Nkarhi Wa Xitsundzuxo I Wo Endla Ntirho Lowu Engetelekeke
1. Xana ‘minkhuvo leyi vekiweke’ leyi Vaisrayele lava chavaka Xikwembu a va yi tlangela, a yi va khumba njhani?
1 Hi minkarhi yo karhi elembeni, Vaisrayele va khale a va tlangela “minkhuvo ya Yehovha leyi vekiweke.” (Lev. 23:2) Loko va tinyika nkarhi wo anakanyisisa hi vunene bya Xikwembu, a va tsaka swinene naswona a va susumeteleka ku hisekela vugandzeri byo tenga.—2 Tikr. 30:21–31:2.
2, 3. Ha yini swi fanerile leswaku hi ndlandlamuxa ntirho wa hina hi tlhelo ra moya etin’hwetini ta Xitsundzuxo, naswona hi ta xi tlangela rini?
2 Manguva lawa, ntirho wa hina lowu tsakisaka ngopfu wu ya wu engeteleka lembe ni lembe hi nkarhi wa Xitsundzuxo. I nkarhi lowu hi anakanyisisaka hi nyiko ya nkoka swinene leyi Yehovha a hi nyikeke yona—ku nga N’wana wakwe la tswariweke a ri swakwe. (Yoh. 3:16; 1 Pet. 1:18, 19) Loko hi ri karhi hi anakanyisisa hi rirhandzu leri Xikwembu ni N’wana wa xona va hi kombiseke rona, hi titwa hi boheka ku dzunisa Yehovha ni ku tikarhata swinene leswaku hi endla ku rhandza ka yena.—2 Kor. 5:14, 15.
3 Nan’waka Xilalelo xa Hosi xi ta tlangeriwa hi Ravumune, March 24 endzhaku ka ku pela ka dyambu. Xana hi nga wu engetela njhani nkarhi lowu hi wu hetaka ensin’wini hi n’hweti ya March, April na May?
4, 5. (a) Xana van’wana va pfuniwe hi yini leswaku va kota ku byela vanhu vo tala mahungu lamanene? (b) Hi yihi ndlela leyi u yi kumeke yi tirha ensin’wini ya n’wina?
4 Ku Vulavula Ni Vanhu Vo Tala: Loko u ri ensin’wini, kuma tindlela to chumayela vanhu vo tala hilaha u nga kotaka hakona. Xana u nga hlela ku tirha hi yindlu ni yindlu loko vanhu vo tala va ri kona emakaya, ku fana nindzhenga kumbe nimadyambu? Loko van’wana eka ntlawa wa n’wina wa dyondzo ya buku va ta tsakela ku rhanga hi ku ya ensin’wini dyondzo yi nga si sungula, mukhomi wa dyondzo ya buku a nga ha hlela leswaku ku va ni nhlangano wo koma wa ntirho wa nsimu, leswaku ku tirhiwa nsimu ya le kusuhi.
5 Ndlela yin’wana yo kota ku vulavula ni vanhu vo tala i ku chumayela etindhawini leti nga tala hi vanhu. Makwerhu un’wana wa xisati le Japani a a lava ku teka vuphayona bya nkarhinyana hambileswi a a tirha. Hiloko nkulu un’wana a ringanyeta leswaku siku ni siku loko a nga si ya entirhweni, a rhanga hi ku fambisa timagazini ekusuhi ni xitichi xa xitimela. Kutani, endzhaku ko hlula vutoya lebyi a a ri na byona ni ku hlekuriwa hi vakhandziyi van’wana, u sungule ntila wa timagazini eka vanhu va kwalomu ka 40, ku katsa ni lava tirhaka exitichini, vakhandziyi-kulobye ni vini va switolo swa le kusuhi. U fambise timagazini ta 235 hi xiringaniso, hi n’hweti. Hi ku bulanyana ni vanhu hi Matsalwa siku ni siku, u kote ku sungula tidyondzo ta Bibele ta tsevu.
6. Xana vantshwa va nga wu engetela njhani nkarhi lowu va wu hetaka ensin’wini?
6 Minkarhi Yo Chumayela: Vahuweleri vo tala lava ha nghenaka xikolo minkarhi yin’wana va pfala exikolweni. Leyi yi nga va minkarhi ya kahle yo teka vuphayona bya nkarhinyana. Tlhandla-kambirhi, vantshwa va nga engetela nkarhi lowu va wu hetaka ensin’wini hi ku chumayela exikolweni. U ta hlamala ku vona ndlela leyi swichudeni-kuloni swi navelaka ha yona ku tiva swo tala hi vukhongeri bya wena. Ha yini nkarhi wa mabulo ya le tlilasini kumbe nkarhi wo tsala switsalwana u nga wu tirhiseli ku vulavula hi ripfumelo ra wena? Van’wana va chumayele hi ku tirhisa tivhidiyo ta hina. Van’wana va sungule tidyondzo ta Bibele ni swichudeni-kulobye ivi va swi pfuna ku endla nhluvuko swi kondza swi tinyiketela ivi swi khuvuriwa. Leti i tindlela ta kahle to ‘dzunisa vito ra Yehovha.’—Ps. 148:12, 13.
7. (a) Xana makwerhu un’wana u yi tirhise njhani minkarhi leyi a vaka na yona leswaku a chumayela van’wana? (b) Xana na wena u ve ni ntokoto wo yelana ni lowu?
7 Eka mintirho ya wena ya siku ni siku, ringeta tindlela to hambana-hambana to vulavula ni vanhu hi Xikwembu xerhu lexi tlakukeke ni hi switshembiso swa xona leswinene. Makwerhu un’wana la fambaka hi xitimela xin’we siku ni siku u chumayela vakhandziyi-kulobye loko swi fanerile. Hi xikombiso, loko a yimele xitimela, a a hamba a chumayela jaha rin’wana ku ringana timinete ta ntlhanu. Kutani, jaha rero swin’we ni mutirhi-kulobye va amukele dyondzo ya Bibele. Dyondzo yoleyo ya Bibele a yi fambiseriwa exitimeleni. Endzhaku ka nkarhi, mukhegula un’wana loyi a a rhiya ndleve loko va ri karhi va bula u kombele makwerhu yoloye leswaku a dyondza na yena Bibele. Na yena u dyondzeriwa hi masiku lawa a fambaka hi xitimela. Makwerhu loyi u dyondze ni vanhu va khume exitimeleni hi ndlela yoleyo.
8. Hi yihi ndlela yo chumayela leyi nga pfunaka lava nga kotiki ku chumayela vanhu vo tala hikwalaho ka vudyuhari kumbe rihanyo, leswaku va kota ku chumayela nkarhi lowu engetelekeke?
8 Ku vuriwa yini loko u nga swi koti ku chumayela vanhu vo tala hikwalaho ka malembe kumbe hikwalaho ka rihanyo? Ti kona tindlela tin’wana leti u nga ndlandlamuxaka ndlela leyi u nga dzunisaka Yehovha ha tona. Xana u ringetile ku chumayela hi riqingho? Loko u nga tiyiseki leswaku u ta sungurisa ku yini, swa antswa u byela mulanguteri wa dyondzo ya buku. A nga ha ku lavela vahuweleri lava va chumayelaka hi riqingho leswaku va chumayela na wena hi ku tirhisa riqingho. Ku tirha ni van’wana, swi nga hi pfuna leswaku hi dyondza swo karhi eka vona ni ku nyikela vumbhoni hi rixaladza. Swiringanyeto leswi pfunaka loko u chumayela hi riqingho swi kumeka eka Vutirheli Bya Hina Bya Mfumo bya February 2001, matluka 5-6.
9. Xana hi nga swi pfuna njhani swichudeni swa Bibele leswaku swi fanelekela ku huma nsimu ni vandlha?
9 Vanhu lava ha ku sungulaka ku hlanganyela, loko va ta eXitsundzuxweni swi nga va khutaza leswaku va navela ku dzunisa Yehovha. U nga va pfuna leswaku va hlula ku chava kwihi na kwihi loku va nga na kona, hi ku va rungulela mintokoto ya le nsin’wini leyi khutazaka, ni hi ku va letela ku hlamusela tidyondzo ta Bibele swin’we ni ku yimelela ripfumelo ra vona. (1 Pet. 3:15) Loko xichudeni xa Bibele xi vula leswaku xi navela ku sungula ku chumayela mahungu lamanene swin’we ni vandlha, vulavula ni mulanguteri la ungamelaka. Kutani u ta hlela leswaku xichudeni xi kamberiwa ku vona loko xi faneleka ku huma nsimu ni vandlha. Anakanya ndlela leyi Yehovha a tsakaka ha yona loko a vona vanhu lava ha ku sungulaka ku hlanganyela, va teka goza ro yima na yena eka mphikamakaneta leyi nga kona ya vuako hinkwabyo!—Swiv. 27:11.
10. (a) Xana xiyimiso lexinene xi nga hi pfuna njhani leswaku hi va maphayona ya nkarhinyana? (b) Xana u swi kotile ku teka vuphayona bya nkarhinyana n’wexemu hi nkarhi wa Xitsundzuxo? U swi endlise ku yini?
10 Xana U Nga Teka Vuphayona Bya Nkarhinyana? Xilaveko xa tiawara ta 50 leti faneleke ti fikeleriwa hi maphayona ya nkarhinyana xi fanele xi xiximiwa. (Mat. 5:37) Leswi swi vula leswaku u ta fanela ku hlela ku tirha nsimu tiawara ta 12 hi xiringaniso vhiki ni vhiki. Xana xikombiso xa xiyimiso xa vuphayona bya nkarhinyana lexi nga eka tluka 5 xi fanela swiyimo swa wena? Loko swi nga ri tano, xana u nga hlela xiyimiso lexi nga ta ku pfumelela ku teka vuphayona bya nkarhinyana hi March, April kumbe hi May? Kombela Yehovha leswaku a seketela matshalatshala ya wena yo engetela nkarhi lowu u wu hetaka u ri ensin’wini.—Swiv. 16:3.
11. Vakulu ni malandza ya vutirheli va nga va seketela njhani lava tekaka vuphayona bya nkarhinyana?
11 Vakulu ni malandza ya vutirheli va ta ma seketela hi xitalo matshalatshala ya wena yo dzunisa Yehovha hi ndlela yo hlawuleka hi nguva ya Xitsundzuxo. Loko swi koteka, vo tala va vona va ta teka vuphayona bya nkarhinyana. Vakulu va ta hlela minhlangano leyi engetelekeke, ya nindzhenga ni ya nimadyambu exikarhi ka vhiki ni hi mahelo-vhiki, hi ku ya hi leswi swi nga ta lavisiwa xiswona. Ku mi pfuna mi tiva lomu yi nga ta khomeriwa kona ni nkarhi lowu yi nga ta fambisiwa ha wona ni loyi a nga ta yi fambisa, vakulu va ta vulavula ni lava nga teka vuphayona kumbe lava va kunguhataka ku byi teka. Vakulu va ta tikarhatela ku endla malunghiselelo leswaku ku va ni vahuweleri van’wana lava u nga ta tirha na vona hi masiku ni hi minkarhi leyi u yi vekeleke ntirho wa nsimu. Hi ndlela yoleyo, malunghiselelo lawa mi ma endleke ma ta famba kahle naswona ku ta endliwa ntirho lowukulu.—Swiv. 20:18.
12. I yini leswi hi susumetelaka ku dzunisa Yehovha minkarhi hinkwayo?
12 Endla Hinkwaswo Leswi U Nga Swi Kotaka: Loko swiyimo swa wena swi nga ku pfumeleli leswaku u va phayona ra nkarhinyana, u nga rivali leswaku Yehovha u amukela matshalatshala lawa hi ma endlaka ‘hi ku ya hi leswi hi nga na swona, ku nga ri hi leswi hi nga riki na swona.’ (2 Kor. 8:12) Hi na swo tala leswi hi nga nkhensaka Yehovha hikwalaho ka swona. Davhida a a ri na xivangelo lexi twalaka xo tsala a ku: “Ndzi ta nkhensa Yehovha minkarhi hinkwayo; ku n’wi dzunisa ku ta va enon’wini wa mina nkarhi hinkwawo.” (Ps. 34:1) Onge na hina hi nga tiyimisela ku endla tano eka nguva leyi ya Xitsundzuxo.
[Bokisi leri nga eka tluka 3]
Xana U Ta Wu Engetela Njhani Nkarhi Lowu U Wu Hetaka eNsin’wini?
◼ Chumayela hi nkarhi lowu vanhu va nga kona emakaya
◼ Chumayela etindhawini ta mani na mani
◼ Chumayela entirhweni kumbe exikolweni
◼ Chumayela hi riqingho
◼ Teka vuphayona bya nkarhinyana
[Chart on apge 5]
Xikombiso Xa Swiyimiso Swa Vuphayona Bya Nkarhinyana—Tindlela To Fikelela Tiawara Ta 12 eNtirhweni Wa Nsimu Vhiki Rin’wana Ni Rin’wana
Nimixo—Musumbhunuku Ku Fika Hi Mugqivela
Sonto yi nga ha siva rin’wana ra masiku lawa u ma tluleke.
Siku Nkarhi Tiawara
Musumbhunuku Nimixo 2
Ravumbirhi Nimixo 2
Ravunharhu Nimixo 2
Ravumune Nimixo 2
Ravuntlhanu Nimixo 2
Mugqivela Nimixo 2
Ntsengo Wa Tiawara: 12
Masiku Mambirhi Hinkwawo
U nga ha hlawula masiku wahi ni wahi mambirhi evhikini. (Xiyimiso lexi xi nga ha ku nyika tiawara ta 48 ntsena n’hweti hinkwayo, swi ta ya hi masiku lawa u ma hlawuleke.)
Siku Nkarhi Tiawara
Ravunharhu Siku Hinkwaro 6
Mugqivela Siku Hinkwaro 6
Ntsengo Wa Tiawara: 12
Madyambu Ya Masiku Mambirhi Ni Mahelo-vhiki
U nga ha hlawula madyambu wahi na wahi mambirhi exikarhi ka vhiki.
Siku Nkarhi Tiawara
Musumbhunuku Nimadyambu 11⁄2
Ravunharhu Nimadyambu 11⁄2
Mugqivela Siku Hinkwaro 6
Sonto Hafu Ya Siku 3
Ntsengo Wa Tiawara: 12
Mindzhenga Minharhu Ni Mugqivela
Sonto yi nga ha siva rin’wana ra masiku lawa u ma tluleke.
Siku Nkarhi Tiawara
Musumbhunuku Nindzhenga 2
Ravunharhu Nindzhenga 2
Ravuntlhanu Nindzhenga 2
Mugqivela Siku Hinkwaro 6
Ntsengo Wa Tiawara: 12
Xiyimiso Xa Mina N’wini Xa Ntirho Wa Nsimu
Tivekele tiawara leti u nga ta ti fikelela nkarhi wun’wana ni wun’wana.
Siku Nkarhi Tiawara
Musumbhunuku
Ravumbirhi
Ravunharhu
Ravumune
Ravuntlhanu
Mugqivela
Sonto
Ntsengo Wa Tiawara: 12