Ntsombano Wa Muganga Wu Hi Susumetela Ku Famba Ni Xikwembu

Ntsombano wa Muganga wa ku “Famba Ni Xikwembu” wu kandziyise xileriso xa Yehovha lexi nga lo dlaa, erivaleni, lexi nge: “Ndlela hi leyi. Fambani hi yona”! (Esa. 30:21) Loko ho tirhisa ndzayo leyi hi nyikiweke yona, hi ta ‘tshama hi ri karhi hi languta ndlela leyi hi fambaka ha yona.’ (Efe. 5:15) Ku anakanyisisa hileswi hi swi dyondzeke swi ta hi pfuna loko hi ‘hambeta hi famba entiyisweni.’—3 Yoh. 3.

Tirhisa swivutiso leswi landzelaka ni tinotsi ta wena loko u ri karhi u lunghiselela ku hlamula mpfuxeto wa tinhla ta nongonoko wa ntsombano wa nan’waka. Mpfuxeto lowu wu ta endliwa eka Nhlangano wa Ntirho wa vhiki ra February 21.

1. Enoko u swi kotise ku yini ku famba ni Xikwembu hambileswi a a hanya eminkarhini ya mangava? (Hev. 11:1, 5, 6; Yudha 14, 15; “Famba Ni Xikwembu eMinkarhini Ya Mangava”)

2. Xana nsinya wa nawu lowu kumekaka eka Luka 16:10 wu nga tirhisiwa eka swiyimo swihi evuton’wini? (“Xana Wa ‘Tshembeka Eka Swilo Leswitsongo’?”)

3. (a) Vula swilo swa mune leswi hi swi dyondzaka eka Hosiya tindzima 6 ku ya eka 9, leswi nga hi pfunaka leswaku hi famba ni Xikwembu. (Hos. 6:6, 7; 7:14; 8:7) (b) Hi tihi tinhla leti engetelekeke leti kumekaka eka Hosiya tindzima 10 ku ya eka 14, leti hi pfunaka leswaku hi famba ni Xikwembu? (“Vuprofeta Bya Hosiya Byi Hi Pfuna Ku Famba Ni Xikwembu”—Nxaxamelo)

4. Hi swihi swilo leswi pfunaka, leswi vavanuna ni vavasati lava tekaneke lava nga Vakreste va nga swi endlaka leswaku vukati bya vona byi tshama byi tiyile? (Swiv. 12:4; Efe. 5:29; “U Nga Hambanisi ‘Leswi Xikwembu Xi Swi Paneke Swin’we’”)

5. Hi yihi ndlela leyi hi kombisaka ha yona leswaku hi xixima minhlangano ya hina yo kwetsima? (Ekl. 5:1; Esa. 66:23; “Ku Xixima Minhlangano Ya Hina Yo Kwetsima”)

6. (a) Hi swihi swiyenge swinharhu swa nkoka entirhweni wa hina wo chumayela, leswi hi faneleke hi swi kambisisa ku tiyiseka leswaku hi hlanganyela hi xitalo entirhweni lowu? (Esa. 52:7; Zak. 8:23; Mar. 6:34) (b) Hi tihi tinhla leti u ti kumeke ti ri mpfuno eka xibukwana lexi nge Good News for People of All Nations? (“Mahungu Lamanene Ya Vanhu Va Tinxaka Hinkwato”; “Ku Pfuna Lava Vulavulaka Ririmi Rimbe”)

7. Hi nga va pfuna njhani lava ha ku sungulaka ku hlanganyela leswaku va va ni xivindzi xo vula rungula ra Mfumo? (Vaav. 7:17; “Ku Pfuna Mintshungu Yi Hlanganyela Na Hina eNsin’wini”)

8. Hi swi kombisa njhani leswaku ha tiyiseka leswaku “siku lerikulu ra Yehovha ri le kusuhi”? (Sof. 1:14; “Ku Famba Hi Ripfumelo, Ku Nga Ri Hi Ku Vona”)

9. (a) Xana mhaka ya ku khunguvanyisa van’wana yi dzike ku fikela kwihi? (Mar. 9:42-48) (b) Hi nga ku papalata njhani ku khunguvanyisiwa? (Ps. 119:165) (c) Hi nga swi papalata njhani ku khunguvanyisa van’wana? (1 Kor. 10:24; “Papalata ‘Xin’wana Ni Xin’wana Lexi Nga Ku Khunguvanyisaka Kumbe Xi Khunguvanyisa Van’wana’”)

10. Hi yihi ndlela leyi hi nga ringaniselaka ha yona loko swi ta emhakeni ya ku lava munghana wa vukati, ku ringeta ku antswisa rihanyo ra hina ni ku tamela timhaka ta bindzu? (Ps. 26:4; Mat. 6:25; 1 Tim. 6:9; “Hlayisani Mianakanyo Ya N’wina Yi Ri Leyi Hlutekeke Hi Ku Helela”)

11. (a) Hi dyondza yini eka leswi endlekeke loko Yesu a rhambiwe hi van’wana? (Luka 10:42; 24:32) (b) Hi yihi ndlela leyi hi nga hungasaka ha yona leswaku hina swin’we ni van’wana hi va lava phyuphyeke hakunene? (1 Kor. 10:31-33; “Vuhungasi Lebyinene Lebyi Phyuphyisaka”)

12. Hi ku ya hi Pisalema 23, hi yihi mikateko leyi hi yi kumaka leswi hi nga tinyimpfu ta Yehovha, naswona hi byihi vutihlamuleri lebyi hi nga na byona? (1 Kor. 10:21; “Yehovha I Murisi Wa Hina”)

13. Hi yihi ndlela leyi Vakreste va xi yingisaka ha yona xitsundzuxo lexi huhuteriweke xa ku “tixavela nkarhi lowunene”? (Efe. 5:16; “Ku Tixavela Nkarhi Lowunene”)

14. (a) Xana ‘nkarhi wa ku avanyisa’ lowu boxiweke eka Nhlavutelo 14:7 wu katsa yini? (b) Hi swi kombisa hi ndlela yihi leswaku hakunene hi hume hilaha ku heleleke eka Babilona Lonkulu? (“‘Tshamani Mi Rindzile’—Nkarhi Wa Ku Avanyisa Wu Fikile”) (c) Hi tihi tinhla leti u ti rhandzeke eka broxara leyi nge Tshamani Mi Rindzile!?

15. Boxa timfanelo tinharhu leti hi faneleke hi va na tona leswaku hi nga hambuki ‘endleleni yo lulama.’ (2 Pet. 2:15; “Tivonele Ku ‘Tshika Ndlela Yo Lulama’”)

16. Vantshwa va nga yi fularhela njhani ‘ndlela ya lavo homboloka’? (Swiv. 4:14; “Vantshwa—Fambani eNdleleni Yo Lulama”)

17. (a) Hi tihi tindlela leti ha tona Pawulo a a ri xikombiso lexinene xa ku tiyisela? (Mint. 14:19, 20; 16:25-33) (b) Ha yini ku nga ri na xivangelo xo chava lava kanetaka vugandzeri bya ntiyiso? (Drama ni nkulumo leyi nge “Chumayela Hi Rixaladza Hambiloko U Kanetiwa”)

18. Hi yihi mikateko leyi kumiwaka hi lava fambaka ni Xikwembu? (“Ku Famba Ni Xikwembu Swi Tisa Mikateko Sweswi Ni Hilaha Ku Nga Heriki”)

Onge hi nga tiyimisela ku yingisa rito leri hi ri twaka ‘endzhaku ka hina,’ leswaku hi ta kota ku famba hilaha ku nga heriki ni Tata wa hina wa le tilweni.—Esa. 30:21; Yoh. 3:36.