Ku Vuriwa Yini Hi Maxaka Ya Wena?
1 Vo tala va hina va ni maxaka yo tala lama nga riki entiyisweni. Vona ndlela leyi hi navelaka ha yona leswaku varhandziwa vo tano va hi joyina endleleni ya vutomi! Ku khumbeka ka hina hi vumundzuku bya vona lebyi nga heriki ku nga ha va lokukulu loko va ri swirho swa ndyangu wa hina vini. Hambiloko hi ringetile hi malembe leswaku hi va nghenisa entiyisweni, a hi fanelanga hi gimeta hi ku vula leswaku a swa ha tshembisi.
2 Loko Yesu a endla ntirho wakwe wo chumayela, “vamakwavo wa yena a va nga ri na ku pfumela eka yena.” (Yoh. 7:5) Nkarhi wun’wana, maxaka yakwe a ma ehleketa leswaku u hlangane nhloko. (Mar. 3:21) Kambe, Yesu a nga va helelanga mbilu. Hi ku famba ka nkarhi, vamakwavo wa yena va amukele ntiyiso. (Mint. 1:14) Yakobo, makwavo wakwe hi manana u hundzuke phuphu evandlheni ra Vukreste. (Gal. 1:18, 19; 2:9) Loko u tsakela ku va na ntsako wo vona maxaka ya wena ma amukela ntiyiso, u nga tshiki ku va yisela mahungu lamanene ya Mfumo.
3 Vana La Phyuphyisaka, U Nga Sindzisi: Loko Yesu a chumayela van’wana, vayingiseri vakwe va titwe va phyuphyisiwile, va nga chavisiwanga. (Mt. 11:28, 29) A nga va tikiselanga hi tidyondzo leti a ti ta va nonon’hwela ku ti twisisa. Leswaku u phyuphyisa maxaka ya wena hi mati ya ntiyiso, va nyike matsongo hi nkarhi wun’we, u nga va nyiki yo tala! Mulanguteri un’wana la famba-fambaka u te: “Lava vuyeriwaka swinene hi lava endlaka leswaku maxaka ya vona ma navela ku tiva hi ku va tsongolela timhaka ta vumbhoni.” Hi ndlela leyi, hambi ku ri vakaneti va nga ha sungula ku vutisa swivutiso ivi eku heteleleni va va ni torha ra ntiyiso.—1 Pet. 2:2; ringanisa 1 Vakorinto 3:1, 2.
4 Vakreste vo tala lava ngheneleke vukati va nyikele vumbhoni eka lava tekaneke na vona lava nga riki vapfumeri hi ku siya tibuku ti pfuriwe endhawini leyi nga ha va tsakisaka. Makwerhu un’wana wa xisati la endleke leswi u tlhele a fambisa dyondzo ni vana va yena nuna wakwe a ri karhi a swi twa, a vula tinhlamuselo leti nga ta n’wi vuyerisa. Minkarhi yin’wana u n’wi vutise a ku: “Ndzi dyondze mhaka yo karhi na yo karhi edyondzweni ya mina namuntlha. Xana u ehleketa yini ha yona?” Eku heteleleni nuna wakwe u amukele ntiyiso.
5 Xixima, U Nga Heli Mbilu: Muhuweleri un’wana u vule leswaku “hambi ma ri maxaka ya ni mfanelo yo tirhisa mavonelo ya wona ni mianakanyo ya wona.” Kutani hi fanele hi va xixima loko va vula leswi va swi anakanyaka kumbe loko va hi byela hi ku kongoma leswaku hi nga vulavuli na vona hi ntiyiso. (Ekl. 3:7; 1 Pet. 3:15) Hi ku lehisa mbilu na hi rirhandzu ni ku va vayingiseri lavanene, hi nga rindzela minkarhi leyi faneleke yo nyikela vumbhoni hi rixaladza. Ku lehisa mbilu ko tano ku nga vuyerisa, hilaha swi voniweke hakona eka nuna un’wana la nga Mukreste loyi hi ku lehisa mbilu a tiyiseleke tihanyi ta nsati wakwe la nga pfumeriki ku ringana malembe ya 20. Loko a ha ku sungula ku hundzuka, u te: “Mawaku ndlela leyi ndzi tlangelaka Yehovha ha yona leswi a ndzi pfuneke ku hlakulela ku lehisa mbilu, hikuva sweswi ndzi vona vuyelo bya kona: Nsati wa mina u sungule ku famba endleleni ya vutomi!”
6 Ku vuriwa yini hi maxaka ya wena? Swi nga ha endleka leswaku hikwalaho ka mahanyelo ya wena lamanene ya Vukreste ni ku va khongelela, “u nga ha va kokela eka Yehovha.”—1 Pet. 3:1, 2, nhlamuselo ya le hansi eka NW.