Ndyangu Wa Yehovha Wu Ni Vun’we Bya Risima Swinene

“Langutani! a hi ku ṭakisa ka ŝona, ni ku nanḍiha, loko mašaka ma hanya ŝiṅwe, ma twanana.”—PISALEMA 133:1.

1. Hi xihi xiyimo xa mindyangu yo tala namuntlha?

NDYANGU wu le khombyeni namuntlha. Emindyangwini yo tala, swiboho swa vukati swa tshoviwa. Ku dlaya vukati ku ya ku andza swinene, naswona vana vo tala va mimpatswa leyi dlayeke vukati va ni gome lerikulu. Timiliyoni ta mindyangu a ti tsakanga naswona a ti na vun’we. Kambe, ku ni ndyangu wun’we lowu nga ni ntsako wa ntiyiso ni vun’we bya xiviri. I ndyangu wa matiko hinkwawo wa Yehovha Xikwembu. Eka wona, tintsumi ta makume ya magidi leti nga vonakiki ti hetisisa ntirho lowu ti averiweke wona hi ku twanana ni ku rhandza ka Xikwembu. (Pisalema 103:20, 21) Kambe wu kona ndyangu laha emisaveni lowu tiphinaka hi vun’we byo tano?

2, 3. (a) I vamani lava sweswi va nga xiphemu xa ndyangu wa Xikwembu wa misava hinkwayo, naswona xana Timbhoni ta Yehovha hinkwato hi nga ti fanisa na yini namuntlha? (b) Hi swihi swivutiso leswi hi nga ta swi kanela?

² Muapostola Pawulo u tsarile a ku: “Ndzi nkhinsama hi matsolo emahlweni ka Tatana, loyi ndyangu wun’wana ni wun’wana, ematilweni ni la misaveni, wu vuriwaka ‘wa tatana’ hikwalaho ka yena.” (Vaefesa 3:14, 15) Rhavi ra ndyangu wun’wana ni wun’wana lowu nga laha emisaveni ri kuma vito ra rona eka Xikwembu hikuva hi xona Muvumbi. Hambileswi ku nga riki na mindyangu ya vanhu etilweni, Xikwembu xi teke nhlengeletano ya xona ya le tilweni hi ndlela yo fanekisela, naswona Yesu u ta hlanganisiwa ni mutekiwa wa yena wa moya etilweni. (Esaya 54:5; Luka 20:34, 35; 1 Vakorinto 15:50; 2 Vakorinto 11:2) Vatotiwa lava tshembekeke lava nga laha misaveni i xiphemu xa ndyangu wa Xikwembu wa misava hinkwayo, naswona “tinyimpfu tin’wana,” ta Yesu leti nga ni ntshembo wa laha misaveni, i swirho swa wona swa nkarhi lowu taka. (Yohane 10:16; Varhoma 8:14-17; Xihondzo xo Rindza, xa January 15, 1996, tluka 31) Hambiswiritano, Timbhoni ta Yehovha hinkwato namuntlha ti nga fanisiwa ni ndyangu wa misava hinkwayo lowu nga ni vun’we.

³ Xana u xiphemu xa ndyangu lowu wo saseka wa matiko hinkwawo wa malandza ya Xikwembu? Loko u ri xona, u tiphina hi wun’wana wa mikateko leyikulu leyi munhu wihi na wihi a nga swi lavaka ku va na yona. Timiliyoni ti ta pfumela leswaku ndyangu wa Yehovha wa misava hinkwayo—ku nga nhlengeletano ya yena leyi vonakaka—i xihlovo-mananga xa ku rhula ni vun’we emisaveni leyi nga kwandzasi ya madzolonga ni ku pfumaleka ka vun’we. Xana vun’we bya ndyangu wa Yehovha wa misava hinkwayo byi nga ha hlamuseriwa hi ndlela yihi? Naswona hi swihi swiaki leswi kondletelaka ku rhula koloko?

I Swinene Naswona Swa Tsakisa Swonghasi!

4. Hi marito ya wena n’wini, xana a wu ta swi hlamuserisa ku yini leswi Pisalema 133 yi swi vulaka malunghana ni vun’we bya vumakwerhu?

⁴ Mupisalema Davhida u tlangele vun’we bya vumakwerhu hilaha ku enteke. U tlhele a huhuteriwa ku yimbelela mayelana na byona! N’wi anakanye ni haripa ya yena a ri karhi a yimbelela a ku: “Langutani! a hi ku ṭakisa ka ŝona, ni ku nanḍiha, loko mašaka ma hanya ŝiṅwe, ma twanana. Ŝi fana ni mafura ya risuna la’ma tšheriwaka e nhlokweni, ma širirika e malepfini ya Arone, ma širirika e ku yisa e makumo ka nguv̌u ya yena. Ku fana ni mbera ya Hermon, le’yi welaka tinṭhav̌eni ta Sion; hikuv̌a hi kona Yehova a leriselaka mikateko, ni v̌utomi, hi laha ku nga heriki.”—Pisalema 133:1-3.

5. Hi ku tirhisa Pisalema 133:1, 2, hi kwihi ku pimanisa loku nga endliwaka exikarhi ka Vaisrayele ni malandza ya Xikwembu ya namuntlha?

⁵ Marito wolawo a ma tirha eka vun’we bya vumakwerhu lebyi vanhu va Xikwembu va khale, ku nga Vaisrayele a va tiphina hi byona. Loko va ri eYerusalema eminkhubyeni ya vona minharhu ya lembe na lembe, a va tshama hi vun’we. Hambileswi a va huma etinxakeni to hambana-hambana, a va ri ndyangu wun’we. Ku va swin’we ka vona ku tise vuyelo lebyinene, ku fana ni mafurha lama phyuphyisaka yo tota lama nga ni nun’hwelo lowu tsakisaka. Loko mafurha wolawo ma cheriwe enhlokweni ya Aroni, ma khulukele emalepfini ya yena ma ehlela ekholorini ya nguvu ya yena. Eka Vaisrayele, ku va swin’we swi ve ni nkucetelo lowunene lowu ngheneke eka vanhu lava hlengeletaneke hinkwavo. Timholovo a ti lulamisiwa, naswona a ku hlohloteriwa vun’we. Vun’we lebyi fanaka byi kona endyangwini wa Yehovha wa misava hinkwayo namuntlha. Ku hlangana nkarhi na nkarhi ku ni vuyelo lebyinene bya moya eka swirho swa wona. Timholovo tihi na tihi kumbe ku nonon’hweriwa kwihi na kwihi ka herisiwa loko ku tirhisiwa ndzayo ya Rito ra Xikwembu. (Matewu 5:23, 24; 18:15-17) Vanhu va Yehovha va ku tlangela swinene ku khutazana loku vaka kona hikwalaho ka vun’we bya vona bya vumakwerhu.

6, 7. Xana vun’we bya Israyele a byi fana ni mberha ya Ntshava ya Hermoni hi ndlela yihi, naswona hi kwihi laha ku nga kumiwaka mikateko ya Xikwembu namuntlha?

⁶ Xana ku tshama swin’we ka Vaisrayele hi vun’we a ku fana njhani ni mberha ya Ntshava ya Hermoni? Phela, tanihi leswi nhlonhlorhi ya ntshava leyi yi tlulaka 2 800 wa timitara ehenhla ka vuandlalo bya lwandle, yi tshama yi pfariwe hi gamboko kwalomu ka lembe hinkwaro. Nhlonhlorhi ya Hermoni leyi nga ni gamboko yi vanga nkahelo wa gwitsi wa nivusiku naswona xisweswo wu humesa mberha yo tala leyi sirheletaka swimilana hi nguva ya gwitsi leyi tekaka nkarhi wo leha. Moya wo titimela lowu humaka enxaxamelweni wa tintshava ta Hermoni wu nga famba ni nkahelo wolowo ku fika ni le dzongeni elwandle ra Yerusalema, laha swi fikaka swi gwitsila swi fana na mberha. Kutani mupisalema u vulavule kahle hi ‘mberha ya Hermoni leyi xikaka hi le Ntshaveni ya Siyoni.’ Mawaku xitsundzuxo lexinene swonghasi xa nkucetelo lowu phyuphyisaka lowu kondletelaka vun’we bya vagandzeri va ndyangu wa Yehovha!

⁷ Emahlweni ko va vandlha ra Vukreste ri simekiwa, Siyoni kumbe Yerusalema, a wu ri ntsindza wa vugandzeri bya ntiyiso. Hikwalaho, a ku ri kona laha Xikwembu xi leriseke leswaku nkateko wu ta va kona. Tanihi leswi Xihlovo xa mikateko hinkwayo a xi ri evukwetsimelweni eYerusalema, mikateko a yi ta huma kona. Hambiswiritano, hikwalaho ka leswi vugandzeri bya ntiyiso byi nga ha titshegangiki hi ndhawu yo karhi, mikateko, rirhandzu ni vun’we bya malandza ya Xikwembu swi nga kumiwa emisaveni hinkwayo namuntlha. (Yohane 13:34, 35) Hi swihi swiphemu swin’wana leswi kondletelaka vun’we lebyi?

Swiphemu Leswi Kondletelaka Vun’we

8. Xana hi dyondza yini malunghana ni vun’we eka Yohane 17:20, 21?

⁸ Vun’we bya vagandzeri va Yehovha byi titshege hi ku yingisa Rito ra Xikwembu leri twisisiwaka kahle ku katsa ni tidyondzo ta Yesu Kreste. Hikwalaho ka leswi Yehovha a rhumeleke N’wana wa yena emisaveni leswaku a ta veka vumbhoni ehenhla ka ntiyiso ni ku fa rifu ra gandzelo, ndlela yi pfulekile ya ku vumbiwa ka vandlha ra Vukreste leri nga ni vun’we. (Yohane 3:16; 18:37) Leswaku a ku fanele ku va ni vun’we bya xiviri exikarhi ka swirho swa rona swi vekiwe erivaleni loko Yesu a khongerile a ku: “A ndzi khongeleri vona ntsena, kambe ndzi khongelela ni lava va nga ta pfumela eka mina hi rito ra vona; ndzi navela leswaku hinkwavo va va un’we, ku fana ni leswi wena Tatana u nga ka mina, na mina ndzi nga ka wena, leswaku na vona va va eka hina, kutani misava yi ta pfumela leswaku u ndzi rhumile.” (Yohane 17:20, 21) Valandzeri va Yesu va kuma vun’we lebyi fanaka ni lebyi nga kona exikarhi ka Xikwembu ni N’wana wa xona. Leswi swi kotekile hikuva va fambisana ni Rito ra Xikwembu ni tidyondzo ta Yesu. Langutelo leri fanaka i xiphemu lexikulu xa vun’we bya ndyangu wa Yehovha wa misava hinkwayo namuntlha.

9. Xana moya lowo kwetsima wu hetisisa xiphemu xihi eka vun’we bya vanhu va Yehovha?

⁹ Xiphemu xin’wana lexi hlanganisaka vanhu va Yehovha hileswaku hi ni moya lowo kwetsima wa Xikwembu, kumbe matimba lama tirhaka. Wu hi pfuna ku twisisa mintiyiso leyi paluxiweke ya Rito ra Yehovha naswona xisweswo hi n’wi tirhela hi hlanganile. (Yohane 16:12, 13) Moya lowu wu hi pfuna ku papalata mintirho ya nyama leyi hambanisaka yo kota madzolonga, mavondzo, ximbilwambilwana na timholovo. Ematshan’weni ya sweswo, moya wa Xikwembu wu hi tisela mihandzu leyi hi hlanganisaka ya rirhandzu, ntsako, ku rhula, ku leha mbilu, vunene, ku hanana, ku tshembeka, musa ni ku tikhoma.—Vagalatiya 5:19-23.

10. (a) Hi kwihi ku fana loku nga kona exikarhi ka rirhandzu leri nga kona endyangwini wa vanhu lowu hlanganeke ni rirhandzu leri vonakaka exikarhi ka lava tinyiketeleke eka Yehovha? (b) Xana xirho xin’wana xa Huvo leyi Fumaka xi yi phofule njhani mintlhaveko ya xona malunghana ni ku hlengeletana ni vamakwavo va xona va moya?

¹⁰ Swirho swa ndyangu lowu hlanganeke swa rhandzana naswona swi tsakela ku va swin’we. Hilaha ku fanaka, lava nga le ndyangwini lowu nga ni vun’we wa vagandzeri va Yehovha va n’wi rhandza, va rhandza N’wana wa yena ni vapfumeri-kulobye. (Marka 12:30; Yohane 21:15-17; 1 Yohane 4:21) Tanihi leswi ndyangu wa rirhandzu lowu tolovelekeke wu tsakelaka ku dya swakudya swin’we, lava tinyiketeleke eka Xikwembu va tsakela ku va kona eminhlanganweni ya Vukreste, etinhlengeletanweni ni le mintsombanweni leswaku va pfuneka eka vunakulobye lebyinene ni le ka swakudya swa moya leswinene ngopfu. (Matewu 24:45-47; Vaheveru 10:24, 25) Xirho xa Huvo leyi Fumaka ya Timbhoni ta Yehovha xi tshame xi ku: “Eka mina, ku hlangana ni vamakwerhu i wun’wana wa mintsako leyikulu evuton’wini ni ku va xihlovo xa xikhutazo. Ndzi rhandza ku va exikarhi ka lava fikeke ku sungula eHolweni ya Mfumo, naswona loko swi koteka ndzi va exikarhi ka lava nga vo hetelela ku suka. Ndzi va ni ntsako wa le ndzeni loko ndzi vulavula ni vanhu va Xikwembu. Loko ndzi ri exikarhi ka vona ndzi titwa ndzi ri ekaya ndzi ri ni ndyangu wa ka hina.” Xana u titwa hi ndlela yoleyo?—Pisalema 27:4.

11. Xana hi wihi ntirho lowu Timbhoni ta Yehovha ti kumaka ntsako eka wona, naswona ku va na vuyelo byihi loko hi rhangisa ntirho wa Xikwembu evuton’wini bya hina?

¹¹ Ndyangu lowu nga ni vun’we wu tsakela ku endla swilo wu ri swin’we. Hilaha ku fanaka, lava nga le ndyangwini wa vagandzeri va Yehovha va tsakela ku tirha hi vun’we entirhweni wa vona wo chumayela hi Mfumo ni ku endla vadyondzisiwa. (Matewu 24:14; 28:19, 20) Ku hlanganyela nkarhi na nkarhi eka wona swi hi tshineta ekusuhi swinene ni Timbhoni tin’wana ta Yehovha. Ku endla ntirho wa Xikwembu wu va wa nkoka evuton’wini bya hina, ni ku seketela mintirho hinkwayo ya vanhu va yena swi tlhela swi kondletela moya wa ndyangu exikarhi ka hina.

Nhleleko Lowu Lawuriwaka Hi Xikwembu I Wa Nkoka

12. Hi swihi swihlawulekisi swa ndyangu lowu tsakeke ni lowu nga ni vun’we, naswona hi rihi lunghiselelo leri kondleteleke vun’we evandlheni ra Vukreste ra lembe-xidzana ro sungula?

¹² Ndyangu lowu nga ni vunhloko lebyi tiyeke bya rirhandzu naswona lebyi hlelekeke, wu tala ku va ni vun’we ni ku va ni ntsako. (Vaefesa 5:22, 33; 6:1) Yehovha i Xikwembu xa nhleleko lowo rhula, naswona hinkwavo lava nga le ndyangwini wa yena va n’wi teka tanihi “L’a-nge-henhla-henhla.” (Daniyele 7:18, 22, 25, 27; 1 Vakorinto 14:33) Va tlhela va xiya leswaku u hlawule N’wana wa yena, Yesu Kreste, mudyandzhaka wa swilo hinkwaswo naswona u n’wi nyike vulawuri hinkwabyo etilweni ni le misaveni. (Matewu 28:18; Vaheveru 1:1, 2) Ri ri na Kreste tanihi Nhloko ya rona, vandlha ra Vukreste i nhlengeletano leyi hlelekeke ni leyi nga ni vun’we. (Vaefesa 5:23) Leswaku ku languteriwa mintirho ya vandlha ra lembe-xidzana ro sungula, a ku ri ni huvo leyi fumaka leyi vumbiweke hi vaapostola ni “vakulukumba” van’wana lava wupfeke hi tlhelo ra moya. Vandlha rin’wana ni rin’wana a ri hlawule valanguteri, kumbe vakulu ni malandza ya vutirheli. (Mintirho 15:6; Vafilipiya 1:1) Ku yingisa lava rhangelaka a swi kondletela vun’we.—Vaheveru 13:17.

13. Xana Yehovha u va koka njhani vanhu, naswona vuyelo bya leswi hi byihi?

¹³ Xana maendlelo lawa hinkwawo ma kombisa leswaku vun’we bya vagandzeri va Yehovha byi nga fanela hi ku va ni vurhangeri bya matimba lebyi nga riki na ntwela-vusiwana? Nikatsongo! Ku hava ku pfumaleka ka rirhandzu eka Xikwembu ni nhlengeletano ya xona. Yehovha u koka vanhu hi ku va kombisa rirhandzu, naswona lembe rin’wana ni rin’wana madzana ya magidi ma va xiphemu xa nhlengeletano ya Yehovha hi ku tirhandzela na hi ku swi tsakela hi ku va lava khuvuriwaka ku nga mfungho wa ku tinyiketela ka vona hi mbilu hinkwayo eka Xikwembu. Langutelo ra vona ra mianakanyo ri fana ni leriya ra Yoxuwa, loyi a khutazeke Vaisrayele-kulobye a ku: “Hlawulani namuntlha loyi mi ranḍaka ku ṅwi tirela . . . Loko nḍi ri mina ni yindlu ya mina, hi ta tirela Yehova.”—Yoxuwa 24:15.

14. Ha yini hi nga vulaka leswaku nhlengeletano ya Yehovha i ya le tilweni?

¹⁴ Tanihi xiphemu xa ndyangu wa Yehovha, a hi lo tsaka ntsena, kambe hi sirhelelekile. Leswi swi tano hikuva nhlengeletano ya yena i ya le tilweni. Mfumo wa Xikwembu i wa le tilweni (ri huma eka Xigriki the·osʹ, xikwembu, na kraʹtos, ku fuma). I ku fuma ka Xikwembu, loku vekiweke ni ku simekiwa hi yena. “Tiko leri hlawulekeke” leri totiweke ra Yehovha ri titsongahatela ku fuma ka yena naswona hikwalaho ri lawuriwa hi Xikwembu. (1 Petro 2:9) Tanihi leswi hi nga ni Mufumi Lonkulu wa le Tilweni, Yehovha, tanihi Muavanyisi wa hina, Munyiki wa hina wa Nawu ni Hosi, hi fanele hi titwa hi sirhelelekile. (Esaya 33:22) Kambe, ku vuriwa yini hi loko ku pfuka mholovo yo karhi kutani yi xungeta ntsako, nsirhelelo ni vun’we bya hina?

Huvo Leyi Fumaka Yi Teka Goza

15, 16. Hi kwihi ku kanetana loku veke kona eka lembe-xidzana ro sungula, naswona ha yini?

¹⁵ Leswaku ku hlayisiwa vun’we bya ndyangu, ku kanetana ku nga ha lava ku lulamisiwa nkarhi na nkarhi. Kutani, a hi nge a ku laveka leswaku ku lulamisiwa xiphiqo xo karhi hi tlhelo ra moya leswaku ku hlayisiwa vun’we bya ndyangu wa vagandzeri va Xikwembu hi lembe-xidzana ro sungula C.E. Xana a ku fanele ku endliwa yini? Huvo leyi fumaka a yi teka goza, yi endla swiboho etimhakeni ta moya. Hi ni rhekhodo ya le Matsalweni ya xiendlo xo tano.

¹⁶ Kwalomu ka 49 C.E., huvo leyi fumaka yi hlanganile eYerusalema leswaku yi lulamisa xiphiqo lexikulu xisweswo a ku hlayisiwa vun’we bya “ndyangu wa [Xikwembu].” (Vaefesa 2:19) Kwalomu ka malembe ya 13 emahlweninyana, muapostola Petro u chumayele Korneliyo, ni Vamatiko vo sungula, kumbe vanhu va matiko, kutani va va vapfumeri lava khuvuriweke. (Mintirho, ndzima 10) Hi nkarhi wa riendzo ra Pawulo ro sungula ra vurhumiwa, Vamatiko vo tala va amukele Vukreste. (Mintirho 13:1–14:28) Entiyisweni, vandlha ra Vakreste lava nga Vamatiko a ri simekiwile le Antiyoka, eSiriya. Vakreste van’wana va Vayuda a va anakanya leswaku vanhu va Vamatiko lava hundzukeke va fanele va yimbisiwa ni ku hlayisa Nawu wa Muxe, kambe van’wana a va nga pfumelelani na swona. (Mintirho 15:1-5) Ku kanetana loku a ku ta va ku yise eka ku nga twanani loku heleleke, hambi ku ri ku vumba mavandlha ya Vayuda ni Vamatiko lama hambaneke. Hikwalaho huvo leyi fumaka yi teke goza ra xihatla leswaku yi hlayisa vun’we bya Vukreste.

17. Hi rihi endlelo ra vun’we ra le tilweni leri hlamuseriwaka eka Mintirho ndzima 15?

¹⁷ Hi ku ya hi Mintirho 15:6-22, “vaapostola ni vakulukumba va hlengeletana ku kamba mhaka leyi.” Van’wana lava a va ri kona, a va katsa vapfhumba lava humaka eAntiyoka. Petro u sungule hi ku hlamusela leswaku ‘hi nomu wa yena vanhu va matiko va twe mahungu lamanene kutani va pfumela.’ Kutani “nhlengeletano hinkwayo” yi yingisa Barnaba na Pawulo loko va rungula “hilaha Xikwembu xi va tirhiseke hakona ku endla mahlori ni swihlamariso leswo tala exikarhi ka vamatiko,” kumbe vanhu Vamatiko. Yakobo yena u ringanyete ndlela leyi mhaka yi nga lulamisiwaka ha yona. Endzhaku ka loko huvo leyi fumaka yi endle xiboho, ha byeriwa: “Vaapostola ni vakulukumba, swin’we ni [vandlha] hinkwa[ro], va twanana ku hlawula vavanuna van’wana exikarhi ka vona, va va rhumela eAntiyoka va ri na Pawulo na Barnaba.” ‘Vavanuna [volavo] lava hlawuriweke’—Yuda na Silasi—va yise papila leri khutazaka eka vapfumeri-kulobye.

18. Huvo leyi fumaka yi endle xiboho xihi lexi katsaka Nawu wa Muxe, naswona xana leswi swi va khumbe njhani Vakreste va Vayuda ni Vamatiko?

¹⁸ Papila leri tivisaka xiboho xa huvo leyi fumaka ri sungule hi marito lama nge: “Hina vaapostola ni vakulukumba, hi nga vamakwenu eHosini, eka n’wina vamakwerhu mi nga velekiwa mi ri vamatiko, n’wina mi nga le Antiyoka, ni le Siriya, ni le Kilikiya: Xewani!” Van’wana va hlanganyerile enhlengeletanweni leyi ya matimu, kambe handle ko kanakana huvo leyi fumaka a yi vumbiwa hi “vaapostola ni vakulukumba.” Moya wa Xikwembu wu va kongomisile, hikuva papila ri ri: “Moya lowo Kwetsima swin’we na hina, hi vonile leswaku a hi nga mi rhwexi ndzhwalo wun’wana, loko wu nga ri wa tifanelo leti: Hileswaku mi tshika tinyama leti tlhaveriweke swikwembu swa hava, mi nga dyi ngati ni leswi vanhu va swi dlayeke hi ku swi tlimba minkolo, mi tshika ni vuoswi.” (Mintirho 15:23-29, xiitaliki i xerhu.) Vakreste a ku nga laveki va yimbisiwa ni ku hlayisa Nawu wa Muxe. Xiboho lexi xi pfune Vakreste va Vayuda ni Vamatiko leswaku va endla ni ku vulavula hi vun’we. Mavandlha ma tsaka, naswona a ma ri ni vun’we bya risima lebyi yaka emahlweni, hilaha swi nga hakona endyangwini wa Xikwembu wa misava hinkwayo namuntlha, ehansi ka nkongomiso wa moya wa Huvo leyi Fumaka ya Timbhoni ta Yehovha.—Mintirho 15:30-35.

Tirhani Hi Vun’we Lebyi Lawuriwaka Hi Xikwembu

19. Ha yini vun’we byi ye emahlweni byi kula endyangwini wa vagandzeri va Yehovha?

¹⁹ Vun’we byi ya emahlweni byi kula loko swirho swa ndyangu swi tirhisana. Sweswo swi tano ni le ndyangwini wa vagandzeri va Yehovha. Hi ku tirha hi ku lawuriwa hi Xikwembu, vakulu ni van’wana evandlheni ra lembe-xidzana ro sungula va tirhele Xikwembu hi ntirhisano lowukulu ni huvo leyi fumaka naswona a va amukela swiboho swa yona. Hi ku pfuniwa hi huvo leyi fumaka, vakulu va ‘chumayele rito’ naswona swirho swa mavandlha hi ntolovelo ‘a swi vulavula hi ku twanana.’ (2 Timotiya 4:1, 2; 1 Vakorinto 1:10) Kutani mintiyiso ya Matsalwa leyi fanaka a yi nyikeriwa evutirhelini ni le minhlanganweni ya Vukreste, ku nga ha va ku ri eYerusalema, eAntiyoka, eRhoma, eKorinto, kumbe kwihi na kwihi. Vun’we byolebyo lebyi lawuriwaka hi Xikwembu byi kona namuntlha.

20. Leswaku hi hlayisa vun’we bya hina bya Vukreste, hi fanele hi endla yini?

²⁰ Leswaku hi hlayisa vun’we bya hina, hinkwerhu ka hina lava hi nga xiphemu xa ndyangu wa Yehovha wa misava hinkwayo, hi fanele hi lwela ku kombisa rirhandzu leri lawuriwaka hi Xikwembu. (1 Yohane 4:16) Hi fanele hi titsongahatela ku rhandza ka Xikwembu kutani hi kombisa xichavo lexi enteke eka ‘nandza lowo tshembeka’ ni le ka Huvo leyi Fumaka. Ina, tanihi ku tinyiketela ka hina eka Xikwembu, ku yingisa ka hina i ka ku tirhandzela ni loku tsakisaka. (1 Yohane 5:3) Wa nga vona ndlela leyi swi fanelaka ha yona leswi mupisalema a faniseke ntsako ni ku yingisa! U yimbelerile: “Ḍunisani Yehova! Ku katekile munhu l’a tšhav̌aka Yehova, a ṭakelaka ngopfu milawu ya yena.”—Pisalema 112:1.

21. Xana hi nga kombisa njhani leswaku hi lawuriwa hi Xikwembu?

²¹ Yesu, Nhloko ya vandlha, u lawuriwa hi Xikwembu hilaha ku heleleke naswona minkarhi hinkwayo u endla ku rhandza ka Tata wa yena. (Yohane 5:30) Hikwalaho, a hi landzeleni Xikombiso xa hina hi ku endla ku rhandza ka Yehovha hi ku lawuriwa hi yena na hi vun’we, hi tirhisana swinene ni nhlengeletano ya Yena. Kutani hi ntsako lowu humaka embilwini ni ku nkhensa, hi nga phindha risimu ra mupisalema: “Langutani! a hi ku ṭakisa ka ŝona, ni ku nanḍiha, loko mašaka ma hanya ŝiṅwe, ma twanana.”

A Wu Ta Hlamurisa Ku Yini?

◻ Xana vun’we bya hina bya Vukreste byi nga fanisiwa ni lebyi nga eka Pisalema 133 hi ndlela yihi?

◻ Hi swihi swiphemu swin’wana leswi kondletelaka vun’we?

◻ Ha yini fambiselo ra le tilweni ri ri ra nkoka eka vun’we bya vanhu va Xikwembu?

◻ Xana huvo leyi fumaka ya lembe-xidzana ro sungula yi endlise ku yini leswaku yi hlayisa vun’we?

◻ Xana ku tirha hi vun’we lebyi lawuriwaka hi Xikwembu swi vula yini eka wena?

[Xifaniso lexi nga eka tluka 13]

Huvo leyi fumaka yi teke goza leswaku yi hlayisa vun’we