Chumayela Hi Ku Phikelela
1 Minkarhi ya mangava se yi fikile. Nyimpi ya xin’wana manana, tinyimpi ta rixaka, makhombo ya ntumbuluko ni swiendlakalo swin’wana leswi chavisaka se ko va tshamela maxelo. Namuntlha vanhu va lava ku twa mahungu lamanene ku tlula rini na rini. Hambiswiritano, va tele lava nga swi tsakeliki swilo swa moya. Etindhawini tin’wana, swa tika ku kuma vanhu emakaya hambi ku ri ku kuma vanhu lava va nga ta hi yingisela kumbe lava lavaka ku dyondza Bibele. Hambiswiritano, i swa nkoka leswaku hi phikelela eku chumayeleni mahungu lamanene ya Mfumo wa Xikwembu lowu simekiweke.—Mat. 24:14.
2 Ku Rhandza Vanhu: Ku chumayela ka hina swi endla vanhu va swi vona leswaku Yehovha wa va rhandza. ‘A nga naveli leswaku ku lova ni un’we kambe u navela leswaku hinkwavo va hundzuka.’ (2 Pet. 3:9; Ezek. 33:11) Yesu u vule hilaha Yehovha a leriseke ha kona loko a ku, “mahungu lamanene ma fanele ku chumayeriwa ematikweni hinkwawo ku sungula.” (Mar. 13:10) Xikwembu xi khongotela vanhu leswaku va hundzukela eka xona ni ku baleka ku avanyisiwa loku taka ka misava ya Sathana. (Yuw. 2:28, 29, 32; Sof. 2:2, 3) Xana a hi tsaki leswi Yehovha a hi nyikeke lunghelo rolero?—1 Tim. 1:12, 13.
3 Xiviko xa misava hinkwayo xi kombisa leswaku hi lembe ra ntirho ra 2004, n’hweti yin’wana ni yin’wana ku fambisiwe tidyondzo ta Bibele ta 6 085 387 hi xiringaniso naswona vhiki rin’wana ni rin’wana ku khuvuriwe vadyondzisiwa lavantshwa va kwalomu ka 5 000 hi xiringaniso! Van’wana va lava va ha ku tinyiketelaka va kumiwe hikwalaho ka leswi Yehovha a katekiseke vahuweleri lava endleke matshalatshala yo vulavula ni un’wana ni un’wana ensin’wini ya vona. Mayana ntsako lowu mavandlha ma nga na wona ni lunghelo ro va vatirhi-kulobye ni Xikwembu entirhweni lowu wo ponisa vutomi!—1 Kor. 3:5, 6, 9.
4 Ku Dzunisa Vito Ra Xikwembu: Hi chumayela hi ku phikelela leswaku hi dzunisa Yehovha erivaleni ni ku kwetsimisa vito rakwe eka vanhu hinkwavo. (Hev. 13:15) Sathana u xise “misava hinkwayo leyi akiweke” leswaku yi tshemba leswaku Xikwembu a xi na wona matimba yo lulamisa swiphiqo swa vanhu ni leswaku a xi na mhaka ni ku xaniseka ka vanhu naswona a xi kona. (Nhlav. 12:9) Loko hi chumayela, hi lwela ntiyiso lowu seketelaka Tata wa hina la tlakukeke la nge matilweni. Onge hi nga hambeta hi dzunisa vito rakwe—sweswi ni hilaha ku nga heriki.—Ps. 145:1, 2.