Ku Tiyisela Ka Wena Ku Ta Hakeriwa

¹ “Hi ku tiyisela ka n’wina mi ta londzovota mimoya-xiviri ya n’wina.” (Luka 21:19) Marito wolawo, lama nga xiphemu xa vuprofeta bya Yesu mayelana ni “makumu ya mafambiselo ya swilo,” ya swi veke erivaleni leswaku loko hi ta kota ku tshama hi tshembekile, hi fanele hi lunghekela ku hlangavetana ni miringo yo tala. Kambe hikwalaho ka matimba ya Yehovha, un’wana ni un’wana wa hina a nga ‘tiyisela ku fika emakumu’ kutani a “ponisiwa.”—Mat. 24:3, 13; Filp. 4:13.

² Nxaniso, mavabyi, ku pfumala timali ni ntshikilelo, hinkwaswo leswi swi nga endla vutomi byi tika siku rin’wana ni rin’wana. Hambiswiritano, a hi fanelanga hi rivala leswaku Sathana u ringeta ku herisa ku tshembeka ka hina eka Yehovha. Siku rin’wana ni rin’wana loko hi tshama hi tshembekile eka Tata wa hina hi va hi n’wi nyike nhlamulo yo hlamula Mutlhontlhi wakwe. Kunene swa khutaza ku tiva leswaku “mihloti” leyi hi yi rilaka hikwalaho ka nxaniso a yi thoneli ehansi! I ya risima eka Yehovha, naswona vutshembeki bya hina byi tsakisa mbilu yakwe!—Ps. 56:8; Swiv. 27:11.

³ Ku Ololoxiwa Hi Miringo: Loko ripfumelo ra hina ri nga tiyanga kumbe hi ri ni ku tsana ko karhi, ko tanihi ku tikukumuxa kumbe ku hela mbilu, mahlomulo ma nga swi humesela erivaleni sweswo. Xisweswo, ematshan’weni yo lava tindlela to papalata miringo hi ndlela leyi nga riki ya matsalwa, hi fanele hi yingisa ndzayo ya Rito ra Xikwembu ya leswaku hi tshika ‘ku tiyisela ku endla ntirho wa kona wu helela.’ Ha yini? Hikuva ku tiyisela miringo hi tshembekile swi hi pfuna ku va lava ‘heleleke ni ku va lava hanyeke etimhakeni hinkwato.’ (Yak. 1:2-4) Ku tiyisela ku nga hi pfuna leswaku hi hlakulela timfanelo ta nkoka, to tanihi ku anakanyela, ntwela-vusiwana ni tintswalo.—Rhom. 12:15.

⁴ Mfanelo Ya Ripfumelo Leyi Ringiweke: Loko hi tiyisela miringo, hi va ni ripfumelo leri se ri ringiweke leri nga ra risima emahlweni ka Xikwembu. (1 Pet. 1:6, 7) Ripfumelo ro tano ri hi hlomisela ku yima hi tiyile loko hi ringiwa enkarhini lowu taka. Tlhandlakambirhi, ha swi vona leswaku ha amukeleka eka Xikwembu, naswona sweswo swi tiyisa ntshembo wa hina swi wu endla wu va wa xiviri eka hina.—Rhom. 5:3-5.

⁵ Hakelo leyikulu ya ku tiyisela ka hina yi hlamuseriwe eka Yakobo 1:12, leyi nge: “Wa tsaka munhu la hambetaka a tiyisela ndzingo, hikuva eku amukeriweni kakwe u ta kuma harhi ya vutomi.” Hikwalaho, a hi tserhameni eku tinyiketeleni ka hina eka Yehovha, hi ri ni ntshembo wa leswaku u ta va hakela “lava hambetaka va n’wi rhandza.”