Xana U Nga Ya U Ya Tirha Laha Ku Nga Ni Xilaveko Lexikulu?

¹ Xana u tshama u anakanya hi ku rhurhela laha ku nga ni xilaveko lexikulu xa vachumayeri va Mfumo? Loko wo rhambiwa ku ‘pelela u ya pfuna,’ xana u nga angula hilaha muapostola Pawulo a anguleke ha kona? (Mint. 16:9, 10) Emavandlheni yo tala ku ni xilaveko xa mindyangu leyi wupfeke emoyeni ni maphayona leswaku ma pfuna ku hlanganisa nsimu ya mavandlha lawa, kumbe vakulu lava fanelekaka ni malandza ya vutirheli leswaku va ta rhangela. Nsimu ya kona yi nga ha va yi ri ni swimitana switsongo leswi hangalakeke etindhawini letikulu ta le makaya. Holo ya Mfumo yi nga ha va yi ri ekule swinene. Ntirho wa ku tihanyisa wu nga ha va wu nga ri kona. Maxelo ma nga va ma nga ri manene minkarhi yin’wana. Xana u nga swi tsakela ku langutana ni ntlhontlho wo tano? U nga swi kotisa ku yini ku langutana na wona?

² Ku Laveka Ripfumelo Ni Ntshembo: Hi ku kongomisiwa hi Xikwembu, Abrama u siye muti wa rikwavo wa Ura a teka riendzo ra tikhilomitara ta 1 000 a ya eHarani swin’we ni nsati wakwe, ntukulu wakwe na Tera tata wakwe la dyuhaleke. (Gen. 11:31, 32; Neh. 9:7) Loko Tera a lovile, Yehovha u lerise Abrama, loyi sweswi a a ri ni malembe ya 75 hi vukhale, leswaku a suka eHarani a siya maxaka ya yena a ya etikweni leri Xikwembu a xi ta n’wi komba rona. Hiloko Abrama, Sarayi na Lota va “khoma ndlela.” (Gen. 12:1, 4, 5) I ntiyiso leswaku Abrama a nga rhurhelanga kona hi xikongomelo xa ku ya siva xilaveko lexikulu xa vatirheli. Kambe ku rhurha ka yena a ku koxa swin’wana. I yini swilo swa kona?

³ Xiavelo xexo a xi lava leswaku Abrama a va ni ripfumelo ni ntshembo. Ndlela leyi a a anakanya ha yona ni mahanyelo ya yena a swi fanele swi cinca. A a fanele a siya nsirhelelo wa maxaka ya yena. Kambe a a ri ni ntshembo wa leswaku Yehovha u ta n’wi hlayisa swin’we ni vandyangu wa yena. Vanhu vo tala namuntlha va kombise leswaku va tshemba Yehovha hi ndlela leyi fanaka.

⁴ Swiavelo Swa Xinkarhana: Xana u tshama u kuma mikateko leyi fuweke leyi tisiwaka hi ku tirha nsimu leyi nga aviwangiki? Lembe rin’wana ni rin’wana hi n’hweti ya August, September na October, magidi ya vahuweleri va kuma mikateko leyi tisiwaka hi ku ya tirha nsimu leyi nga aviwangiki. Swi tano ni nan’waka! Nsimu leyi nga aviwangiki yi pfulela van’wana lunghelo ra ku va maphayona ya nkarhinyana n’hweti yin’we kumbe tin’hweti leti engetelekeke. Ku ni swidorobana swo tala ni swimitana leswi hikwalaho ka ku va ekule ni mavandlha lama averiweke ku chumayela eka swona, se ku hundzeke malembe yo tala swi nga si chumayeriwa. Leswi i swiavelo leswi faneleke swi ya tirhiwa hi vahuweleri lava se va tshikeke ntirho ni lava va nga swi kotaka ku tshama eka swona ku ringana n’hweti kumbe ku tlula. Ku ni swo tala swinene leswi nga fikeleriwaka hi ku endla tano. Hi khutaza lava nga swi kotaka ku endla tano leswaku va anakanyisisa hi mhaka leyi.

⁵ Eka van’wana swi vula ku famba mimpfhuka yo leha swinene. Xana swi fanerile leswaku u endla matshalatshala wolawo? N’wamapurasi un’wana wa le Western Cape loko a twe hi ta leswi hi swi endlaka, u endle malunghiselelo ya leswaku vatirhi va yena hinkwavo epurasini va heta ntirho ka ha sele awara. Hiloko va hlangana eguxete ya purasi laha makwerhu un’wana a koteke ku nyikela vumbhoni bya rixaladza. Vatirhi a va ri hava mali yo nyikela eka ntirho wa misava hinkwayo kambe va teke tibuku ivi va hakela hi ku hlantswa mimovha ya vamakwerhu leyi a yi nga languteki hikwalaho ka ritshuri. N’wamapurasi un’wana wa le Mpumalanga u ri tlangerile swinene rungula ra hina kutani a amukela tibuku. Hambiswiritano, hi nkarhi wolowo vatirhi a va khomekile emasin’wini, xisweswo vahuweleri a va swi kotanga ku vulavula na vona. N’wamapurasi u vule leswaku loko vamakwerhu vo vuya hi 1:00 p.m., u ta va vitana hinkwavo leswaku va va kona. Kunene u endle tano, vatirhi hinkwavo a va ri kona. Mavandlha ya 75 wa tiphesente ma hlanganyerile etsimeni ra nsimu leyi nga aviwangiki n’wexemu. Vahuweleri vo tala va pfumela leswaku ku tirha laha ku nga ni xilaveko lexikulu, hambi swi ri swa xinkarhana, swi dzikise ku tlangela ka vona vutirheli. Bula ni lava va nga tshama va swi endla. U ta kuma leswaku va khutazekile emoyeni naswona swi nga ha endleka va tlhela va swi endla loko lunghelo rero ro va pfulekela.

⁶ Ku amukela xiavelo xa ku ya tirha nkarhinyana laha ku nga ni xilaveko lexikulu swi nga hetisisa xikongomelo xin’wana. Lava va endlaka tano va nga kota ku kuma vuxokoxoko lebyi nga va pfunaka ku “hlayela ntsengo” wa ku rhurhela endhawini yin’wana ya tiko.—Luka 14:28.

⁷ Ku Rhurhela Laha Ku Nga Ni Xilaveko Lexikulu: Yehovha u tiyimiserile leswaku mahungu lamanene ma chumayeriwa “emisaveni hinkwayo leyi akiweke” makumu ma nga si fika. (Mat. 24:14) Leswi wena u swi tivaka sweswo, xana u ta swi tsakela ku rhurhela laha ku nga ni xilaveko lexikulu loko u ta swi kota ku endla tano? Ku ni tindhawu to tala leti nga ni xilaveko.

⁸ Xana se u tshike ntirho? Xana muholo wa wena wu ku ringanile? Loko swi nga ri tano, xana u nga swi kota ku titirha? Xana u nga swi kota ku endla mali kun’wana ni kun’wana laha u nga kona hi ku tirhisa riqingho kumbe khompyuta? Loko u nga ta swi kota ku rhurhela endhawini yin’wana, xana u nga swi kota ku pfuna xirho xa ndyangu wo karhi leswaku xi ya pfuneta endhawini yin’wana?

⁹ Loko endzhaku ko anakanyisisa hi mhaka leyi hi xikhongelo u vona leswaku u nga swi kota ku langutana ni ntlhontlho wa ku rhurhela kun’wana laha ku nga ni xilaveko lexikulu, bula ni ndyangu wa wena ni vakulu va vandlha ra ka n’wina. Kutani u tsala papila u ri nyika vakulu leswaku va ta tsala leswi va lavaka ku swi vula ni swibumabumelo swa vona ri nga si rhumeriwa erhavini.

¹⁰ I yini leswi u faneleke u swi katsa epapileni ra wena? Malembe ya wena, siku leri u khuvuriweke ha rona, vutihlamuleri bya wena evandlheni, leswaku u tekile kumbe e-e ni loko u ri ni vana lava ha riki vatsongo. Vula tindhawu leti u lavaka ku ya pfuneta eka tona hi ku pfumelelana ni swilaveko swa wena n’wini. Hi xikombiso, xana ku ni ririmi rimbe leri u tivaka ku ri vulavula?

¹¹ Xana wa hiseka naswona a swi lavi leswaku u tshama u ri karhi u tsundzuxiwa hi vutihlamuleri bya wena? Xana swiyimo swa wena swa ku pfumelela ku tirha laha ku nga ni xilaveko lexikulu? Loko swi ri tano, anakanyisisa hi ndlela leyi Yehovha a hambetaka a chululela mikateko ya yena leyi fuweke eka hinkwavo lava n’wi tshembaka hi ku kombisa moya wa ku tinyiketela!—Ps. 34:8; Mal. 3:10.