Fikelela Mbilu Ya Xichudeni Xa Wena
1 Loko Yesu a nga si tlhandlukela etilweni, u byele vadyondzisiwa va yena leswaku va dyondzisa van’wana ku “hlayisa” swilo hinkwaswo leswi a va leriseke swona. (Mat. 28:19, 20) Leswaku munhu a “hlayisa” swileriso swa Kreste, rungula leri a dyondzisiwaka rona ri fanele ku fikelela mbilu ya yena. (Ps. 119:112) Xana u nga yi susumeta njhani mbilu ya munhu loyi u n’wi dyondzisaka Bibele?
2 Khongelela Nkongomiso Wa Yehovha: Ku endla vadyondzisiwa i ntirho lowu humaka eka Xikwembu. Leswaku hi humelela, ku laveka mikateko ya xona, ku nga ri vuswikoti bya hina. (Mint. 16:14; 1 Kor. 3:7) Hikwalaho, i swa nkoka ku khongelela mpfuno wa Yehovha loko hi dyondzisa van’wana ntiyiso.—Esa. 50:4.
3 Twisisa Leswi Xichudeni Xi Swi Pfumelaka: Ku tiva leswi vanhu va swi pfumelaka ni leswaku ha yini va swi pfumela swi nga hi pfula mahlo hi tiva leswi hi nga swi vulaka leswaku hi fikelela timbilu ta vona. Hikwalaho ka yini xichudeni xi rhandza dyondzo yo karhi? I yini lexi xi khorwiseke leswaku i ntiyiso? Vutivi byo tano byi nga hi pfuna leswaku hi vulavula hi ri ni ku twisisa.—Mint. 17:22, 23.
4 Vumba Bulo Leri Twisisekaka Ra Matsalwa: Ntiyiso wu fanele wu twisiseka eka xichudeni. (Mint. 17:24-31) Hi fanele ku nyikela xivangelo lexi twalaka xa ntshembo lowu hi nga na wona. (1 Pet. 3:15) Hambiswiritano, minkarhi hinkwayo endla tano hi ndlela ya musa ni hi ku lehisa mbilu.
5 Dzikisa Dyondzo eMianakanyweni Hi Ku Tirhisa Swifaniso: Swifaniso a swo olovisa matwisiselo ya xichudeni ntsena kambe swi tlhela swi susumeta mintlhaveko. Swi khumba mianakanyo ni mbilu. Yesu u swi tirhise ko tala. (Mar. 4:33, 34) Kambe, leswaku xifaniso xi tirha, xi fanele ku fanelana ni mhaka leyi ku buriwaka ha yona naswona xi fanele xi khumba vutomi bya xichudeni.
6 Kombisa Mimbuyelo Ya Ku Amukela Ntiyiso: Vanhu va lava ku tiva leswaku va ta vuyeriwa hi yini hi ku tirhisa leswi va swi dyondzaka. Pfuna xichudeni xa wena xi vona vutlhari lebyi kumekaka eka marito ya Pawulo eka 2 Timotiya 3:14-17.
7 U nga heli matimba loko vanhu van’wana va nga swi amukeli leswi u swi dyondzisaka. Timbilu ta vanhu van’wana ti tlanyarile. (Mat. 13:15) Hambiswiritano, van’wana va hundzuka va va vapfumeri. (Mint. 17:32-34) Onge matshalatshala ya wena ya ku ringeta ku fikelela timbilu hi mahungu lamanene ma nga pfuna van’wana lava engetelekeke leswaku va amukela ni ku “hlayisa” leswi Yesu a swi leriseke.