Dyondzisa Lava Titsongahataka Leswaku Va Famba eNdleleni Ya Xikwembu
1. I yini leswi katsekaka entirhweni wa ku endla vadyondzisiwa?
1 Vadyondzisiwa va Kreste va lembe-xidzana ro sungula va vuriwe leswaku i va “Ndlela.” (Mint. 9:2) Vukreste bya ntiyiso byi lava leswaku munhu a hanya ha byona vutomi bya yena hinkwabyo. (Swiv. 3:5, 6) Hikwalaho loko hi fambisa tidyondzo ta Bibele, hi fanele hi endla leswi engetelekeke leswaku hi nghenisa vutivi lebyi kongomeke bya Bibele. Nakambe hi fanele hi pfuna swichudeni swa Bibele leswaku swi famba endleleni ya Yehovha.—Ps. 25:8, 9.
2. I yini lexi nga susumetaka xichudeni xa Bibele leswaku xi yingisa milawu ya Xikwembu?
2 Ku Rhandza Yehovha Na Yesu: Entiyisweni a swi olovi leswaku vanhu lava nga hetisekangiki va endla leswaku mianakanyo, malangutelo, mavulavulelo ni mahanyelo ya vona, swi fambisana ni ku rhandza ka Xikwembu! (Rhom. 7:21-23; Efe. 4:22-24) Hambiswiritano, ku rhandza Xikwembu ni N’wana wa xona swi susumeta vanhu va timbilu letinene leswaku va lwa hi matimba leswaku va endla tano. (Yoh. 14:15; 1 Yoh. 5:3) Xana hi nga swi pfuna njhani swichudeni swa hina swa Bibele leswaku swi hlakulela rirhandzu ro tano?
3. Hi nga swi pfuna njhani swichudeni leswaku swi hlakulela ku rhandza Yehovha na Yesu?
3 Pfuna xichudeni xa wena leswaku xi tiva leswaku Yehovha i Xikwembu xa njhani. Makwerhu un’wana u vule leswi, “Vanhu a va swi koti ku rhandza munhu loyi va nga n’wi tiviki, kutani loko ndza ha ku sungula ku dyondza ni vanhu, ndzi vhela ndzi va dyondzisa vito ra Xikwembu eBibeleni, ndzi tlhela ndzi lava tindlela to kandziyisa timfanelo ta xona.” Ku kandziyisa timfanelo ta Yesu i ndlela leyinene ngopfu yo aka xichudeni. (Yoh. 1:14; 14:9) Ku tlula kwalaho, tirhisa swivutiso leswi nga ebokisini ra mpfuxeto leri nga emakumu ka ndzima yin’wana ni yin’wana ya buku leyi nge Leswi Bibele Yi Swi Dyondzisaka, u pfuna xichudeni leswaku xi twisisa timfanelo leti hlamarisaka ta Xikwembu ni ta N’wana wa xona.
4. (a) Ha yini swichudeni swo tala swi vona ntirho wo chumayela wu nga ri matlangwana? (b) Xana hi nga swi pfuna njhani swichudeni swa hina leswaku swi sungula ku huma nsimu?
4 Dyondzisa Hi Swiendlo: Tanihi vadyondzisi ni vakongomisi, hi fanele hi kombisa van’wana hi swiendlo leswaku ku famba endleleni ya Xikwembu swi vula yini. (1 Kor. 11:1) Hi xikombiso, swichudeni swo tala swa Bibele a swi swi tolovelanga ku sungula bulo ra Bibele ni vanhu lava swi nga va tiviki. Hikwalaho, ku nga ha laveka u swi lehisela mbilu naswona u va ni vutshila byo swi pfuna leswaku swi va ni rirhandzu, ripfumelo ni xivindzi ku nga tona timfanelo leti lavekaka entirhweni wo chumayela ni wa ku endla vadyondzisiwa. (2 Kor. 4:13; 1 Tes. 2:2) Leswi hi navelaka ku kongomisa swichudeni hi ta susumeteleka ku swi seketela loko swi sungula ku huma nsimu.
5. Xana swiendlo leswinene swi swi pfuna njhani swichudeni leswaku swi twisisa leswi katsekaka leswaku munhu a landzela milawu ya Xikwembu?
5 Swiendlo swa wena leswinene swi ta dyondzisa swichudeni tindlela tin’wana ta nkoka ta mahanyelo ya Vukreste. Loko u endzela lava vabyaka kumbe u xeweta van’wana hi moya wa rirhandzu eminhlanganweni ya vandlha, swa ri vona rirhandzu ra wena leri fambisanaka ni mintirho. (Yoh. 15:12) Loko u basisa Holo ya Mfumo kumbe u pfuna van’wana hi swo karhi, u va u ri eku dyondziseni ka swichudeni swa wena ndlela yo tirhela van’wana. (Yoh. 13:12-15) Loko swi ku vona leswaku u tihanyela vutomi byo olova, swi kota ku twisisa leswi ‘ku lava mfumo ku sungula’ swi vulaka swona.—Mat. 6:33.
6. Hi byihi vuyelo bya ku pfuna vanhu va timbilu letinene leswaku va tirhela Yehovha?
6 Ntirho wo dyondzisa van’wana hi Rito ra Xikwembu ni wa ku endla vadyondzisiwa wu lava leswaku munhu a endla matshalatshala. Hakunene swa tsakisa ku vona lava titsongahataka va ri karhi va “famba entiyisweni”!—3 Yoh. 4.