Tekelela Yehovha ‘Xikwembu Xa Hina Lexi Tsakeke’
1 Hakunene Yehovha u lava leswaku vanhu va tsaka. Rito ra Yena ri hi endla hi yi langutela hi mahlo-ngati mikateko leyo hlamarisa leyi a hi vekeleke yona. (Esa. 65:21-25) Vanhu va fanele va swi vona leswaku hi tsakela ku va byela “mahungu lamanene lama vangamaka ya Xikwembu lexi tsakeke.” (1 Tim. 1:11) Ndlela leyi hi vulavulaka hi rungula ra Mfumo ha yona yi fanele yi kombisa leswaku ha wu rhandza ntiyiso nileswaku ha va tsakela vanhu lava hi vulavulaka na vona.—Rhom. 1:14-16.
2 I ntiyiso leswaku minkarhi yin’wana swa tikanyana ku tshama hi tsakile. Emasin’wini man’wana a hi kumi vanhu vo tala lava angulaka kahle eka rungula ra Mfumo. Masiku man’wana hi nga ha va hi karhatiwa hi swiphiqo swa hina vini. Kutani leswaku hi tshama hi tsakile, hi fanele hi ehleketa ndlela leyi swi nga swa nkoka ha yona leswaku vanhu va le nsin’wini ya hina va twa ni ku twisisa mahungu lamanene ya Mfumo lawa hi ma chumayelaka. (Rhom. 10:13, 14, 17) Ku anakanyisa hi mhaka leyi swi ta hi pfuna leswaku hi hambeta hi ma twarisa hi ntsako malunghiselelo ya Yehovha ya musa yo ponisa vanhu.
3 Vulavula Ngopfu Hi Swilo Leswinene Leswa Ha Taka: Nakambe hi fanele hi xiya leswi hi swi vulaka. Hambileswi hi nga ha sungulaka bulo hi ku boxa xiphiqo kumbe leswi hi swi tweke emahungwini leswi karhataka vanhu, hi fanele hi papalata ku dzika ngopfu etimhakeni to vava. Ntirho wa hina i ku twarisa “mahungu lamanene ya leswo antswa.” (Esa. 52:7; Rhom. 10:15) Mahungu lawa lamanene i rungula leri sekeriweke eswitshembisweni swa Xikwembu swa vumundzuku lebyinene. (2 Pet. 3:13) Loko u ri karhi u ehleketa hi switshembiso sweswo, tirhisa Matsalwa leswaku u “bohelela lava vavisekeke mbilu.” (Esa. 61:1, 2) Leswi swi ta pfuna un’wana ni un’wana wa hina leswaku a tshama a tsakile ni ku va ni langutelo lerinene.
4 A swi kanakanisi leswaku vanhu va ta wu vona ntsako lowu hi nga na wona loko hi ri karhi hi chumayela. Hikwalaho, minkarhi hinkwayo a hi veni ni mfanelo leyi ya Yehovha ‘Xikwembu xa hina lexi tsakeke’ loko hi ri karhi hi chumayela mahungu lamanene ya Mfumo eka vanhu va le nsin’wini ya hina.