Xikolo Xa Ndzetelo Wa Vutirheli—Nyangwa Leyikulu Leyi Yisaka eNtirhweni
1 Yehovha u tirhise muprofeta Yeremiya leswaku a profeta a ku: ‘Ndzi ta vekela vanhu va mina varisi lava va nga ta va risa; a va nge he chavi, hambi ku ri ku chavisiwa hi xo karhi, ni wun’we a nge lahleki.’ (Yer. 23:4) Ntirho wolowo wa ku risa wu karhi wa endliwa namuntlha eka vanhu va matiko hinkwawo. Wu endliwa hi makume ya magidi ya vakulu emavandlheni. Ku tlula kwalaho, ku ni ntlawa wa majaha lama nga tala ku fana ni mathonsi ya mberha, lama tinyiketeleke hi ku tirhandzela leswaku ma endla ntirho wa Yehovha. (Ps. 110:3) Hakunene vamakwerhu volavo lava titsongahataka i nkateko emavandlheni ya vanhu va Xikwembu! Leswi ntirho wo hlengeleta vanhu wa ha yaka emahlweni, ka ha ri ni xilaveko xa vavanuna lava fanelekaka leswaku va tinyiketela ku tirhela vamakwavo.
2 Xikolo xa Ndzetelo wa Vutirheli i lunghiselelo lerinene ro letela vakulu ni malandza ya vutirheli lava nga tekangiki leswaku va byarhisiwa vutihlamuleri lebyi engetelekeke. Ku sukela loko xikolo lexi xi sunguriwile hi 1987, ku leteriwe swichudeni leswi tlulaka 22 000 etitlilasini ta 999, swi huma ematikweni ya kwalomu ka 140. Eka vamakwerhu lava, xikolo lexi xi ve “nyangwa leyikulu leyi yisaka entirhweni.”—1 Kor. 16:9.
3 Xikongomelo Xa Xikolo: Xikongomelo-nkulu xa Xikolo xa Ndzetelo wa Vutirheli i ku letela ni ku hlomisa vavanuna lava fanelekaka, leswaku va byarha vutihlamuleri kun’wana ni kun’wana laha nhlengeletano yi nga lavaka mpfuno kona. Xikolo lexi xi tiyisa vuswikoti bya vona byo rhangela entirhweni wo vula evhangeli, wo risa ntlhambi ni ku dyondzisa evandlheni. Loko se swichudeni swi thwasile, swin’wana swi averiwa ku va maphayona yo hlawuleka kumbe valanguteri lava famba-fambaka ematikweni ya rikwavo kumbe ematikweni mambe. Swin’wana swi averiwa ku ya tirha emavandlheni lawa swi humaka eka wona kumbe etindhawini leti nga ni xilaveko lexikulu ensin’wini leyi nga ehansi ka rhavi ra rikwavo.
4 Eka khoso leyi tekaka mavhiki ya nhungu, swichudeni swi dyondzisiwa Bibele hi vuenti. Swi kambisisa tidyondzo to hambana-hambana ta Bibele ni ndlela leyi ntirho wo risa wu endliwaka ha yona ku katsa ni leswi faneleke swi endliwa loko ku tlhekeka swiphiqo eka Vakreste. Swi tlhela swi dyondza leswi Matsalwa ma swi vulaka hi timhaka leti khumbaka nkongomiso, vuavanyisi ni nhlengeletano. Swi kuma ndzetelo wo hlawuleka emhakeni ya ku vulavula erivaleni naswona swi pfuniwa leswaku swi hatla swi kula hi tlhelo ra moya.
5 Swilaveko: Swi le rivaleni leswaku swilaveko leswi endlaka vamakwerhu va faneleka ku ya exikolweni i swa xiyimo xa le henhla. Lava endlaka xikombelo va fanele va va va hete malembe mambirhi hi ku landzelana, va ri vakulu kumbe malandza ya vutirheli. Hambiloko va ri vakulu kumbe malandza ya vutirheli, va fanele va nga tekanga naswona va ri ni malembe ya le xikarhi ka 23 na 50 hi vukhale. Va fanele va kota ku hlaya, ku tsala ni ku ri vulavula Xinghezi tanihi exikolweni xa le Zambia ku tirhisiwaka xona. Va fanele va ri ni rihanyo lerinene, va nga lavi nkhathalelo wo hlawuleka kumbe swakudya swo hlawuleka. Eka lava endleke swikombelo ku rhanga ku tekiwa lava nga maphayona ya nkarhi hinkwawo.
6 Lava va endlaka xikombelo va fanele va kota ku ya kun’wana ni kun’wana laha ku nga ni xilaveko. Sweswo swi lava leswaku munhu a va ni moya lowu fanaka ni wa muprofeta Esaya, loyi hi ku hiseka a tinyiketeleke ku endla ntirho wo hlawuleka, hi ku vula a ku: “Hi mina loyi! Ndzi rhume.” (Esa. 6:8) Nakambe u kombise moya wa ku titsongahata evuton’wini bya yena hinkwabyo. Lava va rhandzaka ku ya eXikolweni xa Ndzetelo wa Vutirheli va fanele va susumetiwa hi ku rhandza vamakwavo ni ku navela ku tirha ku ri ni ku navela xikhundlha kumbe ku tiendlela vito. Endzhaku ka loko swichudeni swi thwase ndzetelo wolowo lowunene, swi fanele swi tirhisa leswi swi swi dyondzeke leswaku swi ta vuyerisa van’wana.—Luka 12:48.
7 Vuyelo: Endzhaku ko heta mavhiki ya nhungu swichudeni swi ri karhi swi dyondzisiwa hi vuenti, swa thwasa naswona swi va swi ‘wundliwe hi marito ya ripfumelo ni ya dyondzo leyinene.’ (1 Tim. 4:6) Dyondzo leyi yi swi hlomisela leswaku swi pfuna ni ku khutaza van’wana emavandlheni ni le swifundzheni leswi swi averiwaka eka swona. Etindhawini to tala laha swichudeni leswi thwaseke eXikolweni xa Ndzetelo wa Vutirheli swi rhumeriweke eka tona, ntirho wa nsimu wa kula; vahuweleri va khutaziwa ku nghenela ntirho wa vuphayona, ngopfu-ngopfu vantshwa; nakambe vanhu lava ha ku sungulaka ku hlanganyela ni vanhu va Xikwembu va kuma mpfuno lowu va faneleke.
8 Xana u nkulu kumbe nandza wa vutirheli la nga tekangiki, la nga le malembeni ya le xikarhi ka 23 na 50 hi vukhale? I yini lexi ku sivelaka ku endla xikombelo xo ya eXikolweni xa Ndzetelo wa Vutirheli? Xana u makwerhu la ha riki muntshwa loyi a anakanyaka ku tirhela Yehovha hi ku nghenela ntirho wa nkarhi hinkwawo? Ha yini u nga hanyi vutomi byo olova, lebyi nga riki na swihinga leswaku u kota ku nghena ‘enyangweni lowu lowukulu lowu yisaka entirhweni’? U ta kuma ntsako lowukulu ni ku eneriseka. Hakunene, Xikolo xa Ndzetelo wa Vutirheli i nkateko ku nga ri eka swichudeni leswi thwasaka ntsena kambe ni le mavandlheni ya vanhu va Xikwembu emisaveni hinkwayo.
[Bokisi leri nga eka tluka 3]
Ndlela Leyi Ndzetelo Lowu Wu Va Pfuneke Ha Yona
“Hakunene ndzetelo lowu wu antswise ntirho wa mina wa nsimu ni vuswikoti bya mina byo risa ntlhambi hi vutlhari, ndzi ri karhi ndzi tirhisa Matsalwa.”
“Xikolo lexi xi ndzi tiyise nhlana swinene emhakeni ya ku endla mintirho ya mina yo hambana-hambana evandlheni.”
“Xi cince langutelo ra mina hinkwaro evuton’wini, ku katsa ni ndlela leyi ndzi titwaka ha yona hi malunghiselelo ya Xikwembu ni nhlengeletano ya xona.”
“Ndzetelo lowu ndzi wu kumeke wu ndzi pfune leswaku ndzi vona xivangelo xo lunghekela ku pfuna laha ku nga ni xilaveko.”