Xana Wa Swi “Lava” Ku Pfuna Van’wana?
1 Yesu a a khathala hakunene hi vanhu van’wana. Loko wanuna la nga ni nhlokonho a kombela mpfuno wa yena, Yesu u tshambulute voko rakwe, a n’wi khumba, kutani a ku: “Ndza swi lava. Basisiwa.” (Mar. 1:40-42) Xana hi nga wu tekelela njhani moya lowu Yesu a a ri na wona wa ku pfuna van’wana?
2 Vanhu Lava Tsakelaka: Xirho xin’wana ni xin’wana xa vandlha xi hoxa xandla eku pfuneni vanhu lava tsakelaka leswaku va va vagandzeri va Yehovha. Loko vanhu lavantshwa va ta eminhlanganweni, va xewete, u tivana na vona. Ringeta ku kuma tindlela ta ku va khutaza. Va bumabumele loko va hlamurile eminhlanganweni. Kombisa leswaku u tlangela matshalatshala lawa va ma endlaka ya ku tirhisa misinya ya milawu ya Bibele evuton’wini bya vona. Va pfune va vona leswaku va nga tikumela vanghana va ntiyiso evandlheni.
3 Vapfumeri-kulorhi: “Lava nga swin’we na hina eripfumelweni” hi vona lava hi faneleke hi va pfuna swinene hi tindlela to hambana-hambana. (Gal. 6:10) Vo tala va kamana ni swiphiqo swa rihanyo. Loko u va endzela hi xikongomelo xa ku va khutaza, u nga aka vuxaka lebyinene kumbexana u tlhela u va pfuna hi tindlela tin’wana ta xiviri. Van’wana va nga va va langutane ni swiphiqo swin’wana evuton’wini bya vona. Va kombe leswaku wa khathala ha vona, hi ku tinyika nkarhi wa ku va yingisela ni ku va aka. (1 Tes. 5:14) Nakambe hi fanele hi khomisana ni vakulu loko va ri karhi va hetisisa vutihlamuleri bya vona. (Hev. 13:17) Loko hi kombisa moya wa ku lava ku pfuna, hi nga va “mpfuno lowu tiyisaka” eka vapfumeri-kulorhi.—Kol. 4:11.
4 Swirho Swa Ndyangu: Nakambe hi fanele hi lwela ku tekelela moya lowu Yesu a a ri na wona hi ku khathala hi swirho swa mindyangu ya hina. Ku khathala ka xiviri ka vatswari ku va susumetela ku ‘hambeta va kurisa vana va vona hi ku tshinya ni nkongomiso wa mianakanyo wa Yehovha.’ (Efe. 6:4) Vana va nga endla leswi languteriweke eka vona hi ku tshama va lunghekile loko ku fika nkarhi wa dyondzo ya ndyangu, wo ya eminhlanganweni ya vandlha kumbe entirhweni wa nsimu. Vana lava kuleke va nga kombisa moya wa Yesu wa ntwela-vusiwana hi ku pfuna vatswari va vona hi musa leswaku va kota ku hlangavetana ni swiphiqo leswi fambisanaka ni ku dyuhala. Hinkwerhu ka hina hi nga “hanya hi ku tinyiketela loku nga ni vukwembu endyangwini” wa hina hi tindlela teto ni tin’wana.—1 Tim. 5:4.
5 Loko hi tekelela moya wa Yesu wa ku khathala hi van’wana, hi nga kota ku va pfuna ku hunguta swiphiqo swa vona ni ku endla leswaku ku va ni vun’we emindyangwini ya hina ni le vandlheni. Xa nkoka eka hinkwaswo, hi ta yisa ku dzuneka eka Yehovha, “Tatana la nga ni tintswalo letikulu.”—2 Kor. 1:3.