Tshama U Ri Karhi U Ehleketa Hi Siku Ra Yehovha

¹ “Siku lerikulu ra Yehovha ri le kusuhi. Ri le kusuhi, naswona ra hatlisa swinene.” (Sof. 1:14) Sofaniya ni vatsari lavan’wana va 11 va tibuku to hetelela ta Matsalwa ya Xiheveru a va tshama va ri karhi va ehleketa hi siku ra Yehovha. Eka Dyondzo ya Buku ya Vandlha, loko hi dyondza Matsalwa ya vona lama huhuteriweke hilaha ma hlamuseriwaka ha kona ebukwini leyi nge Tshama U Ri Karhi U Ehleketa Hi Siku Ra Yehovha, swi ta hi pfuna leswaku hi tilunghiselela siku rero leri chavisaka.—Sof. 2:2, 3.

² Rungula Ro Hlawuleka: Ematshan’weni yo hlamusela leswi ndzimana yin’wana ni yin’wana ya tibuku leta 12 ta vuprofeta yi swi vulaka hi ndlela yo fanekisela, buku leyi nge Siku Ra Yehovha yi hlamusela ndlela leyi Matsalwa ma tirhaka ha yona eka swiyimo swa xiviri evuton’wini leswi hi langutanaka na swona siku ni siku. Yi kandziyisa leswaku loko hi endla swiboho evuton’wini bya hina hi fanele hi tshama hi ri karhi hi tsundzuka leswaku siku ra Yehovha ri le kusuhi. Yi vulavula hi timhaka ta vutomi bya ndyangu, vuxaka bya hina ni vapfumeri-kulorhi, vuhungasi lebyi hi byi hlawulaka, ntirho wa hina wo chumayela ni mintirho leyi hi yi hlawulaka kumbe swikhundlha leswi hi swi amukelaka emintirhweni.

³ Xiyenge 1 xa buku leyi xi hi pfuna leswaku hi tolovelana ni vaprofeta lava 12 swin’we ni matsalwa ya vona. Xana a va ri vamani? Hi swihi swiyimo leswi va langutaneke na swona leswi fanaka ni swa hina namuntlha? Xiyenge 2 xi vulavula hi Yehovha ni hi timfanelo takwe. I yini leswi vaprofeta volavo va hi pfunaka leswaku hi swi twisisa hi Yehovha ni hi vumunhu byakwe? Xiyenge 3 xi vulavula ngopfu hi mahanyelo ya hina ni ndlela leyi hi faneleke hi hanyisana ha yona ni vanhu van’wana. Xana hi nga xi tsakisa njhani Xikwembu siku ni siku? Xiyenge 4 xi hlamusela ndlela leyi hi nga ri rindzelaka ha yona siku ra Yehovha hi ntsako.

⁴ Kunguhata Sweswi Leswaku U Ta Vuyeriwa: Tiyimisele ku endla leswi faneleke leswaku u ta vuyeriwa hilaha ku heleleke loko u ri karhi u dyondza buku leyi nge Siku Ra Yehovha, leyi hi nga ta yi sungula hi vhiki ra August 4, 2008! Tiyimisele ku va kona eka Dyondzo ya Buku ya Vandlha vhiki ni vhiki. Lunghiselela dyondzo yin’wana ni yin’wana hi vukheta, u languta matsalwa lama kombisiweke ku vona ndlela leyi ma fambisanaka ha yona ni rungula leri dyondziwaka. Anakanyisisa hi rungula ra kona hi ku tivutisa leswi, ‘Xana ndzi nga ri tirhisa njhani rungula leri ekaya, exikolweni, entirhweni, ensin’wini ni loko ndzi ri karhi ndzi hanyisana ni Vakreste-kulorhi?’ Loko u ya eka dyondzo ya buku, yana u tilunghiselele ku ya hlamula leswaku u ta khutaza van’wana.—Rhom. 1:12.

⁵ Onge ku dyondza ka hina buku leyi nge Siku Ra Yehovha ku nga hi lunghiselela leswaku hi ta kota ku ‘tiyela’ ‘siku ra Yehovha lerikulu ni leri chavisaka ngopfu.’ Hakunene siku rero ri kwala nyongeni!—Yuw. 2:11.