Vhidiyo Leyintshwa Yo Sungula Tidyondzo Ta Bibele

Vhidiyo yo koma leyi nga ni nhloko-mhaka leyi nge Ha Yini U Fanele U Dyondza Bibele? yi hlalela hi vanhu vo tala eka jw.org/ts. Vhidiyo leyi yi endleriwe ku khutaza vanhu lava tsakelaka ku amukela dyondzo ya mahala ya Bibele. Yi nga pfuriwa hi ku tlilika link leyi nge “Kombela Dyondzo Ya Bibele” leyi nga le hansi ka tluka-nkulu kumbe hi ku skena khodi leyi nga eka tluka ro hetelela ra swiphephana swa hina leswintshwa. Hi leti tindlela tin’wana leti hi nga tirhisaka vhidiyo leyi hi ndlela leyinene ha tona.

• Loko u endla riendzo ro vuyela, byela n’wini wa muti u ku: “Xana ndzi nga ku komba vhidiyo yo koma leyi hlamuselaka ndlela leyi u nga ti kumaka ha yona tinhlamulo ta swivutiso leswi u nga na swona malunghana ni Bibele?” Loko a pfumela, n’wi kombe vhidiyo yoleyo eka xitirhisiwa xa wena lexi kotaka ku nghena eka Internet kumbe eka khompyuta yakwe.

• Loko hi fambisa xin’wana xa swiphephana leswintshwa loko hi chumayela hi xitshuketa kumbe etindhawini ta mani na mani, hi nga komba munhu loyi hi n’wi fambiselaka khodi leyi nga eka tluka ro hetelela kutani hi n’wi khutaza ku skena khodi yoleyo hi xitirhisiwa xakwe lexi kotaka ku nghena eka Internet. Leswi eka tindzimi to tala khodi yoleyo yi ku yisaka hi ku kongoma eka vhidiyo leyi nga eka Web site ya hina, swi nga ha koteka ku tlanga vhidiyo yoleyo hi nkarhi wolowo u tirhisa xitirhisiwa xa wena lexi kotaka ku nghena eka Internet.

• Byela vatirhi-kuloni, vadyondzi-kuloni, maxaka ni van’wana lava u tolovelaneke na vona malunghana ni vhidiyo leyi, kutani u va byela leswaku u nga va komba yona. Kumbe u va rhumelela link ya vhidiyo yoleyo hi e-mail kutani u va kombela leswaku va yi hlalela.

Hi nga ha kota ku sungula tidyondzo to tala ta Bibele hi ku tirhisa lunghiselelo leri lerintshwa, hi va pfuna hi tlhelo ra moya “lava [nga] ni mboyamelo lowunene eka vutomi lebyi nga heriki.”—Mint. 13:48.