Mikateko Ya Yehovha Ya Hi Fuwisa

¹ Hakanyingi ku humelela ka munhu ku pimiwa hi muholo wakwe. Hi yona mhaka leyi vanhu vo tala va tekaka vanhu lava nga ni mali va ri lava tsakeke ni ku eneriseka ku tlula vanhu hinkwavo. Hambiswiritano, vanhu lava anakanyaka leswaku mali yi nga ku tisela ntsako va hoxisa ngopfu. (Ekl. 5:12) “Lava tiyimiseleke ku fuwa” hi tlhelo ra nyama a va na ntsako lowu tshamaka hi masiku. (1 Tim. 6:9) Ku hambana ni sweswo, malandza ya Yehovha ma tsakile hakunene naswona ma fuwe ku tlula vanhu hinkwavo emisaveni. (Swiv. 10:22; Nhlav. 2:9) Hi ndlela yihi?

² Vumbhoni Bya Rifuwo Ra Hina: Hi ni vutlhari lebyi fuweke hi tlhelo ra moya ni ku twisisa ka Rito ra Xikwembu, ku nga Bibele. Hi ku tirhisa nhlengeletano yakwe ya la misaveni, Yehovha u hambeta a hi dyondzisa ha yena ni N’wana wakwe, leswaku hi vuyeriwa hilaha ku nga heriki. Ku twisisa loku kongomeke ku hi pfuna ku tshinela ekusuhi na Yehovha ni ku va ni vuxaka lebyikulu na yena. (Yak. 4:8) Ku twisisa ku hambana loku nga kona exikarhi ka leswinene ni swo biha ni ku landzela milawu ya Xikwembu swi hi sirhelela eka mavabyi ni makhombo yo karhi. Hi ni ntshembo wa leswaku Yehovha u ta hi wundla, kutani hi eneriseka hi malunghiselelo yakwe ni ku va ni ku rhula ka mianakanyo.—Mat. 6:33.

³ Hi ni ku rhula ni vun’we exikarhi ka vamakwerhu va moya hikuva hi hlakulela mihandzu ya moya wa Xikwembu. Leswi hi hlanganisiweke hi xiboho lexikulu xa rirhandzu, a hi fanelanga hi titwa hi lahliwe hi Xikwembu kumbe hi vamakwerhu loko hi langutane ni makhombo.—Gal. 6:10.

⁴ Vutomi bya hina byi ni xikongomelo xa xiviri. Hi ku teka ku ri lunghelo lerikulu ku hlanganyela eku chumayeleni ka mahungu lamanene emisaveni hinkwayo. Loko hi ri karhi hi pfuna van’wana leswaku va va ni vuxaka lebyinene ni Xikwembu ni leswaku va hlanganyela na hina evugandzerini lebyi tengeke, sweswo swi hi tisela ntsako lowu tshamaka hi masiku. Vutirheli bya hina lebyi nga rifuwo ra risima byi yisa ku dzuneka eka Yehovha ni ku hi tisela ku eneriseka hi ku hoxa xandla eku kwetsimisiweni ka vito ra yena. Hi tshama hi ri ni langutelo lerinene, hi ri karhi hi tiva leswaku ku nga ri khale ntshembo wa hina hi vumundzuku wu ta hetiseka.

⁵ Ku Kombisa Ku Tlangela Ka Hina: Onge hi nga tshama hi ri karhi hi tlangela mikateko ya Yehovha, leyi kunene yi hi endlaka lava fuweke ku tlula vanhu hinkwavo emisaveni. (Swiv. 22:4) Loko siku ni siku hi tinyika nkarhi wa ku anakanyisisa hi leswi hi nga na swona, swi ta hi susumetela ku nkhensa Yehovha hikwalaho ka rirhandzu rakwe lerikulu ni ku hambeta hi gandzela yena ntsena.