Hi Chumayela Ntshembo Wa Hina Wa Mfumo

¹ Emasikwini lawa yo hetelela ya mangava, vanhu vo tala emisaveni a va na wona ntshembo. (Efe. 2:12) Van’wana hi ku nga xiyi, va veke ntshembo wa vona eka rifuwo, eka vafumi, eka sayense ya manguva lawa ni le ka swilo swin’wana. Hina ha tsaka leswi hi nga ni ntshembo wa xiviri hi vumundzuku, ntshembo lowu nga ‘nsoma wa moya-xiviri, lowu tiyisekisiweke ni ku tiya’!—Hev. 6:19.

² Loko Mfumo wa Xikwembu se wu fuma, misava yi ta hundzuriwa yi va paradeyisi. Varhandziwa va hina lava feke va ta pfuxiwa. (Mint. 24:15) Vusweti, vuhomboloki, vuvabyi, ku dyuhala ni rifu a swi nge he vi kona. (Ps. 9:18; Mat. 12:20, 21; Nhlav. 21:3, 4) Leswi i swin’wana swa switshembiso swa Yehovha leswi nga ta hetiseka ku nga ri khale. Hi xihi eka switshembiso leswi lexi u xi languteleke hi mahlo-ngati?

³ Twarisa Mahungu Lamanene: A hi fanelanga hi tshama hi ntshembo wa Mfumo. Ku rhandza Xikwembu ni muakelani swi ta hi susumetela ku tekelela Yesu ni ku ‘vula mahungu lamanene eka swisiwana, hi chumayela ku ntshunxiwa ka makhumbi ni ku endliwa ka lava feke mahlo leswaku va tlhela va vona ni ku ntshunxa lava tshikileriweke va tifambela.’ (Luka 4:18) Muapostola Pawulo u chumayele mahungu lamanene endhawini ya vuxaviselo ni kun’wana ni kun’wana laha vanhu a va kumeka kona. A a tshama a khomekile entirhweni wo chumayela. (Mint. 18:5) Loko hi landzelela xikombiso xa yena xo hlanganyela hi ku hiseka entirhweni wo chumayela, ntshembo wa hina tanihi Vakreste a wu nge herisiwi hi “mivilelo ya mafambiselo lawa ya swilo ni matimba ya vuxisi bya rifuwo.”—Mar. 4:19.

⁴ Ntshembo wa hina wa Mfumo a wu heli loko hi hlangana ni vanhu lava nga ri tsakeliki rungula ra Mfumo, kumbe lava ri langutelaka ehansi, kumbe lava va hi kanetaka. Hi ‘khoma swi tiya exitivisweni xa le rivaleni xa ntshembo wa hina handle ko tsekatseka.’ (Hev. 10:23) A hi khomiwi hi “tingana [hikwalaho ka] mahungu lamanene.” (Rhom. 1:16) Swi nga endleka leswaku ku khorwiseka ka hina loku voniwaka hi mani na mani ni ku tiyisela ka hina swi ta susumetela van’wana leswaku va yingisa eku heteleleni.

⁵ Hambileswi swi faneleke leswaku hi lemukisa vanhu hi swiyimo swa misava leswi onhakaka, leswi hetisisaka vuprofeta bya Bibele, a hi vachumayeri va leswo biha. Ematshan’weni ya sweswo, ntirho wa hina wo chumayela wu vulavula ngopfu hi ntshembo wa hina wa Mfumo—ku nga mahungu lamanene ya Mfumo wa Xikwembu. Onge hi nga chumayela mahungu lawa lamanene hi ku tiyiseka ni ku hiseka leswaku hi ta “va ni ku tiyisela loku heleleke ka ntshembo ku fika emakumu.”—Hev. 6:11.