Jehovah’s Witnesses—Organized to Share the Good News
Se ku hundze dzana ra malembe Timbhoni ta Yehovha ti ri karhi ti chumayela mahungu lamanene. Hi hlanganyela entirhweni lowu lowukulu swinene, lowu nga si tshamaka wu endliwa emisaveni, hi ku chumayela mahungu lamanene hi tindzimi ta madzana-dzana ematikweni lama tlulaka 230. (Mat. 24:14) Kambe ha yini ntirho lowu wu ri wa nkoka? Naswona wu endliwa njhani emisaveni hinkwayo? DVD leyi nge Jehovah’s Witnesses—Organized to Share the Good News yi hlamula swivutiso sweswo hi ku yi hlamusela kahle mintirho yo tala leyi hi yi endlaka ematikweni yo hambana-hambana. Endzhaku ko yi hlalela, anakanyisisa hi swivutiso leswi landzelaka.
Xana DVD leyi yi ku pfune njhani leswaku u twisisa ni ku nkhensa (1) matshalatshala lawa nhlengeletano ya Yehovha yi ma endlaka leswaku mahungu lamanene ma chumayeriwa? (2 Tim. 4:2) (2) ntirho lowu endliwaka emindyangwini ya Bethele emisaveni hinkwayo? (3) ndzetelo lowu valanguteri ni varhumiwa va wu kumaka? (2 Tim. 2:2) (4) nkoka wa ku sungula siku hi ku hlaya ndzimana ya Bibele ni ku lunghiselela minhlangano ya vandlha vhiki rin’wana ni rin’wana? (Mint. 17:11) (5) ndlela leyi swi pfunaka ha yona ku va kona eminhlanganweni ya vandlha? (Hev. 10:24, 25) (6) mikateko leyi u nga ta yi kuma loko Paradeyisi yi vuyeteriwa laha misaveni? (Esa. 11:9) (7) lunghelo leri u nga na rona ro hlanganyela entirhweni lowu yaka emahlweni wo tshovela?—Yoh. 4:35.
DVD leyi yi tikombise yi ri xitirho lexinene xo endla leswaku vanhu lava tsakelaka va tolovelana ni ntirho lowu endliwaka emisaveni hinkwayo hi Timbhoni ta Yehovha. (8) Hi rini laha swi nga vaka swinene ku komba swichudeni swa hina swa Bibele, maxaka ni van’wana DVD leyi? (9) Xana vanhu va angule njhani hi ndlela leyinene loko u va komba yona?
Loko hi ri karhi hi anakanyisisa hileswi Yehovha a swi hetisisaka, hi susumeteleka ku pfumelelana ni marito ya mupisalema lama nge: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena.” (Ps. 40:5) Onge hi nga tirhisa DVD leyi leswaku hi pfuna van’wana va tlangela Yehovha ni nhlengeletano yakwe!