Ambalani Moya Wa Ku Titsongahata
1 Mufana la nga murisi u tshembe Yehovha kutani a hlula nhenha ya matimba. (1 Sam. 17:45-47) Wanuna la fuweke u lehise mbilu a tiyiselela makhombo. (Yobo 1:20-22; 2:9, 10) N’wana wa Xikwembu u vule leswaku xin’wana ni xin’wana lexi a xi dyondzisaka xi huma eka Tata wakwe. (Yoh. 7:15-18; 8:28) Eka swikombiso leswi hinkwaswo, hi vona moya wa ku titsongahata. Hilaha ku fanaka namuntlha, ku titsongahata i swa nkoka eka swiyimo leswi hi hlangavetanaka na swona.—Kol. 3:12.
2 Loko Hi Chumayela: Tanihi vatirheli lava nga Vakreste, hi yisa mahungu lamanene eka vanhu va mixaka hinkwayo naswona a hi va papalati hileswi va nga va rixaka rin’wana kumbe ndhavuko wun’wana. (1 Kor. 9:22, 23) Loko van’wana va kariha kumbe hi ku tikurisa va ala rungula ra Mfumo, a hi va beli huwa kambe hi ta ya emahlweni hi lava lava swi va fanelaka. (Mat. 10:11, 14) Ematshan’weni yo ringeta ku tsakisa van’wana hi vutivi bya hina kumbe dyondzo ya hina, hi tirhisa Rito ra Xikwembu, hi ku xiya leswaku ra khorwisa ku tlula nchumu wihi na wihi lowu hi nga wu vulaka. (1 Kor. 2:1-5; Hev. 4:12) Hi yisa ku dzuneka hinkwako eka Yehovha, hilaha Yesu a endleke ha kona.—Mar. 10:17, 18.
3 Evandlheni: Vakreste na vona va fanele va ‘tikhama hi mianakanyo yo titsongahata un’wana eka un’wana.’ (1 Pet. 5:5) Loko hi teka van’wana va ri lava tlakukeke eka hina, hi ta lava tindlela to tirhela vamakwerhu ku ri na ku langutela leswaku va tirhela hina. (Yoh. 13:12-17; Filp. 2:3, 4) A hi nge titeki hi tlakukile swinene lerova hi nga lavi ku tirha mintirho yo tanihi ku basisa Holo ya Mfumo.
4 Ku titsongahata ku hi pfuna leswaku hi “lehiselana mbilu hi rirhandzu” naswona ku endla leswaku evandlheni ku va ni ku rhula ni vun’we. (Efe. 4:1-3) Ku hi pfuna leswaku hi titsongahata eka lava vekiweke leswaku va rhangela. (Hev. 13:17) Ku hi susumetela ku amukela ndzayo yin’wana ni yin’wana leyi hi nga nyikiwaka yona. (Ps. 141:5) Nakambe ku titsongahata ku endla leswaku hi tiseketela hi Yehovha loko hi ri karhi hi endla swiavelo swihi ni swihi leswi hi swi kumaka evandlheni. (1 Pet. 4:11) Ku fana na Davhida, ha swi xiya leswaku munhu u humelela hi ku katekisiwa hi Xikwembu ku nga ri hikwalaho ka vuswikoti bya yena n’wini.—1 Sam. 17:37.
5 Eka Xikwembu Xa Hina: Xa nkoka ngopfu hi fanele hi ‘titsongahata ehansi ka voko ra matimba ra Xikwembu.’ (1 Pet. 5:6) Loko hi langutane ni swiyimo leswi tikaka, hi nga ha navela ntshunxeko lowu wu nga ta tisiwa hi Mfumo. Kambe hi ku titsongahata hi lehisa mbilu hi rindza Yehovha leswaku a hetisisa switshembiso swa yena hi nkarhi wa yena lowu vekiweke. (Yak. 5:7-11) Ku fana na Yobo loyi a tshameke a tshembekile, nchumu wa nkoka ngopfu eka hina hi leswaku ‘vito ra Yehovha ri ya emahlweni ri dzunisiwa.’—Yobo 1:21.
6 Muprofeta Daniyele u ‘titsongahatile emahlweni ka Xikwembu xa yena’ kutani Yehovha u n’wi kombe tintswalo a tlhela a n’wi nyika malunghelo ya ntirho wo tala. (Dan. 10:11, 12) Onge na hina hi nga ambala moya wa ku titsongahata, hi ri karhi hi tiva leswaku “ku titsongahata ni ku chava Yehovha swi tisa rifuwo, ku vangama ni vutomi.”—Swiv. 22:4.