Kombela Mpfuno
1 Marito lama huhuteriweke lama nge, “minkarhi leyi swi nonon’hwaka ku langutana na yona” ma yi hlamusela kahle minkarhi ya hina ya mangava. (2 Tim. 3:1) Hikwalaho, xana u ta endla yini loko u langutana ni swiyimo swo tika hi tlhelo ra moya leswi u vonaka onge a wu swi lunghekelanga ku langutana na swona?
2 Xana u tiyimiserile ku vulavula ni xirho xa vandlha lexi wupfeke hi tlhelo ra moya? Van’wana va nga kanakana hikwalaho ka ku khomiwa hi tingana, hi ku ka va nga swi lavi ku tikisela van’wana kumbexana va nga tshembi leswaku u kona loyi a nga va pfunaka. Ina, hi fanele hi tikarhatela ku byarha vutihlamuleri bya hina hilaha hi nga kotaka hakona, kambe nkarhi hinkwawo hi fanele hi ntshunxeka ku kombela mpfuno etimhakeni leti khumbaka vuhlayiseki bya hina bya moya.—Gal. 6:2, 5.
3 Laha U Nga Sungulaka Kona: U nga ha vulavula ni mufambisi wa dyondzo ya buku leyi u nga eka yona ivi u kombela ku tirha na yena ensin’wini. Hi ndlela leyi u ta kuma nkarhi wa ku n’wi phofulela ku navela ka wena ku kula hi tlhelo ra moya. Loko a ri nandza wa vutirheli, n’wi byele leswaku u tsakela ku pfuniwa hi tlhelo ra moya kutani yena u ta kombela vakulu leswaku va ku pfuna. Loko ku ri ni leswi u karhatekaka ha swona, u nga ha vulavula ni un’wana wa vakulu.
4 Xana i mpfuno wa muxaka muni lowu u wu lavaka? Xana ku ni leswi hunguteke ku hiseka ka wena? Xana u mutswari la nga yexe la tikarhatelaka leswaku vana va yena va va ni vuxaka lebyi tiyeke ni vandlha? Xana u mudyuhari loyi a lavaka mpfuno? Kumbexana u ni swiphiqo leswi ku hetaka matimba? Ku langutana ni minkarhi ya hina ya mangava swi nga ha tika swinene—kambe ku nga ri leswaku a swi koteki ku langutana na yona. Mpfuno wu kona.
5 Ndlela Leyi Vakulukumba Va Pfunaka Ha Yona: Vakulu va tiyimisele ku pfuna. Va ta ku lomba tindleve loko u karhatiwe hi swo karhi. Loko vahuweleri van’wana va langutana ni swiphiqo leswi fanaka, vakulu va ta yisa nyingiso wa vona emhakeni leyi loko va ri karhi, va risa vandlha ni ku ri dyondzisa. Tanihi “swikombiso entlhambini,” hi ntsako va tshama va lunghekele ku tirha na wena. (1 Pet. 5:3) Loko u yingisela vamakwerhu lava lava nga ni ntokoto loko va ri karhi va tirhisa misinya ya milawu ya Bibele, swi ta ku pfuna leswaku u antswisa vutirheli bya wena kun’we ni vutomi bya wena.—2 Tim. 3:16, 17.
6 Yesu u hi nyike ‘tinyiko to tala leti nga vanhu.’ (Efe. 4:8) Leswi swi vula leswaku vakulu va lunghekele ku ku pfuna. Va vekeriwe ku pfuna wena. Kahle-kahle, ‘i va wena.’ (1 Kor. 3:21-23) Hikwalaho, tiphofule, u nga vi mafanato. Kombela mpfuno lowu u lavaka wona.