Pfuna Van’wana Leswaku Va Va Vanghana Va Xikwembu
1 Namuntlha, vanhu va matiko hinkwawo va karhi va dyondzisiwa tindlela ta Yehovha. (Esa. 2:2, 3) Hambiswiritano, leswaku va “veka mihandzu hi ku tiyisela” va fanele va rhandza Yehovha. (Luka 8:15; Mar. 12:30) Loko va nga n’wi rhandzi, a va nge vi na wona matimba yo hlula minkucetelo yo biha naswona a va nge vi na xona xivindzi xo endla leswi lulameke. Ndlela yin’wana yo pfuna van’wana leswaku va va ni vuxaka lebyinene na Yehovha i ku va pfuna leswaku va rhandza timfanelo ta yena. Va khutaze leswaku va anakanyisisa hi rungula leri nga ebukwini leyi nge Tshinela Eka Yehovha.
2 Vana Xikombiso Lexinene: Swiendlo swa wena swi nga khumba mbilu ya swichudeni swa Bibele. Loko swi vona leswaku u byi teka byi ri bya risima vunghana bya wena na Yehovha swi tlhela swi vona ndlela leyi byi khumbaka vutomi bya wena ha yona, swi nga ha susumeteleka ku hlakulela ku va ni vuxaka byo tano. (Luka 6:40) Hakunene, xikombiso xa hina hakanyingi hi xona xi nga ni nkucetelo eka van’wana ku tlula leswi hi swi vulaka.
3 Ndlela ya nkoka leyi vatswari va dyondzisaka vana va vona ku rhandza Yehovha ha yona, i ku va xikombiso lexinene eka vona. (Det. 6:4-9) Mpatswa wun’wana lowu lavaka leswaku vana va wona va kulela entiyisweni wu vutisele vatswari lava swi va fambelaka kahle emhakeni leyi. Nuna wa kona u te: “Nhlamulo leyi ndzi yi kumeke eka hinkwavo lava ndzi vulavuleke na vona, hileswaku xikombiso xa vatswari hi xona xi tirhaka.” Xisweswo, vatswari va nga va xikombiso eka vana va vona hi ndlela leyi va hanyaka ha yona, kutani vana va ta vona leswi swi vulaka swona ku va “nakulobye wa Yehovha.”—Yak. 2:23.
4 Xikhongelo Lexi Humaka eMbilwini: Nakambe u nga pfuna van’wana leswaku va hlakulela vunghana na Yehovha, hi ku va dyondzisa ku khongela swi huma embilwini. U nga ha va kombisa hi xikhongelo lexi Yesu a endleke xikombiso ha xona ni hi swikhongelo swin’wana swo tala leswi humaka embilwini leswi nga eMatsalweni. (Mat. 6:9, 10) U nga dyondzisa vana va wena ni swichudeni swa Bibele ndlela yo khongela, hi ndlela leyi wena n’wini u khongelaka ha yona. Loko va ku twa u phofula swa le mbilwini, va ta vona ndlela leyi u titwaka ha yona hi Yehovha. Va khutaze ku “phikelela exikhongelweni” loko va langutane ni miringo. (Rhom. 12:12) Loko va kuma mpfuno wa Yehovha hi nkarhi lowu va wu lavaka ha wona, swi ta va olovela ku n’wi tshemba ni ku n’wi rhandza tanihi munghana wa vona wa xiviri.—Ps. 34:8; Filp. 4:6, 7.