Ku Hlanganisiwa Swin’we Hi Vun’we
1 Xana i kangani u titwa u hlamarisiwa hi ndlela leyi miri wa munhu wu vumbiweke ha yona? (Ps. 139:14) Swirho hinkwaswo swa miri swa tirhisana. Rito ra Xikwembu ri fanisa vandlha ra Vukreste ni miri lowu tirhisanaka kahle. Swirho hinkwaswo swa vandlha leswi nga ehansi ka Nhloko, ku nga Kreste, ‘swi hlanganisiwe swin’we hi vun’we ni ku endliwa leswaku swi tirhisana hi mahlangano hinkwawo lama nyikaka leswi lavekaka.’ (Efe. 4:16a) Xisweswo Yehovha u kota ku tirhisa vanhu vakwe lava nga ni vun’we leswaku va endla swilo swo hlamarisa.
2 Swirho swa vandlha ra lembe-xidzana ro sungula a swi ri ni “mianakanyo yin’we” eku khathalelaneni hi timhaka ta moya ni hi swilaveko swa nyama. (Mint. 2:44-47) Hi ku seketeriwa hi Yehovha, va langutane ni nkaneto lowukulu va tlhela va wu hlula. (Mint. 4:24-31) Hinkwako lomu va yeke kona a va chumayela rungula ra Mfumo, va hlanganisa misava ya nkarhi wolowo hi mahungu lamanene. (Kol. 1:23) Eminkarhini ya namuntlha, vandlha ra Vukreste ri endle tano hi mpimo lowukulu swinene. I yini leswi hi pfuneke ku kondletela vun’we lebyi exikarhi ka hina?
3 Ku Hlanganisiwa Hi Dyondzo Ya Xikwembu: Vugandzeri bya hina hi byona byi hi hlanganisaka emisaveni hinkwayo. Xana sweswo swi kotekisa ku yini? Hi xixima ntlawa lowu Yehovha a wu tirhisaka ku hi phamela ‘swakudya swa moya hi nkarhi lowu faneleke.’ (Mat. 24:45) Nakambe hi tlangela “tinyiko leti nga vanhu” leti a ti vekeke leswaku ti va vadyondzisi evandlheni. Loko hi amukela malunghiselelo ya Yehovha yo hi wundla hi tlhelo ra moya, ku twisisa ka hina Rito ra Xikwembu ka kula naswona hinkwerhu hi susumeteleka ku tekelela Yesu tanihi leswi hi nga vadyondzisiwa vakwe. Hi fanele hi hambeta hi dyondza Rito ra Xikwembu, hi tikarhatela ku “fikelela vun’we eka ripfumelo.” (Efe. 4:8, 11-13) Xana wena u hoxa xandla eka vun’we bya hina bya moya hi ku hlaya Bibele siku na siku?
4 Ku Hlanganisiwa Hi Xinakulobye Xa Vukreste: Rirhandzu ra hi hlanganisa hi va ni xinakulobye lexikulu eminhlanganweni ya Vukreste. Eminhlanganweni leyi, ha ‘khathalelana.’ (Hev. 10:24, 25) Leswi a swi vuli ku langutana ntsena, kambe swi vula ku tiva vamakwerhu hi xiviri, hi va languta hi ndlela leyi Yehovha a va langutaka ha yona, tanihi vanhu va risima. (Hag. 2:7) Loko hi yingisa ndlela leyi va phofulaka ripfumelo ra vona ha yona, rirhandzu ra hina eka vona ra kula kasi ni vun’we bya hina bya tiya. Xana u tiviwa u ri munhu loyi a vaka kona nkarhi na nkarhi eminhlanganweni ya vandlha?
5 Vatirhi-kulorhi eNsin’wini: Ku chumayela mahungu lamanene ni vapfumeri-kulorhi swa hi hlanganisa eku endleni ka ku rhandza ka Xikwembu. Muapostola Pawulo a a tlangela ‘vatirhi-kulobye emfun’weni wa Xikwembu.’ (Kol. 4:11) Ku avelana mintokoto ni ku pfunana loko hi ri entirhweni wa nsimu swi hi pfuna ku hetisisa ntirho wa hina wa Vukreste ni ku tiyisa xiboho xa hina xa vun’we.—Kol. 3:14.
6 Matimba Lama Hlanganisaka Ya Moya Lowo Kwetsima: Loko hi tikarhatela ku endla ku rhandza ka Yehovha, yena u hi nyika moya wakwe. Moya lowu wu hi pfuna ku herisa timholovo kutani hi tshama swin’we hi vun’we. (Ps. 133:1) Wu hi susumetela “ku hlayisa vun’we bya moya exibohweni lexi hlanganisaka xa ku rhula.” (Efe. 4:3) Un’wana ni un’wana wa hina a nga hoxa xandla eka vun’we lebyi nga kona exikarhi ka vanhu va Xikwembu, hi ku kombisa mihandzu ya moya eka ndlela leyi a khomaka van’wana ha yona.—Gal. 5:22, 23.
7 Ku tirha swin’we hi vun’we ehansi ka vunhloko bya Kreste swi “endla leswaku miri wu kula wu akeka hi rirhandzu.” (Efe. 4:16b) Ku tlula kwalaho, swi endla leswaku ku dzunisiwa Yehovha, “Xikwembu lexi nyikaka ku rhula.”—Rhom. 16:20.