Switsundzuxo Swa Nkhuvo Wa Xitsundzuxo

Nan’waka nkhuvo wa Xitsundzuxo wu ta va hi Ravumune, March 28. Vakulu va fanele va xiyisisa timhaka leti landzelaka:

◼ Loko mi hlela nkarhi wa nhlangano, tiyisekani leswaku swifanekiselo a swi nge fambisiwi dyambu ri nga si pela.

◼ Vanhu hinkwavo ku katsa ni xivulavuri, va fanele ku tivisiwa nkarhi lowu kongomeke ni ndhawu leyi nga ta tirhisiwa.

◼ Xinkwa ni vhinyo leyi faneleke swi fanele ku kumiwa ni ku lunghisiwa ka ha ri ni nkarhi.—Vona Xihondzo xo Rindza xa February 1, 1985, tluka 29 (xa Xinghezi February 15, 1985, tluka 19).

◼ Tipuleti, tinghilazi, tafula leri fanelekaka ni lapi ra tafula swi fanele ku tisiwa eholweni ivi swi vekiwa ka ha ri na nkarhi.

◼ Holo ya Mfumo kumbe ndhawu yin’wana leyi ku nga ta hlanganiwa eka yona yi fanele ku basisiwa kahle ka ha ri na nkarhi.

◼ Varindzi ni vafambisi va swifanekiselo va fanele va hlawuriwa ni ku leteriwa ka ha ri emahlweni, malunghana ni mintirho ya vona kun’we ni endlelo leri faneleke ni hi xilaveko xa ku ambala ni ku tilunghisa hi ndlela leyi xiximekaka.

◼ Ku fanele ku endliwa malunghiselelo ya ku yisa swifanekiselo eka mutotiwa un’wana ni un’wana la vabyaka loyi a nga ta tsandzeka ku ta.

◼ Loko munhu la susiweke eku hlanganyeleni a dya swifanekiselo, a nga fanelanga a hlayiwa eka lava hlanganyeleke eku dyeni ka swifanekiselo, kambe u fanele ku katsiwa eka nhlayo ya lava veke kona enkhubyeni.—Vona Xihondzo xo Rindza xa February 1, 1976 (xa Xinghezi), tluka 76.

◼ Loko Holo ya Mfumo yi ta tirhisiwa hi mavandlha yo hlayanyana, mavandlha lawa ma fanele ma hleleka kahle leswaku ku ta papalatiwa ntlimbano eminyangweni, etindleleni leti vanhu va fambaka eka tona kun’we ni le tindhawini to paka mimovha.