Ntirho Wo Chumayela Timhaka Ta Mfumo Wu Ponisa Vutomi!
1 I ntirho wa nkoka swinene lowu endliwaka emisaveni enkarhini lowu. Mianakanyo ya Yehovha Xikwembu, Yesu Kreste ni tintsumi to tala swinene yi le ka ntirho lowu. Hi wihi ntirho wa kona, naswona ha yini wu ri wa nkoka? I ntirho wo chumayela timhaka ta Mfumo, naswona wu ponisa vutomi!—Rhom. 1:16; 10:13, 14.
2 Vanhu van’wana va anakanya leswaku ndlela yo antswa yo pfuna vanhu-kulobye i ku ringeta ku antswisa ndhawu leyi va tshamaka eka yona. Vo tala va khomeke swinene hi ku ringeta ku tisa ku rhula, ku herisa mavabyi ni ku antswisa xiyimo xa ikhonomi. Kambe i yini lexi nga pfunaka vanhu hakunene?
3 Ntirho Wa Nkoka Swinene: Rungula ra Mfumo hi rona ntsena ri hlamuselaka xikongomelo xa vutomi, xivangelo xa ku xaniseka ka vanhu ni ntshembo lowu tiyeke hi vumundzuku. Mahungu lamanene ma pfuna vanhu leswaku va va vanghana va Yehovha kutani va kuma “ku rhula ka Xikwembu loku tlulaka miehleketo hinkwayo.” (Filp. 4:7) I rungula ra Mfumo ntsena leri nyikaka nkongomiso lowu pfunaka vanhu ku langutana ni swiphiqo swa vutomi sweswi, ni ndlela leyi va nga ponaka ha yona loko lavo homboloka va lovisiwa enkarhini lowu taka. (1 Yoh. 2:17) Xana sweswo a swi lavi leswaku hi tikarhata hilaha hi nga kotaka hakona entirhweni wo chumayela timhaka ta Mfumo?
4 Hi xikombiso: Xana yi nga va yihi ndlela yo antswa yo pfuna vaaki lava etleleke va muti lowu nga ekhombyeni ro lovisiwa hi damu leri nga ekusuhi ni ku buluka? Xana hi nga pfulela mati ma huma hi le ndzhaku ka damu leri lavaka ku buluka? Xana hi ta sungula ku sasekisa muti lowu lavaka ku weriwa hi khombo? E-e! Vaaki va muti va fanele va pfuxiwa, va tivisiwa hi ta khombo leri taka va tlhela va pfuniwa ku baleka! Lava va etleleke hi tlhelo ra moya namuntlha va le khombyeni lerikulu. (Luka 21:34-36) Tanihi leswi mafambiselo lawa ya swilo ma nga ta hundza ku nga ri khale, a hi ringeteni ku gingiriteka hilaha hi nga kotaka hakona entirhweni lowu wo chumayela!—2 Tim. 4:2; 2 Pet. 3:11, 12.
5 Phikelela eNtirhweni Lowu: A hi kumisiseni tindlela to fikelela vanhu lava engetelekeke va timbilu letinene hi va byela mahungu lamanene—emakaya ya vona, eswitarateni, hi ku tirhisa riqingho ni hi ku chumayela hi xitshuketa. Ntirho lowu Yehovha a hi nyikeke wona leswaku hi wu endla i wa nkoka swinene eka hinkwayo leyi hi nga yi endlaka. Loko hi wu endla hi ku gingiriteka, hi ta ‘tiponisa hina swin’we ni lava va hi yingisaka.’—1 Tim. 4:16.