Dyondzo 5

Hi Xihi Xikongomelo Xa Xikwembu Hi Misava?

Ha yini Yehovha a vumbe misava? (1, 2)

Ha yini misava yi nga ri paradeyisi sweswi? (3)

Xana ku ta humelela yini hi vanhu lavo biha? (4)

Enkarhini lowu taka, xana Yesu u ta va endlela yini lava vabyaka? lava dyuhaleke? lava feke? (5, 6)

Leswaku u kuma mikateko leyi taka, xana u fanele ku endla yini? (7)

1. Yehovha u vumbe misava leyi leswaku vanhu va tiphina hi ku hanya eka yona hi masiku. A a lava leswaku emisaveni ku tshama vanhu lavo lulama ni lava tsakeke. (Pisalema 115:16; Esaya 45:18) Misava a yi nge herisiwi ni siku ni rin’we; yi ta tshama hilaha ku nga heriki.—Pisalema 104:5; Eklesiasta 1:4.

2. Loko Xikwembu xi nga si endla munhu, xi hlawule xiphemu xin’we lexitsongo xa misava ivi xi xi endla paradeyisi leyo saseka. Xi yi thye leswaku i ntanga wa Edeni. Hi kona laha xi vekeke wanuna ni wansati wo sungula, Adamu na Evha. Xikwembu a xi kunguhate leswaku va va ni vana kutani va tata misava hinkwayo. Hakatsongo-tsongo a va ta endla misava hinkwayo yi va paradeyisi.—Genesa 1:28; 2:8, 15.

3. Adamu na Evha va dyohe hi ku tlula nawu wa Xikwembu hi vomu. Hikwalaho Yehovha u va hlongorile entangeni wa Edeni. Ku va ku lahleka ka Paradeyisi. (Genesa 3:1-6, 23) Kambe Yehovha a nga xi rivalanga xikongomelo xa yena hi misava leyi. U tshembisa ku yi endla paradeyisi, laha vanhu va nga ta hanya kona hi masiku. Xana u ta swi endlisa ku yini leswi?—Pisalema 37:29.

4. Loko misava leyi yi nga si endliwa paradeyisi, ku fanele ku rhanga ku susiwa vanhu lavo homboloka. (Pisalema 37:38) Leswi swi ta humelela eArmagedoni, leyi nga nyimpi ya Xikwembu yo herisa vuhomboloki. Endzhaku, Sathana u ta bohiwa ku ringana 1 000 wa malembe. Leswi swi vula leswaku a ku nge vi na vanhu lavo homboloka lava nga ta sala va onha misava. Ku ta pona vanhu va Xikwembu ntsena.—Nhlavutelo 16:14, 16; 20:1-3.

5. Kutani Yesu Kreste u ta va Hosi leyi fumaka emisaveni leyi ku ringana malembe ya 1 000. (Nhlavutelo 20:6) Hakatsongo-tsongo u ta susa xidyoho emianakanyweni ni le mimirini ya hina. Hi ta va vanhu lava hetisekeke ku fana ni leswi Adamu na Evha a va ri xiswona loko va nga si dyoha. Kutani a ku nge he vi na vuvabyi, ku dyuhala ni rifu. Vanhu lava vabyaka va ta tshunguriwa, naswona vanhu lava dyuhaleke va ta tlhela va hundzuka lavantshwa.—Yobo 33:25; Esaya 33:24; Nhlavutelo 21:3, 4.

6. Hi nkarhi wa ku Fuma ka Yesu ka Gidi ra Malembe, vanhu lavo tshembeka va ta tirha hi xikongomelo xo hundzula misava hinkwayo yi va paradeyisi. (Luka 23:43) Nakambe, timiliyoni ta lava feke ti ta pfuxiwa ti tlheriseriwa evuton’wini emisaveni. (Mintirho 24:15) Loko va endla leswi Xikwembu xi swi lavaka eka vona, va ta hambeta va hanya emisaveni hi masiku. Loko swi nga ri tano, va ta loviseriwa makumu.—Yohane 5:28, 29; Nhlavutelo 20:11-15.

7. Xisweswo xikongomelo xo sungula xa Xikwembu hi misava xi ta humelela. Xana u nga tsakela ku kuma mikateko leyi ya nkarhi lowu taka? Loko swi ri tano, u fanele ku hambeta u dyondza hi ta Yehovha ni ku yingisa swileriso swa yena. Ku va kona eminhlanganweni eHolweni ya Mfumo ya Timbhoni ta Yehovha ya le ndhawini ya ka n’wina swi ta ku pfuna ku endla tano.—Esaya 11:9; Vaheveru 10:24, 25.

[Xifaniso lexi nga eka tluka 10]

Paradeyisi yi lahleka

[Swifaniso leswi nga eka tluka 11]

Endzhaku ka Armagedoni, misava yi ta hundzuriwa paradeyisi