I Yini Lexi Endlaka Vakreste Va Ntiyiso Va Va Ni Vun’we?
1 I yini lexi nga hlanganisaka vanhu vo tlula tsevu wa timiliyoni, va tindzimi ta kwalomu ka 380 lava humaka ematikweni ya 234? I vugandzeri bya Yehovha Xikwembu ntsena. (Mik. 2:12; 4:1-3) Timbhoni ta Yehovha ta swi tiva leswaku namuntlha ku ni vun’we exikarhi ka Vakreste va ntiyiso. Tanihi “ntlhambi wun’we” lowu nga ehansi ka ‘murisi un’we’ hi tiyimiserile ku lwisana ni moya wa misava leyi, lowu vangaka ku avana.—Yoh. 10:16; Efe. 2:2.
2 Xikongomelo xa Xikwembu lexi nga cinciki hi leswaku swivumbiwa hinkwaswo swa le tilweni ni vanhu laha misaveni, va gandzela hi vun’we evugandzerini bya ntiyiso. (Nhlav. 5:13) Yesu u khongele hi mbilu hinkwayo leswaku valandzeri va yena va va ni vun’we hikuva a a swi tiva leswaku leyi i mhaka ya nkoka. (Yoh. 17:20, 21) Hi yihi ndlela leyi un’wana ni un’wana wa hina a nga hoxaka xandla ha yona leswaku ku va ni vun’we evandlheni ra Vukreste?
3 Lexi Endlaka Leswaku Ku Va Ni Vun’we: Vakreste a va nge swi koti ku va ni vun’we handle ko kongomisiwa hi Rito ra Xikwembu ni moya wa xona. Ku tirhisa leswi hi swi dyondzeke eBibeleni swi endla leswaku moya wa Xikwembu wu tirha kahle evuton’wini bya hina. Leswi swi endla leswaku hi “hlayisa vun’we bya moya exibohweni lexi hlanganisaka xa ku rhula.” (Efe. 4:3) Swi hi susumetela leswaku hi lehiselana mbilu hi rirhandzu. (Kol. 3:13, 14; 1 Pet. 4:8) Xana wa byi kondletela vun’we hi ku anakanyisisa hi Rito ra Xikwembu siku ni siku?
4 Ntirho lowu hi nyikiweke wona wo chumayela ni ku endla vadyondzisiwa na wona wa hi hlanganisa. Loko hi ri karhi hi tirha swin’we entirhweni wa hina tanihi Vakreste, hi “lwela ripfumelo eka mahungu lamanene,” hi va hi ri “vatirhi-kulobye entiyisweni.” (Filp. 1:27; 3 Yoh. 8) Loko hi endla tano, xiboho xa rirhandzu xa tiya evandlheni. Ha yini u nga rhambi un’wana loyi ku nga khale u hetelele ku tirha na yena nsimu leswaku mi tirha swin’we eka mahelo-vhiki lawa?
5 I lunghelo lerikulu swinene ku va xiphemu xa nhlengeletano ya matiko hinkwawo leyi namuntlha ku nga yona ntsena yi nga ni vun’we bya ntiyiso! (1 Pet. 5:9) Vanhu vo tala va vone vun’we lebyi nga kona emisaveni hinkwayo hi nkarhi wa Mintsombano ya Matiko Hinkwawo leyi a yi ri ni xihloko lexi nge “Vangamisa Xikwembu.” Onge hinkwerhu ka hina hi nga hoxa xandla eka vun’we lebyi bya risima, hi ku hlaya Rito ra Xikwembu siku ni siku, hi ku lulamisa timhaka hi rirhandzu loko hi tlulane milenge ni hi ku chumayela mahungu lamanene “hi mianakanyo yin’we.”—Rhom. 15:6.