Hi Nga Ma Chumayela Njhani Maxaka?
1. Ha yini hi fanele hi va ni vuxiyaxiya loko hi chumayela maxaka ya hina?
1 A ku na nchumu lowu tsakisaka ku fana ni ku nghena emisaveni leyintshwa swin’we ni maxaka ya hina hi ri karhi hi gandzela Yehovha hi vun’we! Ntsako wo tano hi nga wu kuma loko hi dyondzisa maxaka ya hina ntiyiso. Hambiswiritano, ku dyondzisa maxaka ya hina ntiyiso hi ndlela leyi phyuphyisaka swi lava hi va ni vuxiyaxiya. Mulanguteri wa xifundzha u te: “Lava vaka ni vuyelo lebyinene hi lava va pfaka va bula hi timhaka leti endlaka maxaka ya vona ma navela ku tiva.” Xana hi nga swi endlisa ku yini sweswo?
2. Loko maxaka ya hina hi ma rhandza swinene, hi nga ma pfuna njhani leswaku ma navela ku tiva leswi engetelekeke mayelana ni ntiyiso?
2 Ma Endle Ma Navela Ku Tiva: Rhanga u anakanyisisa hi leswi u nga ta bula ha swona leswi nga ta endla leswaku ma tsakela ntiyiso. (Swiv. 15:28) I yini leswi ma karhataka? Hi swihi swiphiqo leswi ma langutaneke na swona? Kumbexana u nga ha ma komba xihloko kumbe u boxa tsalwa leri tsakisaka leri vulavulaka hi mhaka leyi ma yi rhandzaka ngopfu. Loko maxaka ya wena ma nga tshami ekusuhi, kumbexana u nga bula na wona hi ku ma tsalela mapapila kumbe hi ku ma bela riqingho. U nga ma fumbi hi rungula ro tala, kambe byala mbewu ya ntiyiso, kutani u rindzela Yehovha leswaku a yi mirisa.—1 Kor. 3:6.
3. Rirhandzu leri maxaka ya hina ma hi rhandzaka ha rona ri nga hi pfulela njhani ndlela yo ma chumayela?
3 Yesu u tshama a hlongola madimona eka wanuna un’wana kutani a n’wi lerisa a ku: “Famba ekaya emaxakeni ya wena, kutani u ma rungulela swilo hinkwaswo leswi Yehovha a ku endleleke swona ni tintswalo leti a veke na tona eka wena.” (Mar. 5:19) Anakanya ndlela leyi maxaka ya yena ma titweke ha yona loko ma twa mhaka leyi! Hambiloko u nga humeleriwi hi swilo swo hlamarisa swo fana ni leswi, kambe swi nga ha endleka maxaka ya wena ma tsakela ntirho wa wena kumbe wa vana va wena. U nga kuma ndlela yo ma byela swo karhi hi Yehovha ni nhlengeletano ya yena hi ku ma rungulela hi nkulumo leyi u yi nyikeleke eXikolweni xa Vutirheli bya le Tilweni, ntsombano lowu u humaka eka wona, ku endzela ka wena eBethele kumbe swin’wana swo tsakisa leswi ku humeleleke.
4. Hi yihi mimboyamelo leyi hi faneleke hi yi papalataka loko hi chumayela maxaka?
4 Vana Ni Vuxiyaxiya: Loko u chumayela maxaka, papalata ku ma fumba hi rungula ro tala hi nkarhi wun’we. Loko makwerhu un’wana a rungula ta loko a ha ku sungula ku dyondza Bibele, u ri: “Hiloko ndzi byeletela manana hinkwaswo leswi ndzi swi dyondzeke eBibeleni, ndzi nga miti ni marha, kambe hakanyingi a hi hetelela hi tlulane milenge, ngopfu-ngopfu ni tata wa mina.” Hambiloko xaka ri vonaka ri tsakela rungula ra Bibele, ri hlamule hi ndlela leyi nga ta ri siya ri lava ku twa leswi engetelekeke. (Swiv. 25:7) Ma xixime minkarhi hinkwayo, u va ni musa naswona u lehisa mbilu, ku fana ni loko u ri karhi u vulavula ni munhu loyi u nga n’wi tiviki ensin’wini.—Kol. 4:6.
5. Hi fanele hi endla yini loko maxaka ma nga swi tsakeli ku chumayeriwa?
5 Enkarhini wun’wana maxaka ya Yesu a ma ehleketa leswaku u hlangane nhloko. (Mar. 3:21) Hambiswiritano, hi ku famba ka nkarhi man’wana ma hundzuke vapfumeri. (Mint. 1:14) Loko matshalatshala ya wena yo bula ni maxaka ya wena hi ntiyiso ma nga amukeriwi, u nga heli mbilu. Swiyimo ni langutelo ra wona swi nga cinca. Hambeta u lava tindlela to ma tsongolela yinhla leyi nga ta ma endla ma navela ku tiva. U ta tsaka loko wo ma pfuna leswaku ma famba hi gondzo leri yisaka evuton’wini lebyi nga heriki.—Mat. 7:13, 14.