Ku Twarisa Mahungu Lamanene Hi Ku Gingiriteka

¹ Hi kombisa ku tlangela ka hina lokukulu ka switshembiso swa Mfumo wa Xikwembu hi ku hlanganyela evutirhelini bya Vukreste hi mbilu hinkwayo. Hi fanele hi hlanganyela entirhweni lowu hi ku gingiriteka. Hikwalaho ka yini? Hikuva vatirhi a va talanga, makumu ya mafambiselo lawa yo homboloka ya swilo ma tshinela, naswona vutomi bya vanhu lava nga ensin’wini ya hina byi le khombyeni. (Ezek. 3:19; Mt. 9:37, 38) Vutihlamuleri lebyi lebyikulu byi lava leswaku hi tikarhata swinene evutirhelini. Xana hi nga swi kombisa njhani leswaku ha gingiriteka entirhweni wa hina wa nsimu? Hi ku lunghiselela swingheniso leswinene ka ha ri na nkarhi, hi ku lavisisa vanhu hi ku hiseka kwihi na kwihi laha va nga kumekaka kona, hi ku hlayisa rhekhodo leyinene ya hinkwavo lava kombiseke ku tsakela, hi ku tlhelela eka vona hi ku hatlisa leswaku hi landzela ku tsakela ka vona, ni ku tsundzuka leswaku tanihi leswi vutomi byi khumbekaka, hi fanele hi languta vutirheli bya hina hi ku tiyimisela. Swiringanyeto leswi landzelaka swi nga ha pfuna loko hi lunghiselela ku twarisa mahungu lamanene hi ku gingiriteka hi February. Hi ta fambisa buku leyi nge Nhlavutelo—Ku Chaputa Ka Yona Loku Hlamarisaka Ku Tshinele!

² U nga ha sungula bulo hi ku boxa swiphiqo swi nga ri swingani hi ku komisa leswi vanhu va langutanaka na swona, ivi u ku: ◼“Vanhu vo tala va pfumela leswaku Xikwembu xi kona, kambe va tivutisa xivutiso lexi: ‘Xana xi lava leswaku hi va ni vumundzuku bya njhani?’ Xana wena u nga xi hlamula njhani? [Yimela nhlamulo.] Xana a wu swi tiva leswaku Bibele yi ku hlamusela kahle ku rhandza ka Xikwembu hi vanhu ni magoza lawa xi ma tekaka leswaku xi hetisisa ku rhandza loku?” Pfula eka tluka 301 ebukwini leyi nge Ku Chaputa Ka Nhlavutelo. Hlaya Nhlavutelo 21:1 eka ndzimana 1, ivi u hlaya nhlamuselo leyi nyikeriweke eka xiphemu xo hetelela xa ndzimana 2. Pfula eka xifaniso lexi nga eka tluka 302 leswaku u kombisa leswi leswi swi vulaka swona hi vumundzuku bya hina. Hlaya Nhlavutelo 21:4 eka ndzimana 6. Fambisa buku hi munyikelo wa R12,00. Hlela nkarhi lowunene leswaku u ta vuya mi ta yisa bulo emahlweni.

³ U nga ha hambeta na bulo ra Nhlavutelo 21:1, 4, ra nkarhi lowu hundzeke, hi xingheniso lexi xo koma: ◼“Eriendzweni ra mina leri hundzeke, hi vulavule hi xitshembiso xa Xikwembu xo lunghiselela fambiselo lerintshwa ra misava leyintshwa ya vanhu. [Tlhela u pfula xifaniso lexi nga eka tluka 302 ebukwini leyi nge Ku Chaputa Ka Nhlavutelo.] Xana u nga rhandza ku vona ndyangu wa wena wu tiphina ehansi ka swiyimo swo tano? [Yimela nhlamulo.] Xivutiso xi ri, Xana switshembiso swa Xikwembu swi tshembekile hi ndlela yihi? Ndzi kombela u xiya leswi xona hi xoxe xi swi vulaka.” Hlaya Nhlavutelo 21:5, 6a eka ndzimana 8 eka tluka 303. Vutisa xivutiso lexi gandlisiweke xa ndzimana 9 eka tluka 304, ivi u hlaya nhlamulo, kun’we ni xivulwa xo hetelela xa ndzimana leyi. N’wi byele hi ta nyiko ya mahala ya dyondzo ya Bibele. N’wi byele leswaku u ta n’wi kombisa madyondzelo ya kona enkarhini lowu taka.

⁴ Tanihi leswi vo tala va karhatekaka hi swiphiqo leswi yaka emahlweni leswi vanhu va langutaneke na swona, u nga ha vula swo fana ni leswi eriendzweni ro sungula: ◼“Vanhu vo tala lava ndzi hlanganeke na vona va khumbeka hi swiphiqo leswi hi langutanaka na swona etikweni ra hina. [Boxa swi nga ri swingani.] Van’watipolitiki va tshembise ku tisa mintlhantlho hilaha ku heleleke, naswona van’wana va ringetile ku endla tano. Xana u ehleketa leswaku i yini lexi endlaka leswaku swiyimo swi nyanya ku biha? [Yimela nhlamulo.] Bibele yi nyika nhlamulo leyi vanhu vo tala a va nga yi ehleketi. Buku ya Nhlavutelo yi hlamusela nyimpi leyi veke kona etilweni. Xiya vuyelo bya yona, hilaha swi tsariweke hakona eka Nhlavutelo 12:9.” Hlaya ndzimana leyi, ivi u pfula eka tluka 182 ebukwini leyi nge Ku Chaputa Ka Nhlavutelo. Tirhisa xifaniso leswaku u hlamusela ku nghenelela ka Sathana etimhakeni ta misava. Fambisa buku hi munyikelo wa R12,00. Kunguhata ku tlhela u vuya u ta hlamusela ndlela leyi Xikwembu xi nga ta tlhantlha swiphiqo swa vanhu ha yona.

⁵ Loko u tshembise ku tlhela u vuya u ta hlamusela ndlela leyi Xikwembu xi nga ta tlhantlha swiphiqo swa namuntlha ha yona, u nga ha ringeta xingheniso lexi: ◼“Ndzi tikarhatele ku tlhela ndzi vuya leswaku hi ta yisa bulo ra hina emahlweni malunghana ni ntlhantlho wa xiviri wa swiphiqo leswi vanhu va langutaneke na swona. Eriendzweni ra mina leri hundzeke, hi swi vonile leswaku Bibele yi hlamusela Sathana Diyavulosi a ri loyi a hambukisaka misava hinkwayo leyi akiweke. Tanihi leswi a nga xivumbiwa xa moya lexi nga ni matimba yo tlula ya munhu, xana u ehleketa leswaku yi kona ndlela leyi nkucetelo wakwe wu nga herisiwaka ha yona? [Yimela nhlamulo.] Ndzi kombela u xiya leswi Bibele yi swi vulaka.” Hlaya u tlhela u hlamusela Nhlavutelo 20:1-3. Loko u tirhisa xifaniso lexi nga eka matluka 4-5 ya buku leyi nge Vutivi, kombisa leswi swiyimo swi nga ta va xiswona loko nkucetelo wa Sathana wu ta va wu herisiwile. N’wi tivise hi ta dyondzo ya Bibele ivi u endla matshalatshala yo yi sungula xikan’we-kan’we.

⁶ Leswi vanhu vo tala swinene va tsakelaka mbango, u nga ha vula swin’wana swo fana ni leswi leswaku u sungula bulo: ◼“Hi kume leswaku vanhu vo tala va karhateka hi nthyakiso wa moya, mati ni swakudya swa hina. Ematikweni man’wana xiyimo xa mbango ana se xi xungeta vutomi. Leswi Xikwembu xi nga Mutumbuluxi wa misava, xana u ehleketa leswaku xi ta endla yini hi mhaka leyi? [Yimela nhlamulo.] Bibele yi vula leswaku hi ta tihlamulela emahlweni ka Xikwembu hikwalaho ka ndlela leyi hi tirhisaka misava ha yona. [Hlaya Nhlavutelo 11:18b.] Titeke u ri karhi u hanya emisaveni leyi nga ha riki na nthyakiso!” Kombisa xitshembiso xa Xikwembu xa paradeyisi, hilaha swi kombisiweke hakona eka Nhlavutelo 21:3, 4. Kombisa xifaniso lexi nga eka tluka 302 ebukwini leyi nge Ku Chaputa Ka Nhlavutelo. Fambisa buku hi munyikelo wa R12,00.

⁷ Loko u tlhelela eka munhu la kombiseke ku tsakela misava ya Paradeyisi, u nga ha ku: ◼“Eriendzweni ra mina leri hundzeke, hi pfumerile leswaku loko ku ta tlhantlhiwa xiphiqo xa misava leyi thyakisiweke, Xikwembu xi ta boheka ku nghenelela etimhakeni ta vanhu. Kambe xivutiso xi ri, Xana hi fanele hi endla yini leswaku hi ponela emisaveni leyintshwa yo lulama leyi Xikwembu xi yi tshembiseke?” Hlaya Yohane 17:3. Khutaza n’wini wa muti leswaku a tirhisa khoso ya dyondzo ya hina ya Bibele ya mahala leswaku a ta kuma vutivi byo hlawuleka.

⁸ Mawaku lunghelo ro tirhisiwa tanihi vatirhi va ntshovelo va manguva lawa ni ku endla ntirho wo chumayela lowu ponisaka vutomi! Onge hinkwerhu ka hina hi nga tshama hi ri karhi hi twarisa mahungu lamanene hi ku gingiriteka, ‘hi ku tiva leswaku ntirho wa hina a hi wa hava.’—1 Kor. 15:58.