Hi Chumayela Mahungu Lamanene
1 Mayana lunghelo leri hi nga na rona ra ku va vabyarhi va “mahungu lamanene ya swilo leswinene!” (Rhom. 10:15) Hi ni rungula leri phyuphyisaka leri hi faneleke hi ri byela vanhu lava vonaka maxangu, lava heleriweke hi ntshembo. Xana hi nga va pfuna njhani va xiya leswaku hi ni “mahungu lamanene ya leswo antswa”?—Esa. 52:7.
2 Lunghiselela Rungula Leri Akaka: Mabulo ya hina evutirhelini, ma ta pfuna swinene loko hi bula hi leswinene. Hikwalaho, loko hi lunghiselela swingheniso swa hina ni loko hi hlamusela buku leyi hi yi fambisaka, hi fanele hi kandziyisa swiyenge leswi akaka. Loko hi byela van’wana ntshembo wa hina lowu sekeriweke eBibeleni, hi ku khorwiseka ni hi ku hiseka, hi nga langutela vuyelo lebyi tsakisaka.—Swiv. 25:11.
3 Hambileswi hi kombisaka ntwela-vusiwana eka vanhu lava phofulaka maxangu lawa va ma vonaka hikwalaho ka swiyimo swa misava leswi nyanyaka ku biha, hi fanele hi va byela ntlhantlho wa swiphiqo swa vanhu, ku nga Mfumo wa Xikwembu. Hambiloko hi vulavula na vona hi ‘siku ra Yehovha ra ku rihisela,’ hi fanele hi va kombisa ni leswaku lawa i “mahungu lamanene eka lavo rhula.” (Esa. 61:1, 2) Hi nga va tiyisa nhlana vayingiseri va hina hi ku va byela leswaku, hinkwaswo leswi Yehovha a swi endlaka, eku heteleleni swi ta tisela vanhu ntsako lowukulu ni vuyelo lebyi tsakisaka.
4 Dyondzisa Ntiyiso Hi Ntsako Wa Xiviri: Loko vanhu va vona ntsako eswikandzeni swa hina ni loko hi vulavula hi ku khorwiseka, hakanyingi va swi tsakela ku rhiya ndleve. Loko hi kombisa leswaku hi ni langutelo lerinene, vayingiseri va ta swi vona leswaku ha ‘tsaka hi ntshembo.’ (Rhom. 12:12) Xisweswo, swi nga ha endleka va kombisa ku tsakela mahungu lamanene. Entiyisweni, hi ni xivangelo lexinene xa ku tshama hi ri ni langutelo lerinene ni ku tsakela xiyenge xin’wana ni xin’wana xa vutirheli bya hina.
5 Tanihi vatirheli va mahungu lamanene, ntirho wa hina a hi ku byeletela vanhu rungula leri hi nga na rona ntsena. Ku chumayela ka hina ku nyika vanhu ntshembo lowu tiyeke wa vutomi byo antswa sweswi kun’we ni le nkarhini lowu taka. (1 Tim. 4:8) Loko hi burisana ni munhu un’wana ni un’wana, langutelo ra hina lerinene ri ta kombisiwa hi leswi hi swi vulaka naswona ri ta pfuna vanhu leswaku va amukela mahungu lamanene. A hi nyikeleni nyingiso eka leswi hi swi vulaka ni ndlela leyi hi swi vulaka ha yona, leswaku hi ta pfuna vanhu va timbilu letinene va amukela mahungu lamanene yo tsakisa lawa hi ma chumayelaka!