Vantshwa—Tivekeleni Masungulo Ya Vumundzuku Lebyinene
1. Ha yini vantshwa lava nga Vakreste va fanele va hlakulela ripfumelo leri tiyeke?
1 Hi wihi nchumu lowu u tshamaka u ri karhi u anakanya ha wona? Xana u anakanya hi swilo leswi nga kona sweswi, kumbe u anakanya hi swa nkarhi lowu taka u tlhela u veka mbilu ya wena eka switshembiso swa Xikwembu? (Mat. 6:24, 31-33; Luka 8:14) Ku laveka ripfumelo leri tiyeke leswaku hi endla leswi Xikwembu xi swi vulaka, hilaha hi nga swi vonaka hakona eka xikombiso xa Abrahama ni xa Muxe. (Hev. 11:8-10, 24-26) Xana u nga ri hlakulela njhani ripfumelo ro tano kutani u ‘tivekela masungulo ya vumundzuku lebyinene’?—1 Tim. 6:19.
2. Xana hi dyondza yini eka xikombiso xa Hosi Yosiya?
2 Lavisisa Yehovha: Loko wena ni ndyangu wa ka n’wina mi ri ni xiyimiso xa timhaka ta swa moya, sweswo swa bumabumeriwa. Kambe u nga ehleketi leswaku xiyimiso xolexo xi ta endla leswaku u va ni ripfumelo leri tiyeke. Leswaku u kuma “vutivi bya Xikwembu,” u fanele u lavisisa Yehovha hi wexe. (Swiv. 2:3-5; 1 Tikr. 28:9) Hosi Yosiya u swi endlile sweswo loko a ha ri ntsongo. Hambileswi a kuleleke endyangwini lowu a wu nga ri na mhaka ni timhaka ta moya, ‘u sungule ku lava Xikwembu xa Davhida tata wakwe’ loko a ri ni malembe ya 15 hi vukhale.—2 Tikr. 34:3.
3. Xana vantshwa lava nga Vakreste namuntlha va nga n’wi lavisisa njhani Yehovha?
3 Xana u nga n’wi lavisisa njhani Yehovha? Hi ku swi kambisisa hi vukheta leswi u swi pfumelaka ni ku ‘tiyisekisa’ leswaku sweswo i ntiyiso hakunene. (Rhom. 12:2) Hi xikombiso, xana u nga hlamusela leswi Bibele yi swi vulaka malunghana ni ngati, kumbe u nga kombisa leswaku Mfumo wa Xikwembu wu sungule ku fuma ematilweni hi 1914? Ku kuma “vutivi lebyi kongomeke bya ntiyiso” i swa nkoka leswaku u tivekela masungulo lamanene ya nkarhi lowu taka.—1 Tim. 2:3, 4.
4. Xana muhuweleri loyi a nga khuvuriwangiki a nga ku kombisa njhani ku ya emahlweni ka yena?
4 Ku lavisisa ka Yosiya Xikwembu swi ve ni vuyelo lebyinene. Loko a nga si va ni malembe ya 20, u ve ni xivindzi xo herisa vugandzeri bya mavunwa etikweni. (2 Tikr. 34:3-7) Hilaha ku fanaka, nhluvuko wa vumoya bya wena wu ta tikomba hi swiendlo swa wena. (1 Tim. 4:15) Loko u ri muhuweleri la nga khuvuriwangiki, tikarhatele ku antswisa ndlela leyi u chumayelaka ha yona ensin’wini. U nga enerisiwi hi ku fambisa tibuku ntsena. Tivekele pakani ya ku tirhisa Bibele loko u hlamusela vanhu mhaka yo karhi ni loko u hlakulela ku tsakela loku munhu a ku kombisaka. (Rhom. 12:7) Leswi swi ta ku pfuna leswaku u kula hi tlhelo ra moya.
5. Hi tihi tindlela leti Vakreste lava khuvuriweke va nga ndlandlamuxaka vutirheli bya vona ha tona?
5 Nyika Yehovha Leswi Nga eMatimbeni Ya Wena: Loko u kombisa ku tinyiketela ka wena eka Yehovha hi ku khuvuriwa, u ve mutirheli wa Xikwembu la hlawuriweke. (2 Kor. 3:5, 6) Leswi swi ku pfulela tindlela ta leswaku u tirhela Yehovha nkarhi hinkwawo. Sweswo swi katsa vuphayona swin’we ni ku ya tirha eBethele ni ku nghenela Ntirho wo Aka Tiholo ta Mfumo. Nakambe tindlela tin’wana to ndlandlamuxa vutirheli bya wena i ku dyondza ririmi rin’wana kumbe ku ya tirha laha ku nga ni xilaveko lexikulu.
6. Hinkwerhu ka hina hi nga tivekela njhani masungulo lamanene ya nkarhi lowu taka?
6 Ina, a hi hinkwavo lava nga swi kotaka ku hlanganyela eka malunghelo yo tirhela Yehovha, kambe hinkwerhu hi nga swi kota ku n’wi endlela leswi nga ematimbeni ya hina. (Mat. 22:37) Ku nga khathariseki swiyimo swa wena, endla leswaku ku tirhela Yehovha ku va nchumu wa nkoka evuton’wini bya wena. (Ps. 16:5) Hi ku endla tano, u ta va u tiakela masungulo ya vumundzuku lebyinene.