Hlayisani Vun’we eMasikwini Lawa Ya Makumu
“Mahanyelo ya n’wina ma fanele ku fambelana ni Evhangeli . . . , [mi yima] mi tiyile emoyeni wun’we, mi lwa swin’we hi mbilu yin’we, mi lwela ku pfumela loku tisiwaka hi Evhangeli.”—VAFILIPIYA 1:27.
1. Hi kwihi ku hambana loku nga kona exikarhi ka Timbhoni ta Yehovha ni misava?
LAWA i “[masiku] ya makumu.” Handle ko kanakana, “minkarhi yo nonon’hwa” yi fikile. (2 Timotiya 3:1-5) “[E]nkarini [lowu] wa makumu,” hikwalaho ka mpfilumpfilu wa vandla ra vanhu, Timbhoni ta Yehovha ti tiveka tanihi leti hambaneke swinene hikwalaho ka ku rhula ni vun’we bya tona. (Daniyele 12:4) Kambe munhu un’wana ni un’wana la nga xirho xa ndyangu lowu wa misava hinkwayo wa vagandzeri va Yehovha ku laveka a tikarhata swinene leswaku a hlayisa vun’we lebyi.
2. Xana Pawulo u vule yini malunghana ni ku hlayisa vun’we, naswona i xivutiso xihi lexi hi nga ta xi kambisisa?
2 Muapostola Pawulo u khutaze Vakreste-kulobye leswaku va hlayisa vun’we. U tsarile: “Mahanyelo ya n’wina ma fanele ku fambelana ni Evhangeli ya Kriste, leswaku hambi ndzi ta ku ta mi vona, hambi ndzi nga ti, ndzi ta twa leswaku ma ha yimile mi tiyile emoyeni wun’we, mi lwa swin’we hi mbilu yin’we, mi lwela ku pfumela loku tisiwaka hi Evhangeli. Naswona mi nga chavisiwi nikutsongo hi lava lwaka na n’wina; hi ndlela leyi va ta swi vona leswaku va tsandzeka, ni leswaku n’wina ma hlula, kutani sweswo swi huma eka Xikwembu.” (Vafilipiya 1:27, 28) Marito ya Pawulo ma swi kombisa kahle leswaku hi fanele hi tirha swin’we tanihi Vakreste. Kutani, i yini lexi nga ta hi pfuna leswaku hi hlayisa vun’we bya hina bya Vukreste eminkarhini leyi leyi ringaka?
Titsongahatele Ku Rhandza Ka Xikwembu
3. Xana Vamatiko vo sungula lava nga yimbisiwangiki va ve valandzeri va Kreste rini, naswona hi ndlela yihi?
3 Ndlela yin’wana yo hlayisa vun’we bya hina i ku titsongahatela ku rhandza ka Xikwembu minkarhi hinkwayo. Leswi swi nga ha lava ku lulamisa mianakanyo ya hina hi ndlela yo karhi. Tsundzuka vadyondzisiwa vo sungula va Yesu Kreste va Vayuda. Loko muapostola Petro a sungule ku chumayela eka Vamatiko lava nga yimbangiki hi 36 C.E., Xikwembu xi chululele moya lowo kwetsima ehenhla ka vanhu lava va matiko, naswona va khuvuriwile. (Mintirho, ndzima 10) Ku fikela enkarhini wolowo, a ko va Vayuda, vanhu lava hundzukeleke eka Vuyuda ntsena ni Vasamariya lava veke valandzeri va Yesu Kreste.—Mintirho 8:4-8, 26-38.
4. Endzhaku ko hlamusela leswi humeleleke malunghana na Korneliyo, xana Petro u vule yini, naswona leswi swi pfuxele vadyondzisiwa va Yesu va Vayuda ndzingo wihi?
4 Loko vaapostola ni vamakwavo lavan’wana eYerusalema va twe hi ta ku hundzuka ka Korneliyo ni Vamatiko van’wana, a va tsakela ku twa xiviko xa Petro. Endzhaku ko hlamusela leswi humeleleke malunghana na Korneliyo ni Vamatiko van’wana lava hundzukeke, muapostola u gimete hi marito lawa: “Kutani ke, leswi Xikwembu [Vamatiko volavo lava pfumeleke] xi va nyikeke nyiko [ya moya lowo kwetsima] leyi fanaka ni leyi hi nga yi kuma hina [Vayuda], hi ku pfumela eka Hosi Yesu Kriste, xana a ndzi ri mani mina ku alela Xikwembu xana?” (Mintirho 11:1-17) Leswi swi tise ndzingo eka valandzeri va Yesu Kreste va Vayuda. Xana a va ta titsongahatela ku rhandza ka Xikwembu, kutani va amukela Vamatiko lava pfumeleke tanihi vagandzeri-kulobye? Kumbe xana vun’we bya malandza ya Yehovha ya laha misaveni a byi ta va ekhombyeni?
5. Xana vaapostola ni vamakwavo van’wana va angurise ku yini emhakeni ya leswaku Xikwembu xi pfumelele Vamatiko leswaku va hundzuka, naswona hi nga dyondza yini eka langutelo leri?
5 Mhaka yi ri: “Loko [vaapostola ni vamakwavo lavan’wana] va twa timhaka teto, va miyela va nga ha vileli; kutani va dzunisa Xikwembu, va ku: ‘Loko swi ri tano, na vona vamatiko Xikwembu xi va nyikile ku hundzuka loku yisaka evutomini.’” (Mintirho 11:18) Langutelo rolero ri hlayisile ri tlhela ri kondletela vun’we bya valandzeri va Yesu. Hi nkarhinyana wo koma, ntirho wo chumayela wu ye emahlweni exikarhi ka Vamatiko, kumbe vanhu va matiko, naswona nkateko wa Yehovha a wu ri ehenhla ka mintirho yo tano. Na hina hi fanele hi amukela loko ntirhisano wa hina wu komberiwa malunghana ni ku vumbiwa ka vandlha lerintshwa kumbe loko ku endliwe ndzulamiso wo karhi wa swa le tilweni ehansi ka nkongomiso wa moya lowo kwetsima wa Xikwembu. Ntirhisano wa hina wa mbilu hinkwayo wu ta tsakisa Yehovha, naswona wu ta hi pfuna ku hlayisa vun’we bya hina emasikwini lawa ya makumu.
Namarhela eNtiyisweni
6. Hi byihi vuyelo lebyi ntiyiso wu nga na byona eka vun’we bya vagandzeri va Yehovha?
6 Tanihi xiphemu xa ndyangu wa vagandzeri va Yehovha, hi hlayisa vun’we hikuva hinkwerhu ka hina hi “dyondzisiwa hi Xikwembu” naswona hi namarhela swinene entiyisweni wa xona lowu paluxiweke. (Yohane 6:45; Pisalema 43:3) Tanihi leswi tidyondzo ta hina ti sekeriweke eRitweni ra Xikwembu, hinkwerhu ka hina hi vulavula hi ku twanana. Hi swi amukela hi ntsako swakudya swa moya leswi humaka eka Yehovha hi ku tirhisa “nandza la tshembekaka, wo tlhariha.” (Matewu 24:45-47) Dyondzo yoleyo leyi fanaka yi hi pfuna ku hlayisa vun’we bya hina emisaveni hinkwayo.
7. Loko hi nonon’hweriwa hi ku twisisa yinhla yo karhi, i yini lexi hi faneleke hi xi endla, naswona i yini lexi hi nga fanelangiki hi xi endla?
7 Ku vuriwa yini hi loko hina ha un’we-un’we hi nonon’hweriwa ku twisisa kumbe ku amukela yinhla yo karhi? Hi fanele hi khongelela vutlhari hi tlhela hi endla ndzavisiso eMatsalweni ni le tibukwini ta Vukreste. (Swivuriso 2:4, 5; Yakobo 1:5-8) Ku burisana ni nkulu swi nga pfuna. Loko yinhla yi nga si twisisiwa, swi nga antswa ku tshika mhaka yoleyo. Kumbexana rungula leri engetelekeke malunghana ni yinhla yoleyo ri ta kandziyisiwa, kutani ku twisisa ka hina ku engeteleka. Hambiswiritano, swi ta va swi hoxile ku ringeta ku khorwisa van’wana evandlheni leswaku va amukela langutelo ra hina leri hambaneke. Leswi ku ta va ku ri ku byala mholovo, ku nga ri ku tikarhatela ku hlayisa vun’we. Wa nga vona ndlela leyi swi antswaka ha yona ‘ku hambeta hi famba entiyisweni’ ni ku khutaza van’wana ku endla tano!—3 Yohane 4.
8. Hi rihi langutelo leri faneleke malunghana ni ntiyiso?
8 Eka lembe-xidzana ro sungula, Pawulo u te: “Sweswi hi vona hi riphume exivonini; kambe enkarhini wolowo, hi ta langutana hi mahlo; sweswi vutivi bya mina a byi hetisekanga, kambe enkarhini wolowo ndzi ta tiva hi ku hetiseka, tanihi leswi Xikwembu na xona xi ndzi tiveke hi ku hetiseka.” (1 Vakorinto 13:12) Hambileswi Vakreste vo sungula a va nga byi twisisi hinkwabyo vuxokoxoko bya kona, va tshame va ri ni vun’we. Sweswi hi xi twisisa kahle xikongomelo xa Yehovha ni Rito rakwe ra ntiyiso. Hikwalaho a hi wu tlangeleni swinene ntiyiso lowu hi wu kumeke hi ‘nandza lowo tshembeka wa vutlhari.’ Naswona a hi nkhenseni leswi Yehovha a hi rhangeleke hi ku tirhisa nhlengeletano ya yena. Hambileswi a hi nga ri na vutivi lebyi ringanaka minkarhi hinkwayo, a hi nga siki kumbe ku va ni torha hi tlhelo ra moya. Ematshan’weni ya sweswo, Murisi wa hina Yehovha, u hi hlanganisile naswona u hi khathalerile swinene.—Pisalema 23:1-3.
Tirhisa Ririmi Hi Ndlela Leyinene!
9. Xana ririmi ri nga tirhisiwa njhani leswaku ku kondleteriwa vun’we?
9 Ku tirhisa ririmi leswaku ku khutaziwa van’wana i ndlela ya nkoka yo kondletela vun’we ni moya wa vumakwerhu. Papila leri lulamiseke mhaka leyi nga malunghana ni ku yimbisiwa, hilaha ri rhumeriweke ha kona hi huvo leyi fumaka ya lembe-xidzana ro sungula, ri ve xikhutazo lexikulu. Endzhaku ko ri hlaya, vadyondzisiwa va Vamatiko le Antiyoka “va tsakisiw[e] ngopfu hi marito lawa ya ku va khongotela.” Yuda na Silasi, lava a va rhumeriwe va suka eYerusalema ni papila, “va khongoterile vamakwavo hi marito layo tala, va va tiyisa.” Handle ko kanakana, ku va kona ka Pawulo na Barnaba ku tlhele ku khutaza ni ku tiyisa vapfumeri-kulobye le Antiyoka. (Mintirho 15:1-3, 23-32) Hi nga endla hilaha ku fanaka loko hi ri swin’we eminhlanganweni ya Vukreste kutani ‘hi khutazana’ hi ku va kona na hi tinhlamulo leti akaka.—Vaheveru 10:24, 25.
10. Leswaku ku hlayisiwa vun’we, i yini lexi faneleke xi endliwa loko ku va ni ku rhukaniwa?
10 Hambiswiritano ku tirhisiwa ka ririmi hi ndlela yo biha swi nga xungeta vun’we bya hina. Mudyondzisiwa Yakobo u tsarile, “Ririmi i xirho lexitsongo, kambe ri tidzunisa ngopfu hi leswikulu. Vonani hilaha xihlahla lexikulu xi nga hisiwaka hakona hi ndzilonyana lowutsongo!” (Yakobo 3:5) Yehovha u venga lava vangaka timholovo. (Swivuriso 6:16-19) Ku vulavula ko tano ku nga vanga ku avana. Kutani ke, ku vuriwa yini loko un’wana a vula marito ya nhlambha, a rhuketela un’wana kumbe a n’wi tseketsela? Vakulu va ta ringeta ku pfuna mudyohi. Hambiswiritano, murhukani la nga hundzukiki u fanele ku susiwa leswaku ku rhula, nhleleko ni vun’we bya vandlha swi hlayisiwa. Hambiswiritano, Pawulo u tsarile: “Mi nga tolovelani ni loyi a vuriwaka ‘makwerhu’ kasi i . . . murhukani . . . , hambi ku ri ku dya mi nga dyi na yena.”—1 Vakorinto 5:11.
11. Ha yini ku titsongahata ku ri ka nkoka loko hi vule xo karhi lexi vangeke ku avana exikarhi ka hina ni vapfumeri-kulorhi?
11 Ku lawula ririmi swi hi pfuna ku hlayisa vun’we. (Yakobo 3:10-18) Kambe a hi nge swin’wana leswi hi swi vuleke swi vange mholovo exikarhi ka hina ni Mukreste-kulorhi. Xana a swi nga ta va swinene ku teka goza ro sungula hi lulamisa mhaka ni makwerhu, hi kombela ndzivalelo loko swi fanerile? (Matewu 5:23, 24) I ntiyiso, leswi swi lava ku titsongahata, kumbe mianakanyo ya ku titsongahata, kambe Petro u tsarile: “Ambalani ku titsongahata, mi tiveka ehansi, van’wana eka van’wana, hikuva va khale va te: ‘Xikwembu xi alela lava tikurisaka, kambe xi tsetselela lava titsongahataka.’” (1 Petro 5:5) Ku titsongahata swi ta hi vangela leswaku hi ‘va ni ku rhula’ ni vamakwerhu, hi amukela swihoxo swa hina ni ku kombela ndzivalelo hi ndlela leyinene. Leswi swi pfuna ku hlayisa vun’we bya ndyangu wa Yehovha.—1 Petro 3:10, 11.
12. Xana hi nga ri tirhisa njhani ririmi leswaku hi kondletela ni ku hlayisa vun’we bya vanhu va Yehovha?
12 Hi nga yisa moya wa ndyangu emahlweni exikarhi ka lava nga enhlengeletanweni ya Yehovha loko hi tirhisa ririmi ra hina hi ndlela leyinene. Tanihi leswi sweswo ku nga leswi Pawulo a swi endleke, u tsundzuxe Vatesalonika a ku: “Ma swi tiva leswaku hi hlayisile un’wana ni un’wana wa n’wina tanihi loko tatana a hlayisa vana va yena; hi mi khongoterile, hi mi tiyisile ni ku mi susumeta leswaku mi hanya hi mukhuva lowu tsakisaka Xikwembu.” (1 Vatesalonika 2:11, 12) Hi ku va a veke xikombiso lexinene emhakeni leyi, Pawulo u khutaze Vakreste-kulobye ku “tiyisa lava helaka ntamu.” (1 Vatesalonika 5:14) Wa nga ehleketa ndlela leyi hi nga vaka hi endla kahle ha yona hi ku tirhisa ririmi ra hina ku chavelela, ku khutaza ni ku aka van’wana. Ina, “rito le’ri humesiwaka hi nkari lowu fanekelaka ra nanḍiha ŝonghasi!” (Swivuriso 15:23) Ku tlula kwalaho, ku vulavula ko tano ku pfuna ku kondletela ni ku hlayisa vun’we bya vanhu va Yehovha.
Rivalela!
13. Ha yini hi fanele hi rivalela?
13 Ku rivalela mudyohi loyi a kombeleke ndzivalelo i swa nkoka leswaku hi ta hlayisa vun’we bya Vukreste. Naswona xana hi fanele hi rivalela kangani? Yesu u byele Petro a ku: “A ndzi ku byeli ku n’wi rivalela ka 7, kambe ndzi ri ka 7 loku andzisiwaka hi 70.” (Matewu 18:22) Loko hi nga rivaleli, hi titekela ntsako wa hina vini. Hi ndlela yihi? Phela, rivengo ni ku va ni xikhomela swi ta hi tekela ku rhula ka mianakanyo. Naswona loko hi sungula ku tiveka hikwalaho ka tindlela ta tihanyi ni ta ku nga rivaleli, hi nga ha tivangela ku khiriwa. (Swivuriso 11:17) Ku va ni xikhomela a swi xi tsakisi Xikwembu naswona swi nga yisa eka xidyoho lexikulu. (Levhitika 19:18) Tsundzuka leswaku Yohane Mukhuvuri u tsemiwe nhloko hikwalaho ka rhengu leri kunguhatiweke hi Heroda lowo biha, loyi a ri ni ‘xikhomela’ hi yena.—Marka 6:19-28.
14. (a) Xana Matewu 6:14, 15 yi hi dyondzisa yini malunghana ni ku rivalela? (b) Xana minkarhi hinkwayo hi fanele hi yimela ku komberiwa emahlweni ka ku va hi rivalela un’wana?
14 Xikhongelo xa Yesu xa xikombiso xi katsa marito lama nge: “Hi rivalele swidyoho swa hina, hikuva na hina hi rivalela mani na mani la nga ni nandzu eka hina.” (Luka 11:4) Loko hi nga rivaleli, hi ta va ekhombyeni ra leswaku siku rin’wana Yehovha Xikwembu a nge he hi rivaleli swidyoho swa hina, hikuva Yesu u te: “Loko mi rivalela vanhu swidyoho swa vona, Tata wa n’wina wa le tilweni ú ta mi rivalela na n’wina; kambe loko mi nga rivaleli van’wana, Tata wa n’wina na yena a nga ka a nga mi rivaleli swidyoho swa n’wina.” (Matewu 6:14, 15) Kutani loko hi lava ku endla xiphemu xa hina hakunene eku hlayiseni ka vun’we endyangwini wa vagandzeri va Yehovha, hi ta rivalela, kumbexana hambi ku ri ku rivala nandzu lowu endliweke hikwalaho ka ku nga anakanyi ni lowu ku nga riki hi xikongomelo lexo biha. Pawulo u te: “Amukelanani, kutani loko un’wana a vilela hi un’wana, a va rivalelane. Kukota leswi Hosi yi mi rivaleleke, na n’wina rivalelanani.” (Vakolosa 3:13) Loko hi rivalela, hi pfuneta ku hlayisa vun’we bya risima bya nhlengeletano ya Yehovha.
Vun’we Ni Swiboho Swa Munhu Hi Xiyexe
15. I yini lexi pfunaka vanhu va Yehovha ku hlayisa vun’we loko va endla swiboho swa munhu hi xiyexe?
15 Xikwembu xi hi endle hi ri vanhu lava ntshunxekeke lava nga ni lunghelo ni vutihlamuleri byo endla swiboho swa munhu hi xiyexe. (Deteronoma 30:19, 20; Vagalatiya 6:5) Kambe, ha swi kota ku hlayisa vun’we bya hina hikuva hi fambisana ni milawu ni misinya ya milawu ya Bibele. Hi yi tekela enhlokweni loko hi endla swiboho swa munhu hi xiyexe. (Mintirho 5:29; 1 Yohane 5:3) A hi nge ku tlakuka xivutiso malunghana ni vukala-tlhelo. Hi nga endla xiboho xa munhu hi xiyexe lexi tivekaka hi ku tsundzuka leswaku a hi “va misava” ni leswaku hi ‘fule mabanga ya hina ma va swikomu.’ (Yohane 17:16; Esaya 2:2-4) Hilaha ku fanaka, loko hi fanele hi endla xiboho xa munhu hi xiyexe malunghana ni vuxaka bya hina ni Mfumo, hi kambisisa leswi Bibele yi swi vulaka mayelana ni ku nyika “Xikwembu leswi nga swa Xikwembu,” loko hi ri karhi hi titsongahatela ‘valawuri lava tlakukeke’ etimhakeni ta tiko. (Luka 20:25; Varhoma 13:1-7; Tito 3:1, 2) Ina, ku tekela enhlokweni milawu ni misinya ya milawu ya Bibele loko hi endla swiboho swa munhu hi xiyexe swi hi pfuna ku hlayisa vun’we bya hina bya Vukreste.
16. Xana hi nga byi hlayisa njhani vun’we loko hi endla swiboho leswi hi nga taka hi nga vuli leswaku swi lulamile kumbe a swi lulamanga hi ku ya hi Matsalwa? Kombisa.
16 Hi nga pfuna ku hlayisa vun’we bya Vukreste hambiloko hi endla xiboho lexi ngo va xa munhu hi xiyexe hilaha ku heleleke lexi hi nga ta ka hi nga vuli leswaku xi lulamile kumbe a xi lulamanga hi ku ya hi Matsalwa. Hi ndlela yihi? Hi ku kombisa nkhathalelo wa rirhandzu hi van’wana lava nga ha khumbiwaka hi xiboho xa hina. Hi xikombiso: Le vandlheni eKorinto wa khale, ku tlakuke xivutiso malunghana ni nyama leyi tlhaveriweke swikwembu swa hava. Kavula, Mukreste a a nga ta hlanganyela eka nkhuvo wa swikwembu swa hava. Hambiswiritano, a ku nga ri xidyoho ku dya nyama leyi dlayiweke leyi saleke ya muxaka wolowo leyi a yi xavisiwa emakete wa mani na mani. (Mintirho 15:28, 29; 1 Vakorinto 10:25) Hambiswiritano, mapfalo ya Vakreste van’wana a ma karhatiwa hi ku dya nyama ya muxaka lowu. Hikwalaho Pawulo u khutaze Vakreste lavan’wana leswaku va papalata ku khunguvanyisa van’wana. Entiyisweni, u tsarile: “Loko swakudya swi khunguvanyisa makwerhu, ndzi nga ka ndzi nga ha dyi nyama ni siku ni rin’we, leswaku ndzi nga tshuki ndzi vangela makwerhu ku khunguvanyeka.” (1 Vakorinto 8:13) Kutani hambi ku nga katseki nawu kumbe nsinya wa nawu wa Bibele, wa nga vona ndlela leyi ku nga ku kombisa rirhandzu ha yona ku anakanyela van’wana loko ku endliwa swiboho swa munhu hi xiyexe leswi nga khumbaka vun’we bya ndyangu wa Xikwembu!
17. I yini lexi ku bumabumeriwaka leswaku hi xi endla loko hi fanele hi endla swiboho swa munhu hi xiyexe?
17 Loko hi nga tiyiseki hi goza leri hi faneleke hi ri teka, i vutlhari ku anakanya hi ndlela leyi nga ta hi siya ni ripfalo leri baseke, naswona van’wana va fanele va xixima xiboho xa hina. (Varhoma 14:10-12) Kavula, loko hi fanele hi endla xiboho xa munhu hi xiyexe, hi fanele hi lava nkongomiso wa Yehovha hi xikhongelo. Ku fana ni mupisalema, hi nga khongela hi ku tiyiseka hi ku: “Wa nga nḍi yingisa, . . . Hikuv̌a hi wena ribye ra mina ni khokholo ra mina; hikwalaho ka v̌ito ra wena, u ta nḍi komba ndlela, u nḍi fambisa.”—Pisalema 31:2, 3.
Hlayisa Vun’we Bya Vukreste Minkarhi Hinkwayo
18. Xana Pawulo u byi kombise njhani vun’we bya vandlha ra Vukreste?
18 Eka 1 Vakorinto ndzima 12, Pawulo u tirhise miri wa munhu ku kombisa vun’we bya vandlha ra Vukreste. U kandziyise ku titshega hi van’wana ni nkoka lowu xirho xin’wana ni xin’wana xi nga na wona. Pawulo u vutisile: “Loko swirho hinkwaswo a swi endla xirho xin’we, miri a wu ta va kwihi ke? Hilaha swi nga hakona, swirho swi tele, kambe miri i wun’we. Tihlo ri nga ka ri nga byeli voko ri ku: ‘A ndzi na mhaka na wena.’ Kumbe nhloko yi nga ka yi nga byeli milenge, yi ku: ‘A ndzi na mhaka na n’wina.’” (1 Vakorinto 12:19-21) Hilaha ku fanaka, a hi hinkwerhu ka hina endyangwini wa vagandzeri va Yehovha hi tirhaka ntirho lowu fanaka. Kambe, hi ni vun’we naswona ha lavana.
19. Xana hi nga vuyeriwa njhani eka malunghiselelo ya Xikwembu ya moya, naswona makwerhu un’wana la kuleke u vule yini emhakeni leyi?
19 Tanihi leswi miri wu lavaka swakudya, nkhathalelo ni nkongomiso, hi lava malunghiselelo ya moya lawa Xikwembu xi hi nyikaka wona hi ku tirhisa Rito, moya ni nhlengeletano ya xona. Leswaku hi vuyeriwa eka malunghiselelo lawa, hi fanele hi va xiphemu xa ndyangu wa Yehovha wa laha misaveni. Endzhaku ka malembe yo tala a ri entirhweni wa Xikwembu, makwerhu un’wana u tsarile: “Ndzi nkhensa swinene leswi ndzi hanyeke hi ku tiva swikongomelo swa Yehovha ku sukela emasikwini wolawo yo sungula emahlweninyana ka 1914 loko ntiyiso wu nga si twisiseka swinene . . . ku fikela namuntlha loko ntiyiso wu vangama ku fana ni dyambu ra ninhlikanhi. Nchumu wa nkoka eka mina, a ku ri ku namarhela swinene eka nhlengeletano ya Yehovha leyi vonakaka. Ntokoto wa mina wo sungula wu ndzi dyondzise ndlela leyi swi nga twaliki ha yona ku titshega hi ku anakanyisisa ka vanhu. Loko ndzi ta va ndzi xalamukele yinhla yoleyo, ndzi tiyimisele ku tshama enhlengeletanweni leyi tshembekaka. Xana munhu a nga kuma ku tsakeriwa ni nkateko wa Yehovha hi ndlela yihi?”
20. I yini lexi hi faneleke hi tiyimisela ku xi endla mayelana ni vun’we bya hina tanihi vanhu va Yehovha?
20 Yehovha u humese vanhu va yena emunyameni ni le ku pfumalekeni ka vun’we ka misava. (1 Petro 2:9) U hi tise evun’weni swin’we ni vapfumeri-kulorhi lebyi katekisiweke hi yena n’wini. Vun’we lebyi byi ta va kona emafambiselweni ya swilo lamantshwa lama tshineleke swinene. Hikwalaho, emasikwini lawa yo nonon’hwa ya makumu, a hi yeni emahlweni hi ‘tiambexa rirhandzu’ naswona hi endla xin’wana ni xin’wana lexi hi nga xi kotaka leswaku hi kondletela ni ku hlayisa vun’we bya hina bya risima.—Vakolosa 3:14.
A Wu Ta Hlamurisa Ku Yini?
◻ Ha yini ku endla ku rhandza ka Xikwembu ni ku namarhela entiyisweni swi ta hi pfuna ku hlayisa vun’we?
◻ Xana vun’we byi fanisiwa njhani ni ku tirhisiwa lokunene ka ririmi?
◻ I yini leswi katsekaka eka ku rivalela?
◻ Xana hi nga byi hlayisa njhani vun’we loko hi endla swiboho swa munhu hi xiyexe?
◻ Ha yini u hlayisa vun’we bya Vukreste?
[Xifaniso lexi nga eka tluka 16]
Tanihi leswi murisi loyi a hlayisaka ntlhambi wa yena swin’we, Yehovha u hlayisa vanhu va yena va hlanganile
[Swifaniso leswi nga eka tluka 18]
Hi ku kombela ndzivalelo hi ku titsongahata loko hi dyohele un’wana, ha pfuneka ku kondletela vun’we