Rhamba Vanhu Hinkwavo Lava Nga Ni Torha
1 Hilaha Muprofeta Amosi A Vhumbheke Hakona, Ndyangu Wa Vanhu Namuntlha Wu Dlaya Hi “Torha, Ku Nga Ri Ra Mati, Kambe Ra Ku Twa Marito Ya Yehovha.” (Am. 8:11, NW) Leswaku Hi Pfuna Vanhu Lava Nga Exiyin’weni Lexi Xa Torha Ra Moya, Hi Va Byela Hi Ta Malunghiselelo Ya Xikwembu Eka Vanhu Lava Yingisaka Lava Hlakarhelaka Eka Xidyoho Ni Rifu Lama Kombisiweke Eka Ndzima Yo Hetelela Ya Nhlavutelo Tanihi “Nambu Wa Mati Ya Vutomi.” Hi Ni Lunghelo Ro Rhamba Vanhu Hinkwavo Lava Nga Ni Torha Ra Leswo Lulama Leswaku Va “Nw[a] Mati Ya Vutomi Mahala.” (Nhlav. 22:1, 17) Xana Leswi Hi Nga Swi Endla Njhani Hi February? Hi Ku Fambisela Vanhu Lava Hakunene Va Tsakelaka Buku Leyi Nge Nhlavutelo—ku Chaputa Ka Yona Loku Hlamarisaka Ku Tshinele! U Nga Ha Tsakela Ku Ringeta Swingheniso Leswi:
2 Tanihi leswi vanhu vo tala va karhatekaka hi timhaka ta rihanyo, u nga ha kuma leswaku xingheniso lexi xa fanela:
◼ “Vo tala va karhateka malunghana ni ku tlakuka ka tihakelo ta swa vutshunguri bya xiyimo xa le henhla. Kumbexana u tshama u anakanyisisa hi mhaka leyi. [Yimela nhlamulo.] Xana wu kona ntlhantlho wa hilaha ku nga heriki wa xiphiqo lexi? [Yimela nhlamulo.] Hi lebyi vumundzuku lebyi hlamarisaka.” Hlaya Nhlavutelo 22:1, 2. Kutani pfula buku leyi nge Ku Chaputa Ka Nhlavutelo eka xifaniso lexi nga eka matluka 308-9, ivi u tirhisa ndzimana 22 eka tluka 311 leswaku u xi hlamusela. Gimeta hi ku vula u ku: “Buku leyi yi hlamusela ndzimana yin’wana ni yin’wana ya Nhlavutelo.” Fambisa buku hi munyikelo lowu tolovelekeke. Endla malunghiselelo yo tlhelela.
3 Loko u endla riendzo ro vuyela, u nga ha sungula bulo ra wena hi ku vula u ku:
◼ “Loko ndzi ri laha enkarhini lowu nga hundza, hi vulavule hi ntlhantlho wa hilaha ku nga heriki ehenhleni ka swiphiqo swa rihanyo. Xana u ehleketa leswaku wu ta va kona nkarhi lowu ku nga ta va ku ri hava munhu la vabyaka? [Yimela nhlamulo.] Xiya nhlamuselo leyi leyi hlamarisaka.” Hlaya Esaya 33:24. Kutani pfula dyondzo 5 eka broxara leyi nge Leswi Xi Swi Languteleke, ivi u hlamusela tindzimana 5-6, vutisa swivutiso leswi fambisanaka na tona eku sunguleni ka dyondzo ivi u pfula matsalwa ma nga ri mangani lama kombisiweke. Boxa leswaku ku herisiwa ka vuvabyi ni rifu i xiphemu xa ku hetiseka ka xikongomelo xo sungula xa Xikwembu hi misava. Endla malunghiselelo yo tlhelela leswaku mi ya burisana hi tindzimana 1-4 na 7 eka dyondzo yoleyo.
4 Loko vanhu va tshamela ku vulavula hi mahungu lawa eka wona ku vulavuriweke hi rifu ra xitshuketa, u nga ha ringeta xingheniso lexi:
◼“U nga ha va u ti twile ta [boxa timhaka ta le mahungwini]. Loko ku humelela rifu leri hlomulaka mbilu, vo tala va tivutisa leswaku i nchavelelo muni lowu nga nyikiwaka mindyangu leyi feriweke. Xana u ehleketa yini?” Yimela nhlamulo. Kutani pfula tluka 299 ebukwini leyi nge Ku Chaputa Ka Nhlavutelo, ivi u n’wi komba xifaniso lexi kombisiweke xa ku pfuxiwa ka vafi. Yana emahlweni u ku: “Vo tala va hlamarisiwa hi ku tiva leswaku vanhu lava lulameke ni lava nga lulamangiki va ta tlheriseriwa evuton’wini aParadeyisini emisaveni. [Hlaya Mintirho 24:15 hilaha yi tshahiweke hakona eka ndzimana 9 eka tluka 297, ivi u nyikela nhlamuselo leyi kumekaka eka ndzimana 10.] Buku leyi yi hlamusela vuxokoxoko byin’wana byo tala lebyi tsakisaka malunghana ni xikongomelo xa Xikwembu hi vumundzuku. Loko u tsakela ku dyondza swo tala malunghana na swona, buku leyi yi nga va ya wena hi munyikelo wa R12,00.” Endla malunghiselelo yo tlhela u vuyela, xalamukela swilo leswi tsakisaka munhu yoloye ni leswi n’wi karhataka.
5 Loko u tlhelela, twananisa xingheniso xa wena ni n’wini wa muti. Kumbexana u nga ku:
◼ “Loko hi vulavula nkarhi lowu nga hundza, ndzi tsakele marito ya wena malunghana ni xikongomelo xa Xikwembu hi misava. [Tlhela u vula marito ya yena.] Ndzi te ni rungula rin’wana leri ndzi ehleketeke leswaku ri ta ku tsakisa.” Pfula broxara leyi nge Leswi Xi Swi Languteleke eka dyondzo 5. Hlaya ni ku hlamusela tindzimana to tala ta dyondzo yoleyo ntsendze loko n’wini wa muti a ha swi tsakela. Endzhaku ka ku veka nkarhi wo tlhelela leswaku mi ta yisa dyondzo emahlweni, nyika n’wini wa muti xiphephana lexi hlamuselaka minkarhi ya minhlangano ya vandlha ra ka n’wina. Hlamusela hi ta Nhlangano wa le Rivaleni, ivi u n’wi rhamba leswaku a va kona.
6 Loko u tsakela xingheniso xo olova swinene lexi fambisanaka ni xiphephana, u nga ha vula leswi:
◼ “Ndzi tsakela ku ku nyika xiphephana lexi nge Hi Wihi Ntshembo Wa Varhandziwa Lava Feke? Xi nyike n’wini wa muti, ivi u n’wi kombela ku fambisana na wena loko u hlaya ndzimana yo sungula. N’wi nyike nkarhi wo hlamula xivutiso lexi vutisiweke eka xiga xo hetelela. Hlaya ndzimana ya vumbirhi, ivi u pfula xifaniso lexi nga eka tluka 299 ebukwini leyi nge Ku Chaputa Ka Nhlavutelo. Yana emahlweni u ku: “Buku leyi yi nyika vuxokoxoko byo tala malunghana ni ku pfuxiwa ka vafi ni switshembiso swin’wana leswi hlamarisaka swa le Bibeleni malunghana ni vumundzuku. Loko u tsakela ku yi hlaya, ndzi nga ku nyika yona hi munyikelo wa R12,00.” Endla malunghiselelo yo tlhelela leswaku u ta hambeta u pfuna munhu la tsakelaka ntiyiso.
7 Ku yisa ka hina xirhambo lexi tsakisaka eka van’wana swi nga endla leswaku va ta ematini ya vutomi, lawa Yehovha a endlaka leswaku ma kumeka sweswi. Hikokwalaho, a hi byeleni hinkwavo lava nga ni torha hi ku, “Tana!”—Nhlav. 22:17.