“Wa Tsaka Munhu La Hambetaka A Tiyisela Ndzingo”
1 Vakreste hinkwavo va langutana ni miringo. (2 Tim. 3:12) Miringo leyi hi nga langutanaka na yona ku nga ha va vuvabyi, swiphiqo swa timali, nxaniso kumbe swilo swin’wana swo tala. Sathana u hi ringa hikwalaho ka leswi a lavaka leswaku hi hela matimba, hi tshika ntirho wo chumayela kumbe hi tshika ku tirhela Xikwembu. (Yobo 1:9-11) Xana ku hlula miringo swi tisa ntsako hi ndlela yihi?—2 Pet. 2:9.
2 Tilunghiselele Ku Langutana Ni Miringo: Yehovha u hi nyike Rito rakwe ra ntiyiso, ku katsa ni matimu ya vutomi bya Yesu swin’we ni tidyondzo takwe. Loko hi yingisa leswi Yesu a swi vuleke kutani hi swi endla, hi veka masungulo lama tiyeke naswona hi tilunghiselela ku langutana ni miringo. (Luka 6:47-49) Hi tlhela hi kuma mpfuno eka malunghiselelo man’wana—ku nga vamakwerhu evandlheni, minhlangano ya vandlha swin’we ni minkandziyiso leyi sekeriweke eBibeleni leyi humaka eka ntlawa wa hlonga ro tshembeka ni ro tlhariha. Minkarhi hinkwayo hi tirhisa nyiko ya Xikwembu ya xikhongelo.—Mat. 6:13.
3 Yehovha u tlhela a hi nyika ntshembo. Loko hi va ni ripfumelo leri tiyeke eka switshembiso swa Yehovha, ntshembo wa hina wu va ‘nsoma wa moya-xiviri, lowu tiyisekisiweke ni ku tiya.’ (Hev. 6:19) Eminkarhini ya Bibele, swikepe a swi nga suki ehlalukweni swi ri hava nsoma, hambiloko maxelo ma ri manene. Loko ko va ni xidzedze hi xitshuketa, ku ehlisa nsoma swi nga ha sirhelela xikepe leswaku xi nga yi xi ya hima maribye eribuweni. Hilaha ku fanaka, loko sweswi hi va ni ripfumelo eka switshembiso swa Xikwembu, swi ta hi tiyisa loko hi khome nyarhi hi timhondzo. Miringo yi nga hi wela hi xitshuketa. Hambileswi eku sunguleni ntirho wo chumayela wa Pawulo na Barnaba wu amukeriweke kahle eListra, xiyimo xi cince hi ku hatlisa loko ku fika Vayuda lava kanetaka.—Mint. 14:8-19.
4 Ku Tiyisela Swi Tisa Ntsako: Loko hi hambeta hi chumayela hambiloko vanhu va hi kaneta, hi va ni ku rhula ka mianakanyo. Ha tsaka loko hi hlayiwa hi ri lava faneriwaka hi ku khomisiwa tingana hikwalaho ka Kreste. (Mint. 5:40, 41) Ku tiyisela miringo swi hi pfuna leswaku hi hlakulela ku titsongahata, ku yingisa ni ku tiyisela hilaha ku heleleke. (Det. 8:16; Hev. 5:8; Yak. 1:2, 3) Swi hi dyondzisa ku titshega hi Yehovha, ku tshemba switshembiso swakwe swin’we ni ku tumbela eka yena.—Swiv. 18:10.
5 Ha swi tiva leswaku miringo i ya xinkarhana. (2 Kor. 4:17, 18) Miringo yi hi nyika minkarhi yo kombisa leswaku hi rhandza Yehovha hi mbilu hinkwayo. Loko hi yi hlula, hi ta hlamula swihehlo swa Sathana. Hikokwalaho, a hi lan’wi! “Wa tsaka munhu la hambetaka a tiyisela ndzingo, hikuva eku amukeriweni kakwe u ta kuma harhi ya vutomi.”—Yak. 1:12.