaha Huvo leyi Fumaka yi hleleke hakona.

• Nkarhi: Emalembeni ya sweswi xi teka siku ni hafu eka vakulu kasi eka malandza ya vutirheli xi teka siku rin’we.

• Ndhawu: Hakanyingi xi khomeriwa eHolweni ya Mfumo ya le kusuhi kumbe eHolweni ya Tinhlengeletano.

• Leswi Lavekaka: U fanele u va u ri nkulu kumbe nandza wa vutirheli.

• Ndlela Yo Endla Xikombelo: Vakulu ni malandza ya vutirheli va rhambiwa hi mulanguteri wa xifundzha.

Xikolo Xa Vakulua

• Xikongomelo: Ku pfuna vakulu leswaku va hetisisa vutihlamuleri bya vona evandlheni.

• Nkarhi: Xi teka masiku ya ntlhanu.

• Ndhawu: Yi hlawuriwa hi hofisi ya rhavi; kambe hakanyingi xi khomeriwa eHolweni ya Mfumo kumbe eHolweni ya Tinhlengeletano leyi nga ekusuhi.

• Leswi Lavekaka: U fanele u va u ri nkulu.

• Ndlela Yo Endla Xikombelo: Vakulu lava fanelekaka va rhambiwa hi hofisi ya rhavi.

Xikolo Xa Valanguteri Va Swifundzha Ni Va Miganga Swin’we Ni Vasati Va Vonab

• Xikongomelo: Ku pfuna valanguteri va swifundzha ni va miganga leswaku va hambeta va pfuna mavandlha, va “[tirha] hi matimba eku vulavuleni ni le ku dyondziseni” ni ku ma khathalela.—1 Tim. 5:17; 1 Pet. 5:2, 3.

• Nkarhi: Xi teka tin’hweti timbirhi.

• Ndhawu: Yi hleriwa hi hofisi ya rhavi.

• Leswi Lavekaka: U fanele u va u ri mulanguteri wa xifundzha kumbe wa muganga.

• Ndlela Yo Endla Xikombelo: Valanguteri va swifundzha ni va miganga swin’we ni vasati va vona va rhambiwa hi hofisi ya rhavi.

Xikolo Xa Bibele Xa Vamakwerhu Lava Nga Tekangikic

• Xikongomelo: Ku pfuna vakulu ni malandza ya vutirheli lama nga tekangiki leswaku va byarha vutihlamuleri lebyi engetelekeke. Vo tala va vona va averiwa ku ya tirha laha ku nga ni xilaveko lexikulu etikweni ra rikwavo. Kambe van’wana va nga ha averiwa ku ya tirha ematikweni man’wana loko va ta swi kota.

• Nkarhi: Xi teka tin’hweti timbirhi.

• Ndhawu: Yi hlawuriwa hi hofisi ya rhavi; kambe hakanyingi xi khomeriwa eHolweni ya Mfumo kumbe eHolweni ya Tinhlengeletano leyi nga ekusuhi.

• Leswi Lavekaka: Ku laveka vamakwerhu va xinuna lava nga tekangiki lava nga exikarhi ka malembe ya 23 na 62, lava nga ni rihanyo lerinene, lava tsakelaka ku tirhela vamakwerhu naswona va tiyimiseleke ku khathalela timhaka ta Mfumo kun’wana ni kun’wana laha ku nga ni xilaveko. (Mar. 10:29, 30) Va fanele va va va ri ni malembe mambirhi va tirha tanihi vakulu kumbe malandza ya vutirheli.

• Ndlela Yo Endla Xikombelo: Loko xikolo lexi xi ri kona erhavini ra ka n’wina, ku ta va ni nhlangano wa lava tsakelaka ku ya eka xona enhlengeletanweni ya xifundzha. Rungula leri engetelekeke ri ta nyikeriwa eka nhlangano wolowo.

Xikolo Xa Bibele Xa Mimpatswa Leyi Nga Vakrested

• Xikongomelo: Ku nyika mimpatswa leyi tekaneke vuleteri byo hlawuleka leswaku yi ta tirhisiwa swinene hi Yehovha ni hi nhlengeletano yakwe. Yo tala ya yona yi averiwa ku ya tirha laha ku nga ni xilaveko lexikulu etikweni ra rikwavo. Kambe yin’wana yi nga ha averiwa ku ya tirha ematikweni man’wana loko yi ta swi kota.

• Nkarhi: Xi teka tin’hweti timbirhi.

• Ndhawu: Titlilasi ti nga ri tingani to sungula ti khomeriwa eNtsindza wa Dyondzo wa Watchtower ePatterson, leyi nga eNew York le U.S.A. Endzhaku ka tona, xikolo lexi xi ta va kona etindhawini tin’wana leti nga ta hleriwa hi hofisi ya rhavi, kambe xi nga ha khomeriwa eHolweni ya Tinhlengeletano kumbe eHolweni ya Mfumo.

• Leswi Lavekaka: Ku laveka mimpatswa leyi tekaneke leyi nga exikarhi ka malembe ya 25 na 50, leyi nga ni rihanyo lerinene, leyi swiyimo swa yona swi yi pfumelelaka ku ya tirha kun’wana ni kun’wana laha ku nga ni xilaveko naswona yi tiyimiseleke ku landzela marito lama nge: “Hi mina loyi! Ndzi rhume.” (Esa. 6:8) Ku engetela kwalaho, yi fanele yi va yi ri ni malembe mambirhi yi catile naswona yi ri ni malembe mambirhi yi ri entirhweni wa nkarhi hinkwawo handle ko kavanyetiwa.

• Ndlela Yo Endla Xikombelo: Loko xikolo lexi xi ri kona erhavini ra ka n’wina, ku ta va ni nhlangano wa lava tsakelaka ku ya eka xona enhlengeletanweni ya siku ro hlawuleka. Rungula leri engetelekeke ri ta nyikeriwa eka nhlangano wolowo.

Xikolo Xa Bibele Xa Giliyadi Xa Watchtower

• Xikongomelo: Ku letela maphayona ni malandza man’wana lama nga entirhweni wa nkarhi hinkwawo leswaku ma ta va varhumiwa.

• Nkarhi: Xi teka tin’hweti ta ntlhanu.

• Ndhawu: Xi khomeriwa eNtsindza wa Dyondzo wa Watchtower ePatterson leyi nga eNew York le U.S.A.

• Leswi Lavekaka: Ku laveka mimpatswa leyi tekaneke leyi se yi nga ni malembe manharhu yi khuvuriwile naswona loko yi endla xikombelo xa yona xo sungula yi va yi ri exikarhi ka malembe ya 21 na 38. Yi fanele yi vulavula Xinghezi, yi va yi ri ni malembe mambirhi yi tekanile naswona yi ri ni malembe mambirhi yi ri entirhweni wa nkarhi hinkwawo handle ko kavanyetiwa. Yi fanele yi va yi ri ni rihanyo lerinene. Maphayona lama tirhaka ematikweni mambe (ku katsa ni vurhumiwa); valanguteri va miganga ni va swifundzha; swirho swa ndyangu wa Bethele; mathwasana ya Xikolo xa Ndzetelo wa Vutirheli lexi sweswi xi vuriwaka Xikolo xa Bibele xa Vamakwerhu lava nga Tekangiki ni lama yeke eXikolweni xa Bibele xa Mimpatswa leyi nga Vakreste va nga endla swikombelo loko va swi fikelela swilaveko swa kona.

• Ndlela Yo Endla Xikombelo: Emarhavini lama hlawuriweke, nhlangano wa lava tsakelaka ku ya exikolweni lexi wu khomiwa entsombanweni wa muganga. Rungula leri engetelekeke ri kumeka eka nhlangano lowu. Loko nhlangano lowu wu nga khomiwi etikweni ra rikwavo naswona u tsakela ku endla xikombelo, u nga tsalela hofisi ya rhavi ra ka n’wina leswaku u kuma rungula leri engetelekeke.

Xikolo Xa Swirho Swa Komiti Ya Rhavi Ni Vasati Va Swona

• Xikongomelo: Ku pfuna swirho swa Komiti ya Rhavi leswaku swi ma khathalela kahle makaya ya Bethele, swi khathalela swilaveko swa mavandlha, swi langutela swifundzha ni miganga leyi nga ensin’wini ya swona ni ku langutela ntirho wo hundzuluxela, wo kandziyisa ni ku rhumela minkandziyiso naswona swi tlhela swi langutela tindzawulo to hambana-hambana.—Luka 12:48b.

• Nkarhi: Xi teka tin’hweti timbirhi.

• Ndhawu: Xi khomeriwa eNtsindza wa Dyondzo wa Watchtower, ePatterson, leyi nga eNew York le U.S.A.

• Timfanelo: U fanele u va u ri xirho xa Komiti ya Rhavi kumbe xirho xa Komiti ya Tiko.

• Ndlela Yo Endla Xikombelo: Vamakwerhu lava fanelekaka swin’we ni vasati va vona va kuma swirhambo ku suka eka Huvo leyi Fumaka.

[Tinhlamuselo ta le hansi]