Ku Akiwa Ka Tiholo Ta Mfumo EMatikweni Man’wana Ya Le Yuropa

¹ Emalembeni lama hundzeke ntirho wa Timbhoni ta Yehovha a wu yirisiwile ematikweni yo hlayanyana ya le Yuropa, ku katsa ni le Yuropa Vuxa. Etindhawini to tala leti a ti yirisiwile eka tona, a ti khomiwa hi ndlela ya tihanyi. A ti nga swi koti ku khoma minhlangano ti ntshunxekile naswona a swi nga koteki ku va ni Holo ya Mfumo. Kambe emalembeni ya sweswinyana, “Yehovha u endle nchumu lowukulu hi leswi a hi endleke swona. Hi tsakile.”—Ps. 126:3.

² Ku sukela hi 1983, tintambhu to sivela Timbhoni ta Yehovha ti sungule ku debyisiwa. Hi 1989, Poland na Hungary ma tsarise Timbhoni ta Yehovha ximfumo. Hi 1991, Timbhoni ta Yehovha ti tsarisiwe ximfumo eRhaxiya. Ku sukela hi nkarhi wolowo ntirho wu andzile eRhaxiya ni le khale ka tirhiphabliki ta Soviet Union. Exikarhi ka March 1996 na October 1998, Huvo leyi Fumaka yi nyike mpfumelelo wa swikombelo swa 359 swo lomba mali yo aka Tiholo ta Mfumo, leswi endliweke hi marhavi lama ungamelaka matiko ya 11 ya le Yuropa.

³ Loko u ri karhi u languta swifaniso leswi nga eka xiengetelo lexi, anakanya hi swilo leswi leswikulu leswi hlamarisaka leswi Yehovha a swi endlelaka vanhu vakwe. (Ps. 136:4) Swi ta ku tsakisa ku tiva leswaku minyikelo leyi endliwaka hi vamakwerhu emisaveni hinkwayo yi tirhisiwa hi mfanelo, naswona leswi swi hetisisa marito lawa Yesu a ma vuleke eka Yohane 13:35: “Hinkwavo va ta tiva leswaku mi vadyondzisiwa va mina, loko mi rhandzana.”

⁴ Romania hi rin’wana ra matiko ya le Yuropa lama vuyeriwaka eka lunghiselelo ra ku aka Tiholo ta Mfumo ematikweni lama nga riki na mali, leri eka rona ku akiweke Tiholo ta Mfumo ta 36 ku sukela hi July 2000. Ukraine ri ake Tiholo ta Mfumo hi ku tirhisa pulani yin’we eka to tala ta tona, naswona hi lembe ra 2001 ri ake ta 61 kasi hi lembe ra 2002 ri ake tin’wana ta 76. Bulgaria, Croatia, Macedonia, Moldova, Rhaxiya na Yugoslavia ma ake madzana ya Tiholo ta Mfumo hi ku pfuniwa hi minyikelo leyi nyikeriwaka eka Nkwama wo Aka Tiholo ta Mfumo.

⁵ Ku aka Tiholo ta Mfumo a swi olovi ematikweni man’wana, kutani swi lava leswaku ku endliwa matshalatshala lamakulu ku nga si sunguriwa ku akiwa. Hakanyingi malunghiselelo ya kona ma teka nkarhi wo leha. Nakambe, ku aka Holo ya Mfumo ematikweni lawa ya le Yuropa swi durha ku tlula ematikweni yo tala ya le Afrika kumbe ya le Amerika Dzonga. Hambiswiritano, ematikweni ya le Yuropa lama nga riki na mali ka ha laveka madzana ya Tiholo ta Mfumo hikwalaho ko engeteleka ka nhlayo ya vagandzeri va Yehovha!

⁶ A hi ku hlamarisa ka swona ku vona ku engeteleka ka xihatla ko akiwa ka Tiholo leti ta Mfumo! Hilaha mintokoto yo tala yi kombisaka hakona, ku nyikeriwe vumbhoni lebyinene emigangeni leyi ti akiweke eka yona. Etindhawini tin’wana, valawuri va ndhawu va tsakisiwa hi ntirhisano lowu vamakwerhu va nga na wona eku landzeleleni ka minkongomiso ya ku aka.

⁷ Esaya a vurisile loko a profeta hi ku andza ka vugandzeri bya ntiyiso enkarhini lowu. Xikwembu xi profete hi muprofeta loyi xi ku: “Mina Yehovha, ndzi ta swi hatlisisa hi nkarhi wa swona.” (Esa. 60:22) Hakunene, malembe ya khume lama hundzeke ma ve nkarhi wa Yehovha wa leswaku ku va ni ku andza eYuropa Vuxa. Onge Yehovha a nga hambeta a hi chululela mikateko leyi fuweke eka matshalatshala ya hina ya ku hatlisisa ku akiwa ka Tiholo ta Mfumo ematikweni yo tala, loko hi ri karhi hi seketela Nkwama wo Aka Tiholo ta Mfumo! Leswi swi ta endla leswaku ku akiwa Tiholo tin’wana ta Mfumo ematikweni lama nga riki na mali. Swi ta endla leswaku vugandzeri bya ntiyiso byi andza ematikweni yo tala ya le Yuropa ni leswaku ku nyikeriwa vumbhoni lebyi engetelekeke “ku yisa emakun’wini ya misava.”—Mint. 13:47.

[Swifaniso leswi nga eka tluka 3]

Holo ya Mfumo Moscow, eRhaxiya

[Swifaniso leswi nga eka tluka 4-6]

Tiholo ta Mfumo letintshwa eYuropa Vuxa

Strumica, eMacedonia

Daruvar, eCroatia

Sokal, Lviv District, Ukraine

Bitola, eMacedonia

Mladost, eBulgaria

Plovdiv, eBulgaria

Kurdzhipskoye, Maykop, eRhaxiya

Bački Petrovac, eYugoslavia

Tlumach, Ivano-Frankivsk District, eUkraine

Rava-Ruska, LvivDistrict, eUkraine

Stara Pazova, eYugoslavia

Zenica, Bosnia na Herzegovina

Sokal, Lviv District, eUkraine

Zhydachivl, Lviv District, eUkraine