Hi Fanele Hi Xixima Vulawuri Bya Yehovha

Xana i yini lexi taka emianakanyweni ya wena loko u twa mavito ya vanhu va khale vo fana na Kora, Dathani na Abiramu? I ku xandzuka ka vona! Xana a va xandzukela yini? A va xandzukela vulawuri bya Xikwembu. Vuxokoxoko bya mahanyelo ya vona lama nga ni khombo byi tsariwe eka Tinhlayo ndzima 16, naswona nkatsakanyo wa rungula leri wu le ka xihloko lexi nge “Yingisa Vulawuri Bya Xikwembu Hi Ku Titsongahata,” eka Xihondzo xo Rindza xa August 1, 2002. Swi ta ku vuyerisa loko wo hlaya rungula leri kutani u hlalela vhidiyo leyi nge Respect Jehovah’s Authority, leyi swi kombisaka kahle leswi endlekeke. U ta vona nkwetlembetano lowu nga va kona exikarhi ka vana vo tshembeka va Kora ni tata wa vona lowa muxandzuki, loyi a a lwisana ni Hosi ya vuako hinkwabyo. (Tinhl. 26:9-11) Mhaka leyi ya xiviri, yi fanele yi hi khutaza hinkwerhu ka hina leswaku hi ya hi tshembeka swinene eka Yehovha.

Loko u ri karhi u hlalela vhidiyo leyi, lava vumbhoni lebyi kombisaka leswaku Kora ni vaxandzuki-kulobye va tsandzeke ku tshembeka eka swilo swa tsevu swa nkoka: (1) Xana va byi delele njhani vulawuri bya Xikwembu? (2) Xana ku tikukumuxa, ku lava ku tiendlela vito ni mavondzo swi va khumbe njhani? (3) Xana va swi xopaxope njhani swihoxo swa lava vekiweke hi Yehovha? (4) I yini lexi endleke leswaku va sungula ku gungula? (5) Ha yini va nga enerisekanga hi malunghelo ya vona ya ntirho? (6) Xana va endlise ku yini leswaku va tshembeka ngopfu eka vanghana ni mindyangu ya vona ku tlula ku tshembeka eka Xikwembu?

Xiya ndlela leyi leswi dyondziweke eka drama leyi ya Bibele swi tirhaka ha yona eka langutelo leri munhu a nga na rona hi vulawuri bya Xikwembu namuntlha: (1) Xana hi fanele hi angula njhani eka swiboho swa vakulu va vandlha, naswona hikwalaho ka yini? (2) Hi nga lwa njhani ni minkucetelo yo biha leyi hi nga na yona? (3) Xana hi fanele hi endla njhani hi swihoxo swa ku nga hetiseki ka lava vekiweke leswaku va rhangela? (4) Xana hi fanele hi endla yini loko ku pfuka moya wo gungula etimbilwini ta hina? (5) Xana hi fanele hi titwa njhani hi malunghelo wahi ni wahi lawa hi nyikiweke wona? (6) I vamani lava hi nga fanelangiki hi tshembeka ngopfu eka vona ku tlula Xikwembu, naswona leswi swi nga va ndzingo wo tika loko swi te yini?

Endzhaku ka loko ku buriwe hi rungula leri evandlheni, ha yini u nga tlheli u hlalela vhidiyo leyi? Yi pfumelele yi swi dzikisa swinene emianakanyweni ya wena swivangelo swa ku va hi fanele hi xixima vulawuri bya Yehovha!—Ps. 18:25; 37:28.