Hi Ni Rungula Ra Risima Leri Hi Faneleke Hi Ri Byela Van’wana
1 Rito ra Xikwembu ri tele hi tidyondzo ta risima leti hi faneleke hi ti teka ti ri ta nkoka swinene. (Ps. 12:6; 119:11, 14) Eka xiendlakalo xin’wana Yesu u tirhise swifaniso swo hambana-hambana loko a vulavula hi Mfumo, kutani a vutisa vadyondzisiwa vakwe a ku: “Xana mi wu kumile mongo wa swilo leswi hinkwaswo?” Loko va vula leswaku va wu kumile, u te: “Loko swi ri tano, muleteri un’wana ni un’wana wa le rivaleni, loko a dyondzisiwa ta mfumo wa matilo, u fana ni munhu loyi a nga n’wini wa yindlu, la humesaka swilo leswintshwa ni swa khale evuhlayiselweni byakwe bya xuma.”—Mat. 13:1-52.
2 Ntiyiso wa le Bibeleni lowu hi nga wu dyondza loko hi sungula ku dyondza ntiyiso hi wu teka wu ri rungula ra risima. Loko hi ya hi dyondza swilo leswi enteke swa Rito ra Xikwembu eka dyondzo ya hina vini hi kuma mintiyiso yin’wana ya le Bibeleni leyi nga rungula lerintshwa leri nga ra risima eka hina. (1 Kor. 2:7) Nakambe, “hlonga ro tshembeka ni ro tlhariha” ri hi pfuna leswaku hi kuma rungula rin’wana lerintshwa leri nga ra risima.—Mat. 24:45.
3 Hi ri tlangela swinene rungula leri hi ri dyondzeke khale ni leri ha ha ku ri dyondzaka. Leswi swi hi endla leswaku hi navela ku kuma ndzetelo lowu engetelekeke kutani hi kuma ntokoto tanihi vadyondzisi va Rito ra Xikwembu, naswona hi avela van’wana ntiyiso wa risima lowu hi wu dyondzeke.
4 Dyondza Eka Xikombiso Xa Yesu: Yesu u kombise leswaku wa ri tlangela swinene rungula leri ra risima hi ku endla hinkwaswo leswi a nga swi kotaka leswaku a ri byela van’wana. Hambiloko a karhele, a nga tshikanga ku dyondzisa tidyondzo leti a a ti teka “exitlatini” xakwe.—Yoh. 4:6-14.
5 Ndlela leyi Yesu a a va rhandza ha yona vanhu lava va nga tiviki nchumu hi Xikwembu ni xikongomelo xa xona, yi n’wi susumetele ku va byela ntiyiso lowu hanyisaka lowu humaka eka Xikwembu. (Ps. 72:13) U va twele vusiwana vanhu lava a va lava ku dyondza hi Xikwembu ni xikongomelo xa xona kutani a va “dyondzisa swilo swo tala.”—Mar. 6:34.
6 Tekelela Yesu: Loko hi ri tlangela swinene rungula ra risima leri hi nga na rona, hi ta ri teka ri ri ra nkoka ku fana na Yesu naswona hi ta hisekela ku ri dyondzisa van’wana hi ri karhi hi tirhisa Bibele. (Swiv. 2:1-5) Hambiloko minkarhi yin’wana hi titwa hi karhele, a hi nge tshiki ku hisekela ku byela van’wana ntiyiso wa le Matsalweni hi mbilu hinkwayo. (Mar. 6:34) Loko hakunene hi tlangela rungula leri hi nga na rona ra risima, sweswo swi ta hi susumetela ku endla leswi nga ematimbeni ya hina loko hi ri ensin’wini.