Ku Hlakulela Vuxaka Bya Le Kusuhi Na Yehovha
1. Xana makwerhu un’wana wa xisati u xiye yini malunghana ni xiyimiso xa yena xa swilo swa moya?
1 Makwerhu un’wana wa xisati la nga Mukreste u te: “Se ndzi ni malembe ya 20 ndzi ri entiyisweni, ndzi ya eminhlanganweni ni le vutirhelini bya nsimu.” Hambiswiritano, u ya emahlweni a ku: “Hambileswi ku ya eminhlanganweni ni le nsin’wini swi nga swa nkoka ndzi swi vonile leswaku ku endla leswi ntsena a swi nge ndzi pfuni loko ndzi hlangana ni swiyimo swo tika. . . . Se ndza swi vona leswaku ndzi fanele ndzi lulamisa mianakanyo ya mina kutani ndzi sungula ku endla xiyimiso xa dyondzo leyi nga ni xikongomelo leswaku ndzi ta kota ku tiva Yehovha hakunene, ndzi n’wi rhandza ni ku tlangela leswi N’wana wa yena a hi nyikeke swona.”
2. Ha yini swi ri swa nkoka ku hlakulela vuxaka bya le kusuhi na Yehovha?
2 Ku aka vuxaka bya le kusuhi na Yehovha swi lava matshalatshala lamakulu. A swi vuli ku landzelela xiyimiso xa mintirho ya Vukreste ntsena. Loko hi nga vulavuli na Yehovha hi xikhongelo nkarhi na nkarhi, hi ku famba ka nkarhi a nga fana ni munhu loyi a tshameke a va munghana wa hina, loyi sweswi hi nga n’wi rivala. (Nhlav. 2:4) A hi kambisiseni ndlela leyi dyondzo ya munhu hi xiyexe ya Bibele ni xikhongelo swi nga hi pfunaka ha yona leswaku hi hlakulela vuxaka bya le kusuhi na Yehovha.—Ps. 25:14.
3. Hi yihi ndlela yo endla dyondzo ya munhu hi xiyexe, leyi yi nga hi pfunaka ku tshinela ekusuhi na Xikwembu?
3 Ku Khongela Ni Ku Anakanyisisa I Swa Nkoka: Dyondzo ya munhu hi xiyexe leyi wundlaka mbilu a hi ku khwatihata tinhla-nkulu ta xihloko lexi dyondziwaka ni ku languta matsalwa lama kombiweke ntsena. Swi lava leswaku hi anakanyisisa hi leswi rungula ra kona ri swi kombisaka malunghana ni tindlela, milawu ni vumunhu bya Yehovha. (Eks. 33:13) Ku twisisa swilo swa moya swi khumba mintlhaveko ya hina naswona swi hi susumetela ku anakanya hi vutomi bya hina. (Ps. 119:35, 111) Dyondzo ya munhu hi xiyexe yi fanele yi endliwa hi xikongomelo xo tshinela ekusuhi na Yehovha. (Yak. 4:8) Leswaku munhu a dyondza kahle ku laveka nkarhi swin’we ni ndhawu ya kahle naswona ku dyondza nkarhi na nkarhi swi lava ku titshinya. (Dan. 6:10) Hambiloko u tshama u khomekile, xana wa tivekela nkarhi siku ni siku leswaku u anakanyisisa hi timfanelo ta Yehovha leti hlamarisaka?—Ps. 119:147, 148; 143:5.
4. Xana ku khongela loko hi endla dyondzo ya munhu hi xiyexe swi hi pfuna njhani leswaku hi hlakulela vuxaka bya le kusuhi na Yehovha?
4 Xikhongelo lexi humaka embilwini i xa nkoka loko munhu a lava ku va ni dyondzo ya munhu hi xiyexe leyi nga ni xikongomelo. Leswaku ntiyiso wa Bibele wu khumba timbilu ta hina ni ku hi susumetela ku “[endlela] Xikwembu ntirho wo kwetsima hilaha ku amukelekaka hi nchavo,” hi lava moya lowo kwetsima wa Xikwembu. (Hev. 12:28) Hikokwalaho, hi fanele ku sungula dyondzo yin’wana ni yin’wana hi ku kombela moya lowo kwetsima eka Yehovha. (Mat. 5:3) Loko hi ri karhi hi anakanyisisa hi Matsalwa ni ku tirhisa tibuku-mpfuno leti humaka eka nhlengeletano ya Yehovha, hi ta va hi ri eku pfuleni ka timbilu ta hina eka Yehovha. (Ps. 62:8) Ku endla dyondzo hi ndlela leyi i ku gandzela naswona loko hi endla leswi hi va hi kombisa ku tinyiketela ka hina eka Yehovha ni ku tiyisa vuxaka bya hina na yena.—Yudha 20, 21.
5. Ha yini swi ri swa nkoka leswaku hi anakanyisisa hi Rito ra Xikwembu siku ni siku?
5 Ku fana ni vuxaka byin’wana ni byin’wana, vuxaka bya hina na Yehovha byi fanele byi hlakuleriwa nkarhi na nkarhi leswaku byi ta hambeta byi kula. Hikokwalaho, onge hi nga tixavela nkarhi siku ni siku leswaku hi kota ku tshinela eka Xikwembu, hi ku tiva leswaku loko hi endla tano xi ta tshinela eka hina.—Ps. 1:2, 3; Efe. 5:15, 16.