Ripfumelo Ra Hina Ri Hi Susumetela Ku Endla Mintirho Leyinene
1 Ripfumelo ri susumetele Nowa, Muxe na Rahava leswaku va endla swo karhi. Nowa u ake ngalava. Muxe u fularhele ku hanya vutomi bya vulovolovo swa xinkarhana endyangwini wa Faro. Rahava u fihle tinhlorhi kutani a yingisa swileriso swa tona, hi ndlela yoleyo a ponisa ndyangu wa ka vona. (Hev. 11:7, 24-26, 31) Hi yihi mintirho leyinene leyi ripfumelo ra hina ri hi susumetelaka ku yi endla namuntlha?
2 Ku Chumayela: Ripfumelo ri hi susumetela ku vulavula hi Xikwembu xa hina lexinene ni hi malunghiselelo lawa xi ma endleke leswaku vanhu va kuma ntsako wa hilaha ku nga heriki. (2 Kor. 4:13) Minkarhi yin’wana hi nga ha kanakana ku chumayela. Kambe loko hi ‘veka Yehovha emahlweni ka hina minkarhi hinkwayo,’ ha tiyisiwa kutani ku chava ka hela. (Ps. 16:8) Kutani ripfumelo ra hina ri hi susumetela ku vula mahungu lamanene eka maxaka, vaakelani, vatirhi-kulorhi, lava hi nghenaka na vona xikolo ni van’wana, hi nkarhi wun’wana ni wun’wana lowu faneleke.—Rhom. 1:14-16.
3 Ku Hlangana: Ntirho wun’wana lowunene lowu ripfumelo ri hi susumetelaka ku wu endla i ku hlangana minkarhi hinkwayo. Hi ndlela yihi? Loko hi hlangana eminhlanganweni ya Vukreste, hi kombisa ripfumelo ra leswaku Yesu u kona exikarhi ka hina, hi ku tirhisa moya lowo kwetsima wa Xikwembu. (Mat. 18:20) Hi kombisa leswaku ha swi navela ku ‘yingisa leswi moya wu swi byelaka mavandlha.’ (Nhlav. 3:6) Ndzetelo lowu hi wu kumaka hi wu teka wu ri wa nkoka hikuva ripfumelo ri endla hi vona leswaku loyi a hi dyondzisaka i Yehovha, Muleteri wa hina Lonkulu.—Esa. 30:20.
4 Swiboho Leswi Hi Swi Endlaka: Ku tiyiseka hi mbilu hinkwayo hi swilo swa xiviri hambiloko hi nga swi voni, ku hi susumetela ku rhangisa swilo swa moya evuton’wini bya hina. (Hev. 11:1) Hakanyingi leswi swi lava ku titsona swilo leswi vonakaka. Hi xikombiso nkulu un’wana u ale ku amukela ntirho wa xiyimo xa le henhla hi leswi a wu lava leswaku a lahlekeriwa hi minhlangano yo karhi, a va ekule ni ndyangu wa yena naswona a tshika ku phayona. Onge hilaha ku fanaka hi nga va ni ntshembo lowu heleleke eka xitiyisekiso xa Bibele xa leswaku Yehovha u ta khathalela lava ‘hambetaka va lava mfumo ni ku lulama ka yena.’—Mat. 6:33.
5 Vanhu van’wana va wu vona nsusumeto wa matimba lowu ripfumelo ri susumetaka vutomi bya hina ha wona. Entiyisweni ku vulavuriwa hi ripfumelo ra hina emisaveni hinkwayo. (Rhom. 1:8) Hikwalaho, onge hinkwerhu hi nga kombisa hi mintirho ya hina leyinene leswaku ripfumelo ra hina ra hanya.—Yak. 2:26.