Nongonoko Lowuntshwa Wa Nhlengeletano Ya Xifundzha

Nhlamuselo yin’wana ya ku chava i “xichavo lexi enteke, ngopfu-ngopfu eka Xikwembu.” Leswi swi hlamusela ku chava loku faneleke loku Matsalwa ma ku vulaka “masungulo ya vutlhari.” (Ps. 111:10) Hi hala tlhelo, ku ni muxaka wun’wana wa ku chava loku lawulaka misava ya Sathana leyi hi rhendzeleke. Xana hi nga ku papalatisa ku yini ku titwa ko tano ko biha loko hi ri karhi hi hlakulela ku chava Yehovha hi vuenti? Nongonoko lowuntshwa wa nhlengeletano ya xifundzha ya lembe ra ntirho ra 2002 wu ta tlhuvutsa xivutiso lexi. Nhloko-mhaka ya wona yi ri “Chavani Xikwembu Mi Xi Vangamisa.” (Nhlav. 14:7) Hi ta twisisa tindlela to tala leti ku chava Yehovha ku vuyerisaka un’wana ni un’wana wa hina ha tona ni nhlengeletano hinkwayo.

Hambileswi ku chava ku nga vulaka ku karhateka kumbe ku heleriwa hi ntshembo ni ku nga vi ni xivindzi xa ku langutana ni swiyimo swo tika, Bibele yi ri: “Wa tsaka un’wana ni un’wana la chavaka Yehovha.” (Ps. 128:1) Nongonoko wa nhlengeletano wu ta hi kombisa ndlela leyi hi nga swi kotaka ha yona ku langutana ni mintlhontlho evugandzerini bya ntiyiso. Hi ta vona ndlela leyi hi nga pfunaka lava ha riki vantshwa ha yona leswaku va hlakulela xichavo xolexo lexinene xa Xikwembu, ku nga xona xi nga ta va susumetela ku lava ku xi tirhela hi mbilu hinkwayo, moya-xiviri hinkwawo, mianakanyo hinkwayo ni ntamu hinkwawo. (Mar. 12:30) Siku ro sungula ri ta gimeta hi nkulumo leyi nga ta nyikeriwa hi mulanguteri wa muganga leyi nge, “Vana Nakulobye Lonkulu Wa Varhandziwa Va Wena.” U ta hlamusela ndlela leyi ha yona hi nga tshamaka hi xalamukele matshalatshala ya Diyavulosi ya ku hi hambukisa eka Yehovha, ndyangu wa hina ni vamakwerhu lava nga Vakreste.

Nhloko-mhaka leyi nge “Chava Yehovha, Ku Nga Ri Vanhu” yi ta va ya nxaxamelo wa tinkulumo ta mune hi siku ra vumbirhi. Yi ta hlamusela leswaku ha yini hi fanele ku hlula ku chava kun’wana ni kun’wana loku hi sivelaka ku hetisisa vutirheli bya hina hi xitalo ni leswaku hi nga swi endlisa ku yini, kumbe ndlela leyi hi nga namarhelaka vutshembeki bya hina ha yona ni ku va ni ripfalo lerinene exikolweni ni laha hi tirhaka kona. Nkulumo ya le rivaleni leyi nge “Chava Xikwembu U Tlhela U Hlayisa Swileriso Swa Xona” yi sekeriwe eka ntlhandlamano wa swiendlakalo leswi hlamuseriweke eka Nhlavutelo ndzima 14. Nhlengeletano ya xifundzha yi ta gimeta hi nkongomiso lowunene wa “Ku Hambeta Hi Famba Hi Ku Chava Yehovha.”

Xikolo xa Vutirheli bya le Tilweni, Nhlangano wa Ntirho lowu nga xikombiso, nkulumo ya nkhuvulo ni nkatsakanyo wa Dyondzo ya Xihondzo xo Rindza i tin’wana ta tinhla-nkulu ta nhlengeletano leti u nga laviki ku kayeriwa hi tona. Rhamba swichudeni swa wena swa Bibele leswaku swi famba na wena. Un’wana ni un’wana la lavaka ku khuvuriwa u fanele ku tivisa mulanguteri la ungamelaka hi ku hatlisa hilaha a nga kotaka hakona. Hinkwerhu hi fanele ku kombisa xichavo xa hina lexinene eka Yehovha ni ku n’wi dzunisa, hi ku ka hi nga kayeriwi hi nkulumo ni yin’we eka nongonoko lowu wo hlawuleka!