Hi Ni Ndzalo Ya Moya Leyi Tlurisaka!

¹ Vunyingi bya vanhu byi navela siku leri byi nga ta ku, “Hi ni ndzalo yo tlurisa!” Emianakanyweni ya vona, siku rolero ri ta fika loko va ri ni swilo swo tala leswi vonakaka, leswi va pfumelelaka ku ‘wisa, va dya, va nwa, va tsaka.’ (Lk. 12:19) Ku hambana ni sweswo, sweswi ha swi kota ku vula leswaku hi tlhelo ra moya, a hi pfumali nchumu lexinene. (Ps. 34:10) Swoleswo swi kotekisa ku yini?

² Swivuriso 10:22 yi vula leswaku “mikateko ya Yehova yi fuwisa munhu.” Hina lava hi kumaka tintswalo toleto ta Xikwembu hi nga vula hi tiyisile leswaku Xikwembu “hi xona xi hi nyikaka hi ntalo swilo hinkwaswo leswaku hi tikorwisa ha swona.” (1 Tim. 6:17) Leswi swi hi endla hi va vanhu lava fuweke ku tlurisa emisaveni!

³ A Hi Tlangeleni Mikateko Leyi Hi Yi Kumaka: Va nga ri vangani va hina va ni ndzalo ya swilo leswi vonakaka. Kambe, ha katekisiwa hikuva a hi vileli ngopfu hi swilaveko swa hina swa siku na siku. Yehovha wa swi tiva swilo leswi hi swi lavaka, naswona u tshembisa ku hi nyika swona. (Mt. 6:31-33) Xitiyisekiso xa yena xi hi nyika ku rhula ka mianakanyo loku nga riki na nxavo hakunene.

⁴ Hambiswiritano, mikateko ya hina ya moya, i yikulu ku tlurisa. Vutomi bya hina byi titshege hi swakudya swa moya leswi humaka eka Yehovha. (Mt. 4:4) Lava va lavaka swakudya swa moya eka swihlovo swa misava va tshama va ri ni ndlala loko hina hi ri karhi hi dya ni ku nwa hi kolwa. (Esa. 65:13) “Nandza la tshembekaka” u hi nyika mphakelo lowu nga heriki wa vutivi lebyi yisaka evuton’wini lebyi nga heriki.—Mt. 24:45; Yoh. 17:3.

⁵ Vumakwerhu bya hina bya risima bya misava hinkwayo byi hi nyika vuxaka bya le kusuhi bya vamakwerhu va xinuna ni va xisati va rirhandzu lava tshamaka eka xiphemu xin’wana ni xin’wana xa misava. (Yoh. 13:35) Vandlha ra hina i xivandla xa ku rhula, laha hi nga kumaka nchavelelo ni ku phyuphya. Vakulu va langutela mimoya-xiviri ya hina, va hi pfuna ku langutana ni minxaka yo tala ya swiphiqo. (Hev. 13:17) Ku va ka hina ekusuhi ni vamakwerhu swi endla leswaku hi khutazana, swi hi tiyisa leswaku hi phikelela.—Rhom. 1:11, 12.

⁶ Ntirho wa hina na wona i nkateko. Mintirho yo tala yo tihanyisa yi heta matimba naswona a yi enerisi. Ku avelana mahungu lamanene ni van’wana swi tisa ntsako eka van’wana ni le ka hina vini. (Mint. 20:35) Ha swi kota ku vona leswinene eka ntirho hinkwawo wa ku tikarhata ka hina.—Ekl. 2:24.

⁷ Ku tlula hinkwaswo, hi na ntshembo lowo hlamarisa hi vumundzuku. (Rhom. 12:12) Hi langute emahlweni eka misava leyintshwa ya ku lulama, laha hi nga ta hanya ni varhandziwa va hina hi ntsako ni ku rhula hilaha ku nga heriki! Ntshembo lowu i rifuwo leri tlulaka yini na yini lexi misava leyi yi nga xi nyikaka.—1 Tim. 6:19.

⁸ Hi Nga Ku Kombisa Njhani Ku Tlangela Ka Hina? A hi nge swi koti ku hakela Yehovha eka leswi a hi endleleke swona. Hi ngo phofula ntsena ku tlangela ka hina hi (1) ku n’wi nkhensa siku na siku hikwalaho ka tintswalo ta yena leti nga fanelangiki (Ef. 5:20), (2) ku kombisa rirhandzu ra hina hi ku yingisa (1 Yoh. 5:3), (3) ku kwetsimisa vito ra yena hi ku chumayela mahungu lamanene (Ps. 83:18), ni (4) hi ku seketela vandlha ra Vukreste hi ntirhisano wa hina hi mbilu hinkwayo.—1 Tim. 3:15.

⁹ Hi ni swivangelo hinkwaswo swo va vanhu lava tsakeke ku tlula hinkwavo emisaveni. (Ps. 144:15b) Onge langutelo ra hina, ku tikhoma ka hina ni ntirho wa hina swi nga kombisa ntsako lowu hi tiphinaka ha wona eparadeyisini ya hina ya moya. Hi ni ndzalo leyi tlurisaka!