‘Ndlandlamuxani Xinakulobye Xa N’wina’
1. Hi byihi vutihlamuleri lebyi un’wana ni un’wana wa hina a nga na byona?
1 Leswi hi nga Vakreste lava nga ni vun’we, un’wana ni un’wana wa hina u ni vutihlamuleri byo kondletela rirhandzu evandlheni. (1 Pet. 1:22; 2:17) Rirhandzu ro tano ri va kona loko hi ‘ndlandlamuxa’ xinakulobye xa hina. (2 Kor. 6:12, 13) Ha yini swi ri swa nkoka leswaku hi va tiva kahle vamakwerhu hinkwavo?
2. Ha yini swi ri swa nkoka ku hlakulela xinakulobye ni vapfumeri-kulorhi?
2 Xinakulobye Xa Tiya: Loko hi ri karhi hi tolovelana ni vapfumeri-kulorhi, hi ya hi tlangela ripfumelo, ku tiyisela ni timfanelo tin’wana ta vona letinene. Swihoxo swa vona a ha ha swi tekeli enhlokweni kutani xinakulobye xa hina xi ya xi tiya. Loko hi tivana kahle, hi kota ku akana ni ku chavelelana. (1 Tes. 5:11) Hi nga kota ku va “mpfuno lowu tiyisaka” eka van’wana leswaku va lwa ni minkucetelo leyo biha ya misava ya Sathana. (Kol. 4:11) Mawaku ntsako lowu hi tiphinaka ha wona leswi hi nga ni vanghana lavanene exikarhi ka vanhu va Yehovha emasikwini lawa ya makumu lama nonon’hwaka!—Swiv. 18:24.
3. Hi nga va mpfuno lowu tiyisaka eka van’wana hi ndlela yihi?
3 Vanghana va hina lavakulu va nga hi tiyisa nhlana swinene va tlhela va hi chavelela loko hi langutane ni miringo yo tika. (Swiv. 17:17) Mukreste un’wana la nga tshama a tshwimbirisana ni ku titwa a ri xikangalafula u ri: “A ndzi ri ni vanghana lava a va vula swilo leswinene ha mina leswaku ndzi kota ku rivala swilo swo biha leswi a ndzi swi anakanya.” Vanghana vo tano i nkateko lowu humaka eka Yehovha.—Swiv. 27:9.
4. Hi yihi ndlela leyi hi nga tivaka vamakwerhu ku antswa ha yona evandlheni?
4 Endla Matshalatshala Yo Rhandza Van’wana: Hi nga xi ndlandlamuxa njhani xinakulobye xa hina ni vapfumeri-kulorhi? Hi fanele hi va pfuxela eminhlanganweni ya Vukreste hi tlhela hi bula na vona hi swilo leswi akaka. Hi fanele hi va kombisa leswaku ha va rhandza kambe hi nga ngheneleli etimhakeni ta vona. (Filp. 2:4; 1 Pet. 4:15) Ndlela yin’wana yo endla matshalatshala yo rhandza van’wana i ku va rhamba hi ta dya swin’we. (Luka 14:12-14) Kumbe hi nga ha hlela ku famba swin’we ensin’wini. (Luka 10:1) Loko hi teka goza ro tiva vamakwerhu ku antswa, hi va hi ri eku kondleteleni ka vun’we evandlheni.—Kol. 3:14.
5. Hi yihi ndlela yin’wana leyi hi nga ndlandlamuxaka xinakulobye xa hina ha yona?
5 Xana hi tala ku hlawula vanghana lava nga tintangha ta hina kumbe lava rhandzaka leswi hi swi rhandzaka? Hi nga pfumeleli swilo swo tano swi hi sivela ku endla xinakulobye ni van’wana evandlheni. Davhida na Yonathani swin’we na Rhuti na Nawomi va ve vanghana lavakulu hambileswi a va nga ri tintangha naswona a va nga ri va ndhavuko lowu fanaka. (Rhu. 4:15; 1 Sam. 18:1) Xana u nga ndlandlamuxa xinakulobye xa wena? Loko u endla tano, u ta kuma mikateko leyi u nga yi langutelangiki.
6. Hi xihi xin’wana lexi hi nga ta vuyeriwa hi xona loko hi ndlandlamuxa xinakulobye xa hina ni vamakwerhu?
6 Loko hi ndlandlamuxa xinakulobye xa hina ni van’wana, ha tiyisana naswona hi kondletela ku rhula evandlheni. Ku tlula kwalaho, Yehovha u ta hi katekisa leswi hi rhandzaka vamakwerhu. (Ps. 41:1, 2; Hev. 6:10) Ha yini u nga tiendleli pakani yo tolovelana ni vanhu vo tala hilaha u nga kotaka hakona?