Ntirho Lowukulu Swinene Wo Chumayela Lowu Nga Si Tshamaka Wu Endliwa eMisaveni!

Se ku hundze dzana ra malembe Timbhoni ta Yehovha ti ri karhi ti chumayela mahungu lamanene. (1 Kor. 9:23) Hi hlanganyela entirhweni lowu lowukulu swinene, lowu nga si tshamaka wu endliwa emisaveni, hi ku chumayela mahungu lamanene hi tindzimi ta madzana-dzana. Hi ma chumayela ematikweni lama tlulaka 230. (Mat. 24:14) Kambe ha yini ntirho lowu wu ri wa nkoka? Naswona wu endliwa njhani emisaveni hinkwayo?

DVD leyi nge Jehovah’s Witnesses—Organized to Share the Good News yi hlamula swivutiso sweswo hi ku yi hlamusela hi vuxokoxoko mintirho yo tala leyi hi yi endlaka ematikweni yo hambana-hambana. Loko u ri karhi u yi hlalela, anakanyisisa hi swivutiso leswi nge: (1) Xana ntirho wa hina wu hleriwa wu tlhela wu kongomisiwa hi ndlela yihi? (2) Xana Komiti yo Tsala, Ndzawulo ya Vuhundzuluxeri, ya Swifaniso ni ya ku Rhekhoda Mimpfumawulo ni Tivhidiyo, ti hoxa xandla hi ndlela yihi entirhweni wo chumayela mahungu lamanene? (3) Hi xihi xikongomelo xa ntirho wa hina lowukulu wo gandlisa ni ku rhumela minkandziyiso? (Yoh. 17:3) (4) Xana ku gandlisiwa minkandziyiso yingani hi lembe? (5) Xana minkandziyiso ya hina leyi sekeriweke eBibeleni yi pfuna hi ndlela yihi? (Hev. 4:12) (6) I yini lexi endliwaka leswaku lava nga voniki kumbe ku twa, va kota ku dyondza Bibele? (7) Xana ntirho wa hina wu sekeriwa njhani hi timali? (8) Xana Ndzawulo ya Rungula ra Swibedlhele, ya Ntirho ni yo Hlela Mintsombano swi hi pfuna hi ndlela yihi? (9) Tanihi Mbhoni ya Yehovha, xana DVD leyi yi ku pfune njhani leswaku u twisisa ni ku nkhensa (a) matshalatshala lawa nhlengeletano ya Yehovha yi ma endlaka leswaku mahungu lamanene ma chumayeriwa? (b) ntirho lowu endliwaka emindyangwini ya Bethele yo tlula dzana emisaveni hinkwayo? (c) ndzetelo lowu valanguteri ni varhumiwa va wu kumaka? (d) nkoka wa ku sungula siku hi ku hlaya ndzimana ya Bibele ni ku lunghiselela minhlangano ya vandlha vhiki rin’wana ni rin’wana? (e) ndlela leyi swi pfunaka ha yona ku va kona eminhlanganweni ya vandlha? (f) leswi Paradeyisi emisaveni yi nga ta vula swona? (Esa. 11:9) (g) leswaku u fanele u hlanganyela entirhweni wa ntshovelo lowu yaka emahlweni sweswi?—Yoh. 4:35.

Hi wahi marito yo bumabumela lawa u tweke ma vuriwa hi maxaka ya wena, vanghana ni vanhu lava u endleke maendzo yo vuyela eka vona swin’we ni lava u va fambiselaka dyondzo ya Bibele? Swi nga va swinene loko wo hatla u hlalela DVD leyi ni vanhu loko u ri karhi u chumayela mahungu lamanene!—Mat. 28:19, 20.