Chava Yehovha Siku Ni Siku
1 “Ku chava Yehovha i masungulo ya vutlhari.” (Ps. 111:10) Ku hi susumetela ku endla mintirho leyinene ku tlhela ku hi pfuna ku fularhela swo biha. (Swiv. 16:6) Ku chava loku i ku va ni xichavo lexikulu eka Muvumbi wa hina, lexi hi susumetelaka ku papalata ku n’wi hlundzukisa ni ku nga n’wi yingisi. I nchumu lowu hi faneleke ku wu hlakulela ni ku wu kombisa siku ni siku.—Swiv. 8:13.
2 Siku ni siku moya wa misava ya Sathana wu hi tshikilela swinene leswaku hi pfumelelana ni tindlela ta yona to biha. (Efe. 6:11, 12) Nyama ya hina leyi nga hetisekangiki yi ni xidyoho naswona hi ntumbuluko yi voyamele eku endleni ka leswo biha. (Gal. 5:17) Hikwalaho, loko hi lava ku va lava yingisaka swileriso swa Yehovha, hi va lava tsakeke ni ku kuma vutomi, hi fanele ku n’wi chava siku ni siku.—Det. 10:12, 13.
3 Eka Vaheveru 10:24, 25, hi tsundzuxiwa ku hlengeletana leswaku hi khutazana “hilaha ku engetelekeke ngopfu” eminkarhini leyi hi hanyaka eka yona. I swa nkoka ku va kona eminhlanganweni minkarhi hinkwayo leswaku hi ta pona masiku lawa ya makumu. Ku chava ka hina ku hlundzukisa Xikwembu ku hi susumetela ku va kona eminhlanganweni ni ku yi teka yi ri ya risima swinene. Lava va chavaka Xikwembu va teka ku hlanganyela eminhlanganweni ya Vukreste ku ri lunghelo ra risima.
4 Ndlela yin’wana leyi hi kombisaka leswaku hi chava Xikwembu ha yona i ku yingisa xileriso xa ku chumayela mahungu lamanene ya Mfumo. (Mat. 28:19, 20; Mint. 10:42) Xikongomelo-nkulu xa ntirho wa hina wa ku chumayela i ku pfuna van’wana leswaku va hlakulela ku chava Yehovha ni ku lawuriwa hi ku rhandza ka yena. Sweswo hi swi fikelela hi ku endla maendzo yo vuyela, hi ku lwela ku sungula tidyondzo ta Bibele ta le makaya, kutani hi dyondzisa vanhu van’wana swileriso hinkwaswo swa Xikwembu. Hi ndlela yoleyo hi kombisa leswaku ha n’wi chava Yehovha ni leswaku hi rhandza warikwerhu.—Mat. 22:37-39.
5 Lava va nga xi chaviki Xikwembu va tsandzeka ku hlakulela langutela ra ku tlangela swilo swa moya, kutani va pepetsekisiwa hi moya wa misava lowu dlayaka kumbe mianakanyo yo homboloka. (Efe. 2:2) Onge ku tiyimisela ka hina loku tiyeke ku nga va ku “[endlela] Xikwembu ntirho wo kwetsima . . . hi nchavo lowu nga ni vukwembu ni ku xixima.” (Hev. 12:28) Xisweswo hi ta tshovela mikateko leyi kumiwaka hi lava va chavaka Yehovha siku ni siku.