Xana Ntirho Wa Ku Tihanyisa I Xihinga Eku Chumayeleni?

¹ Vanhu vo tala va tshama va khomekile. Tanihi Timbhoni ta Yehovha hi le xikarhi ka vanhu lava tshamaka va khomeke ngopfu—hi ku dyondza Rito ra Xikwembu, hi ku va kona eminhlanganweni ya vandlha ni hi ku hlanganyela entirhweni wa nsimu. Ku engetela kwalaho, hi tshama hi khomekile hi mintirho ya ku tihanyisa, ntirho wa le kaya kumbe wa xikolo ni hi vutihlamuleri byin’wana byo tala, swilo leswi hinkwaswo swi dya nkarhi. Lowu i ntlhontlho ngopfu-ngopfu eka tinhloko ta mindyangu.

² Hikwalaho ka swiyimo leswi tikaka swa ikhonomi etindhawini to hambana-hambana, tinhloko ta mindyangu ti nga ha boheka ku tirha tiawara to tala naswona ti tirha hi matimba leswaku mindyangu ya tona yi kota ku hanya. Loko mintirho ya ku tihanyisa leyi koxaka swo tala eka tona yi ti dyela nkarhi wo tala ni matimba, ti saleriwa hi nkarhi wuntsongo wa ku chumayela. Tanihi leswi tinhloko ta mindyangu ti nga ni vutihlamuleri bya ku khathalela mindyangu ya tona hi tlhelo ra nyama, tin’wana ti nga ha titwa onge a ti na wona nkarhi lowu ringaneke wa ku hlanganyela evutirhelini. (1 Tim. 5:8) I ntiyiso leswaku namuntlha ku ni mintshikilelo yo tala leyi tisiwaka hi ku lava ku tihanyisa. Kambe ntirho wa ku tihanyisa a wu fanelanga wu va xihinga entirhweni wa ku chumayela mahungu lamanene. (Mar. 13:10) Hikwalaho, hi fanele ku kambisisa xiyimo lexi hi nga eka xona.

³ Hikwalaho ka leswi xiyimo xa misava xi tshamelaka ku cinca, nhloko ya ndyangu yi nga ha voyamela eku heteni ka nkarhi wo tala entirhweni wa ku tihanyisa, hi xikongomelo xa ku hlengeleta mali yo tala leyi nga ta langutana ni swiyimo swa xitshuketa. (1 Kor. 7:31) Hambiloko ntirho wa ku tihanyisa wu vonaka wu tisa swilo swo tala leswi vonakaka kumbe minkarhi leyi engetelekeke ya vuhungasi ni ku titsakisa, xana wu ta endla leswaku ndyangu wu tsaka ni ku eneriseka swinene loko swilo sweswo swi endliwa hi nkarhi wa swilo swa moya ni lowu ku faneleke ku yiwa eminhlanganweni ha wona minkarhi hinkwayo? Kunene hi fanele ku papalata nchumu wun’wana ni wun’wana lowu nga ta hoxa vumoya bya hina ekhombyeni. Ndlela ya vutlhari i ku yingisa ndzayo ya Yesu ya ku ‘tihlayisela xuma etilweni’ ni ku ‘fuwa eka Xikwembu.’—Mat. 6:19-21; Luka 12:15-21.

⁴ Lava Swilaveko Swa Mfumo Ku Sungula: Yesu u dyondzise vadyondzisiwa va yena leswaku va rhangisa timhaka ta moya eka swilo leswin’wana hinkwaswo. U va khutaze a ku: “Mi nga tshuki mi vilela kutani mi ku, ‘Xana hi ta dya yini?’ kumbe, ‘Xana hi ta nwa yini?’ kumbe, ‘Xana hi ta ambala yini?’” Ha yini a vule tano? U hlamuserile: “Hikuva Tata wa n’wina wa le tilweni wa swi tiva leswaku ma swi lava swilo leswi hinkwaswo.” Loko hi khorwisekile hakunene hi marito wolawo, a ku na xihinga lexi nga ta hi sivela ku endla leswi Yesu a yeke emahlweni a swi vula loko a ku: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo [swilo leswi vonakaka leswi hi swi pfumalaka] mi ta engeteleriwa swona.” Xikwembu xi ta hi nyika swona! (Mat. 6:31-33) Hakunene lowu a hi nkarhi wa ku kavanyetiwa hi ku karhateka swi nga fanelanga, hi swa ku tihanyisa kumbe ku navela ku hanya vutomi bya le ka byandlana emafambiselweni lawa ya swilo lama nga ta hundza ku nga ri khale.—1 Pet. 5:7; 1 Yoh. 2:15-17.

⁵ Xikongomelo-nkulu xa ntirho wa ku tihanyisa i ku khathalela swilaveko swa munhu hi tlhelo ra nyama. Kambe hi pfumala swo tanihi kwihi? Muapostola Pawulo u tsale a ku: “Loko hi ri ni swakudya ni swifunengeto, hi ta eneriseka hi swilo leswi.” Xana hi ringeta ku kuma leswi tlulaka sweswo? Loko swi ri tano, hi nga ha kuma vuyelo lebyi Pawulo a lemukiseke ha byona loko a ku: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni.” (1 Tim. 6:8, 9; Mat. 6:24; Luka 14:33) Hi nga swi vonisa ku yini loko ku navela swilo swo tala ku ri xihinga eka hina?

⁶ Hi ta swi vona hi loko hi nga hlanganyeli hi xitalo entirhweni wa nsimu hikwalaho ka ntirho wa hina wa ku tihanyisa kumbe hi tsandzeka ku vona xilaveko xa ku titsona swo karhi leswaku hi ta chumayela mahungu lamanene, kutani, loko swi ri tano, a hi nge xi voni xilaveko xa ku rhangisa swilo leswi faneleke swi rhangisiwa. (Hev. 13:15, 16) Ku hanya vutomi lebyi olovisiweke swinene ku ta hi pfuna ngopfu leswaku hi susa xihinga lexi hi sivelaka ku chumayela. Swilaveko swa Mfumo swi fanele ku rhangisiwa minkarhi hinkwayo loko swi ta eku tirhiseni ka nkarhi ni matimba ya hina.

⁷ Ntirho Lowu Nga Riki Wa Hava: Marito ya Pawulo ma hi khutaza minkarhi hinkwayo leswaku hi “va ni swo tala swo swi endla entirhweni wa Hosi, [hi] ri karhi [hi] tiva leswaku ntirho wa [hina] a hi wa hava eHosini.” (1 Kor. 15:58) ‘Ntirho wa Hosi’ lowu nga wa nkoka swinene i ku chumayela hi Mfumo ni ku endla vadyondzisiwa. (Mat. 24:14; 28:19, 20) Leswaku hi hlanganyela hi xitalo hilaha hi nga kotaka hakona, hi fanele ku kuma nkarhi wa ku ya ensin’wini vhiki rin’wana ni rin’wana ni ku lwela leswaku hi nga wu tirhiseli ku endla swin’wana. (Efe. 5:15-17) Kutani, a wu kona ntirho wa ku tihanyisa kumbe nchumu wihi na wihi lowu nga ta va xihinga evutirhelini bya hina.

⁸ Loko hi tinyiketela eku avelana ni van’wana ntiyiso wa Bibele, hi ta kuma ntsako lowukulu lowu tisiwaka hi ku nyika. (Mint. 20:35) Hi ku lwela ku endla ntirho wa ku chumayela hi Mfumo, hi nga langutela vumundzuku hi ri ni ntshembo, “hikuva Xikwembu a xi pfumali ku lulama lerova xi nga rivala ntirho wa [hina] ni rirhandzu leri [hi] ri kombiseke hikwalaho ka vito ra xona.”—Hev. 6:10.